酥脆帶子

日式薯仔煮牛肉

味增燒汁煎三文魚

日式浸茄子

由今天起一連五天介紹有關於簡單日式食品，頭一天是我最愛我茄子

而這一個茄子簡單易做，時間是最重要的一方面

而最理想的食法是冷著吃，所以可以早一天煮好放雪櫃留著 ^^

日式煮法中離不開味琳，味琳是一種糯米做成帶甜的煮食用酒

而日式豉油都是另一樣重要的日本味道

這一道小吃味道偏甜，所以砂糖的比重會高一點

用小煲燒水，三份水 : 一份豉油 : 一份味琳 : 半份糖

茄子方面可以揀日式的和中式的

我慳家，所以買了中式的茄子，茄子最重要揀肥肥的為好

然後將茄子切之，簡單的一段段切就可以了

開大火蓋上蓋煮五分鐘左右，其後焗十分鐘左右，重複三次

茄子會由白色變成圖中的，為之可以

如果未有變色則重複以上步驟致成功

煮好的茄子攤凍就可以準備上碟

最後放上少少木魚絲，大成功!!!!

後記: 如果講究少少可以右少少木魚粉一起浸焗，會更香口。 我將茄子切三段的原因是擺碟比較美觀，但就煮食時間上比較慢，故有興趣的朋友可以滾刀切之。另外茄子份量方面大約一人兩條中式茄子。

-----Bon Appétit-----

雞翅膀

如果六合彩頭獎是我一個獨得，那我的生活態度以至飲食口味一樣會轉變嗎? 小時候的我並不喜歡雞翅膀，外婆跟母親煮的雞翅膀定必斬開一半煮之，吃得滿口骨碎，這是我小時候對雞翅膀的印象。直到中學食物部有不同款式小吃，例如咖哩牛丸、腐皮卷、咖哩角、鹵水雞翅膀。價錢相當便宜，打比如三隻雞翅膀賣五元正，一天最利害可以吃三十隻，食物部為求方便而使用電飯煲細火無間斷炆煮。極致入味、鬆化而且離骨的境界。打從中學以後就愛上雞翅膀，到中五更愛上雞亦、一種下欄食物。沒有記錯商場小食店十二隻鹵水雞亦尖賣十元正，當然隨後一年店子做不住關了門。

媽媽味道的雞翅膀，一定要數薯仔炆雞亦，簡單好吃。薑蔥下鑊煎香雞翅膀，放蠔油 / 南乳 煮之，薯仔切丁隨之而放，右水至面，細火炆煮三十分鐘，試味，大火收水即可上碟，不會失敗的一道菜，初入廚房之人必學的一道。

朋友間的團體飯局離不開Pizza、打邊爐  以及  "燒野食"。 "燒野食" 當中最受歡迎的是烤雞翅膀。不是我自誇，我敢說我炸雞翅膀是有一手的，吃過的朋友都會說皮脆多汁，主要的要離火慢慢不停轉，心急起來就會烤得焦黑，沒癮。

家中一樣可以做出烤雞亦的感覺，需要一個焗爐，打醃好數小時的雞翅膀放入預熱一百五十度火的烤箱上下火焗10分鐘，再調整至一百一十度焗十五分鐘，包保吃過不停口。而春雞則按比例加倍時間，一樣可以做到皮脆肉嫩的。

Bon Appétit

~上海夜~

星期六有朋友搵我食蟹，我提議我放工去 銅鑼灣 老三陽 新鋪 睇下d 蟹貴唔貴

本身諗住去 city super 買 西式料 飲香檳 既，但係0係老三陽行行下等等下

又覺得 可以0係 老三陽一次過買曬番屋企， 同埋最驚喜係有得賣小籠包

而且仲要係蟹粉小籠包，一盒 8隻賣 98蚊，番屋企 隔水蒸 8分鐘就食得

皮就唔算薄架喇, 不過真係有蟹油同埋蟹肉， 98蚊 真係好正!!

最好切紅蘿蔔浸熱水再放底拎去蒸，唔會"痴" 底呀因為~

溫馨提示: 真係太好食，我提議 1 人 4隻 好d~~

當晚既主角全大閘蟹，而且要熱辣辣咁食先過癮

所以一諗就煮幾碟 可以凍食既 小食，咁食完蟹仲可以慢慢食慢慢飲酒丫麻..哈

其中我就買左 茭白荀 炒鹹肉

我地 3個人買左 14條 荀 切頭切尾 要中間 開邊

鹹肉切絲 浸 小小熱水 

落薑絲大熱爆香 落 茭白荀 炒一陣 讚酒

之後 落 少少糖 調味，再落鹹肉 同埋 浸過鹹肉既水 大火快炒

之後 落 少少 生粉水，搞掂先落麻油 同埋 少少生抽 

lee個熱食又得凍食又得

蒿荀  我拎黎涼伴，一早整好就可以放雪櫃 等食先上枱

首先 蒿荀去皮，切段再切條， 落多多鹹汆水  之後過冰水

用廚房紙吸水， 用少少 鹽同 麻油 調味 就okay 架喇

同埋買左 半斤 馬蘭頭 炒冬菇粒

我唔係好識揀馬蘭頭，番黎好多都好老，食落口 好似牙籤咁

所以 可以 skip 丫~~

而蟹就 買 360 蚊斤 買左 5隻，totally 420 蚊

都 okay 丫, 普通啦.....

不過星期六 有可能再買多次食!!  哈哈

溫馨提示: 記得放紫蘇葉 一齊蒸 同埋 唔食食粒星星，仲有記得煲薑茶 飲呀!!

蔥油椰菜湯水餃

不得不應承 人只要有籍口 懶惰一次，偷一次懶

就自然會愛上 這種 偷偷摸摸 的 光明正大

八号風球又一個好籍口 唔打 Blog，哈哈.......

平時煮西式食物就煮幾個鐘，煮番一次中式 就 感覺到偷懶既感覺

中式家庭食物好多時都可以 1小時之內 完工

而且材料費用 上都比西式黎得更 抵食

煮過幾次中式食物，女皇都終於開口

" 你都係煮西式食物得 應手d"

就係女皇 lee 句，我要反思一下我係唔係應該 煮多d 中式家庭式既食物

假設過幾年要開始獨立，搬出黎住

唔通晚晚都煮西式咁貴咁煩咩，所以中式食物真係要得閒煮下，向亞媽偷多少少師

打八号，0係 屋企 煮野食

簡簡單單 煮 即食水餃，點知 搞搞下 愈搞愈多野

又炸蒜，又整蔥油，又整得靚靚咁

而我最想同大家分享既係 蔥油

炸好一樽放雪櫃，得閒 拎少少出黎 煮下野 食下麵 都不知幾過癮

不過我就冇整咁多喇，亞媽唔係咁鍾意我整埋一樽樽既野落雪櫃

廢事亞媽嘈

蔥 一定一定一定要切得非常幼細， 用慢火 慢慢 炸

炸到金黃色就記得快d 熄火，如果唔係就會變得好燶 架喇

一路炸一路會聞到好香好香既蔥味, 宜家諗都流口水 ~~

如果想香口d 的話，炸到一半果時可以落少少蒜茸 同埋 dd 辣椒

炸完出黎 好香脆， 食公仔麵唔洗落麻油

轉用蔥油， 即時 好食左好多， 就算乾撈 都一樣咁好食!!

而我就 煮左個椰菜粉絲湯 再落 蔥油 同埋 炸蒜 一齊煮

即刻 令成件事唔同曬~~   哈哈

有時 煮野食 只要花多少少心機，都一樣煮得好食既野出黎 令人感動~

蕃茄餅

本身琴日整完個蕃茄清之後都諗住 唔要d 蕃茄渣

拎上手聞兩聞覺得仲係好香蕃茄味，無理由咁快講拜拜

於是直接打隻蛋黃、少少洋蔥粒、粟粉 同埋 黑椒鹽

當佢肉餅咁不停攪攪攪...

落鑊中細火慢慢煎香，好小心反轉另一面煎香

切得靚靚仔仔咁拎上碟 就食得架喇~~

題外話

我見王子 facebook 講 yahoo既問題，我都想講 我仲好鍾意打blog，好鍾意分享自己既生活

我打blog 唔係 一味打完就算，我想同大家多d交流

而 yahoo 新版面真係令好多朋友 停止步伐，再講 facebook 真係有好多好處

好多都可以好即興 好直接好 互動

我明白 打blog 可以打得好情深，而 facebook 反而可以做番自己最真實既一個我

不過放心，我未想放棄個blog，只係好多時好多話題都會轉左去 facebook 講

而好少再0係blog 講題外話

所以 希望大家都 join 埋一齊去facebook 傾丫

東主有喜 Facebook Page

七味蘋果沙律

前排有個blog 友 提議 炸雞肉 配 自家蜜糖芥末醬   個醬 撈青瓜 / 蘋果

我又身痕 買左幾個青蘋果番黎整

好衰唔衰 芥辣 同 芥辣籽 都 出現問題，芥辣發霉，芥辣籽出水

兩樽都同一時間唔要得

正當冷靜緊既時候諗到 用 辣椒粉 + 七味粉 + 沙律醬 都應該幾好食

當然味道上一定差d野，所以我再加少少煉奶 + 黑椒 + 鹽 平衡味道

份量幾多都好難講，都好睇個人口味

而可以的話 可以 另外落多少少 芝麻，因為我地食果時發覺原來七味粉入面既芝麻係最好食!!

題外話
作為一個無神論 既我有時候都想講一句 << 神呀，請給我多一點智慧>>
而對我而言我覺得有另一句更合適，<<外星人呀，請幫我腦部發展多一些>>
有時覺得人類都幾搞笑，明明大家都係地球人，對自己認識咁少，而且不停為利益而殺害其他物種。
金錢、能源，食物、權位、政治、道德等因素而開火，不停誇張國有軍力。
一個颶風、一個地震、一個火山 都輕易打殘一國人民，仲邊得閒講其他國家既事丫。
地球咁細既地方都自己友打自己友，上面班外星人就笑笑口咁睇我地點死，
睇我地點用地球不可再生能源，睇我地點發展核能。
如果40年代美國開始同外星文化換得科技的話，我好想知70年後既今日美國仲有幾多科技未公開。
冇錯!! 我對外太空既事雖然有興趣去理解，但係未去到熱愛既感覺，只好當成一個科幻故事聽。
外星生物有就一定有架喇，
我最關心係宇宙入面有幾多個空間、平衡宇宙，維度 既 有形 / 無形 物種對地球生物 / 資源 作出威脅，
而宇宙係唔係真係有一班好正義既外星人幫我地對抗有害地球既外星人呢??

假薄餅小食

早幾日有 蕃茄, 有意粉

而其中拎左部份材料 焗假 Peter 仔

而且好簡單, 個皮 用番 之前整意粉既就okay 架喇

不過要比意粉更薄 先好食架~

而蕃茄就切到好細粒, 隔走少少水

如果過濕就會令到個Peter 仔 唔脆架喇

同埋同一時間 切少少 羅勒一陣一齊焗~

而個Peter 仔 個 底汁 只係同沙律醬 加少少茄汁 做出黎既千島醬

之後落少少蕃茄 同埋羅勒, 再加少少 水牛芝士

焗盤底上少少油, 一黎唔想"痴" 底, 二黎想餅底脆身少少

放入一早預熱 250度 焗爐 焗 3 分鐘 就食得架喇!!

你咪好簡單呢~

平時有咩題外話都係轉左去 Facebook 講，可以 join 埋一齊講丫~

蕃茄水牛芝士配香草醬

講到 香草 羅勒一定係最普及既一種

而我就偏偏極之唔鍾意食，少少都okay，如果勁起上黎食一啖即嘔都似

就好似今日分享 lee 碟咁

大家只係一層蕃茄一層水牛芝士一兩塊羅勒 之後落少少 欖油就算

一向屎忽鬼既我鍾意整色整水，又點會咁易放過自己丫~

0係 Sogo 買左兩包蕃茄, 黃黑蕃茄 各一包

當然啦, 你鍾意咩蕃茄都好，生食既蕃茄都係買貴少少好

一黎又衛生少少 二黎又爽甜d，有時撞0岩手神連皮都脆脆地架~

不過一定要揀 硬身既蕃茄，雖然軟身會有可能甜 d

但係賣相就唔討好

蕃茄食之前既 10分鐘切好，記得將把刀磨到好利 先切蕃茄

如果唔係會壓住蕃茄，令蕃茄流出過多既水份

之後用少少白酒 浸 大約 10分鐘 

頭先都講 我好憎食 羅勒，所以我加左其他香草

例如 薄荷, 刁草, Flat 既 蕃茜

份量好睇自己, 有d人鍾意多少少刁草有d人鍾意多羅勒

但係 薄荷 三兩塊就足夠，因為味道好犀利, 好易搶人風頭

之後 放入攪拌機 落少少欖油 打碎

拎出黎再落欖油, 黑椒 鹽, 同埋少少白醋

之後就可以上碟, 一層蕃茄一層芝士最後落0岩0岩打好既香草醬

btw, 浸完白酒既蕃茄記得用廚房紙吸走多餘水份先好上碟

炸雞肉 配 自家蜜糖芥末醬

睇番張相都想食

Sogo 買左塊 日本黎既 超大塊 雞胸   大約 250g  68 蚊

好貴, 不過比起巴西黎果d就好食d

買番黎切條 切做一口大小

少少糖, 豉油, 胡椒粉, 少少水 醃最少 30分鐘

醃好打一隻 蛋黃  同埋上大量生粉

中火半煎炸 至 少少變色

回鑊 大火炸深色少少 就okay 架喇

炸兩分鐘都應該 熟曬

 炸完出黎應該會咁既色

蜜糖芥末醬

沙律醬, 芥辣, 芥辣籽, 蜜糖

份量自己試0岩 就Okay 架喇, 冇話一定既味道同份量

不過芥辣 就要好多先好食 大約個比例 1份沙律醬, 半份芥辣, 1/4 份芥辣籽, 少少蜜糖

覺得點呀? 係咪睇見麵想食番舊呢~~

lee個就係我自家出品既　麥樂雞 喇

焗薯配煎焗豬扒

2011年7月21日 上午10:00

本身lee 碟野都冇咩特別, 只係想同大家分享一個焗薯仔焗到好脆既方法

首先開焗爐二百二十度, 落一舊牛油, 少少生油, 同埋少少 Sage

另一邊滾刀切薯仔, 切大舊d, 烚 5分鐘左右, 中間仲好硬, 外表要爛爛地

之後隔水, 蓋上蓋不停shake shake, 令到外表有d變薯蓉

另一邊 d 牛油應該都變到好滾熱, 直接用匙 放落滾油, 應該會聽到 炸炸聲

放番入焗爐, 焗 20分鐘

之後拎出黎反轉再焗 20分鐘 就會變得金黃香脆架喇

超級好食!!   做 side dish 一流呀!!

題外話

從來我都唔係一個讀書人所有測驗考試都唔會高分，而其中由小學到中學有幾科係特別高分。分別係小學既科學、數學、初中既英文、化學。因為我對果一個老師有好感，好照顧我地一班唔鍾意讀書既同學。所以我好留心上堂，會寫筆記會問問題，測驗考試都會頭一二名高分。宜到會考先發覺所有老師都好偏心令我唔鍾意讀書。雖然我唔係一個讀書人，但係就好鍾意吸收新既資訊，所有類型都會興趣，除音樂, 金融類別！ 十年光景讀過好多唔同種類既課程，當然結果都係無一樣成功。講起書, 之前上心理學講過話有好多人會買好多書番屋企但係唔睇只係儲，想話俾人知自己有幾犀利、睇過幾多書籍。當然我諗我自己都係其中一個，儲儲埋埋好多心理學/ 催眠既書都冇睇。原因除左扮野之外，有好多我本身都識所以好快就睇完/ 跳過唔睇，一本書可能都係睇10%，睇多 10本可能連10% 都唔洗睇就放埋一邊，所以宜家我都冇再買新既 理學書番黎。深既又唔識，易既唔睇都識，廢事嘥位。書都算小事，10年前我儲漫畫都好得人驚，我估計都超過 500本，單係手塚治虫都儲左 二百六十幾本。人大左覺得冇用又嘥位於是一次過送曬俾朋友。我諗過多幾年我都會該一放棄手頭上既書本，如果係放棄，倒不如問下你地有冇人要啦。我過一兩日再 post 一次丫..

薑蔥蠔

2011年6月21日 上午11:09


妖!!!!!

0岩0岩打好曬一大段野!!!

到我save 果時要我再 login!!!!

頂!!!!!!   我去未分類網誌又冇!!!!!

公司又有野做, 所以唔好意思

打得簡單少少, 要話就話 yahoo blog 啦!!

薑蔥蠔

生粉洗蠔, 用薑蔥汆水, 落油爆香大量薑蔥, 再大火炒蠔至乾身, 落少少蠔油 搞掂!!

有咩唔明再問, 我用左急凍珍珠蠔, 如果用大蠔的話, 要汆耐d水同埋煎得乾身少少

題外話

黃光亞講一句, 你就聽到市民聲音, 咁係唔係代表你冇當我地係市民?

唔好意思今日係超簡化版

酸甜雞亦

2011年6月20日 下午01:25

唔知有幾多朋友仔估我今日都係出意粉 post 呢?

唔好講你地睇我個blog 會悶丫, 我自己煮都覺得悶

天氣咁鬼熱, 諗到入廚房對住個火都大鑊

最慘係做廚房一日10個鐘對住個大爐果d師傅

出面街都三十幾度, 何況廚房入面, 雖然我未試過入酒樓廚房

不過都估到有幾熱, 俾我都係做番客人, 俾錢食飯好過

lee 碟其實都好簡單, 一次過可以做十幾 隻都唔係咩問題

只係睇係有冇心機慢慢炸香, 炸到少少脆身

雞中亦同鉸剪打直一開二, 吸乾水份

上少少鹽, 再上薄薄既生粉同埋少少胡椒粉

中火炸到少少金黃色, 再轉大火炸多少少金黃色

拎起, 隔油, 攤到凍曬再大火番炸一次, 等佢脆身

之後可以放埋一邊唔洗理佢地, 攤到凍為止

今次 5隻雞亦, 用兩湯匙茄汁, 1/4湯匙0急汁, 少少美極, 少少七味粉

 開鑊, 落少少油, 鑊香蒜粒, 落0岩0岩溝好既汁, 爆一陣

落埋雞亦,  中火煎到收水乾身再落多少少七味粉就okay 架喇

冇咩難度, 係睇你有冇時間慢慢炸, 仲要咁熱先黎炸野.. 痴線!!

題外話

之前我都0係 blog 提過屋企有蛀衫蟲, 琴日谷鬼氣諗住拎d衫出黎搞搞佢

點知發現有兩支雞毛掃俾蛀衫蟲侵占左, 而且為數過百,

情況極之壞, 唯有硬住頭皮搬曬所有野出黎清洗

我就三個鐘不停0係個蜜室同佢地死過

而女皇就慘d, 不停用漂水洗野, 搞到隻手皮膚粗曬, 可慘喇

今次起左佢地個屋企, 希望短時間之內都唔會再出現啦  唉!!