酸梅麵豉蒸排骨 (散文之三)

蒜香雞翼

你我天各一方，你有你的生活，我有我的態度。

每天下班帶著疲憊的身軀走上街，漫無目的地跟不

同人仕紙上談兵空口說白話，這樣就過了分手後的

第二百一十七天。

每天過著一式一樣公式般的生活，彷彿停留在二百

一十七天前的空間

沒有了你以後我學會而對孤獨，沒有你以後的生活

變得乾燥

看肥皂劇再笑不出聲，雙眼的眼皮每天都變得沈重

無力

煮一鑊飯和二十只雞翅膀放冰箱，夠我吃一星期

放四匙史雲生調味雞汁到二十隻已完全解凍抹乾

的雞翅膀，靜候十五分鐘

開慢火煎煮至金黃香脆，十五分鐘又過去了

拿起中式菜刀用力拍下蒜頭做出蒜泥和洋蔥絲一

起放入鑊中快炒

用菜刀把蒜頭當成自己一樣恨之入骨地拍碎，大快

人心

切洋蔥切得我眼淚汪汪，空間變得安靜

一天一天的過去，我依舊吃著你最愛的蒜香雞翼等

你回來。

史雲生 May 姐原食譜 按此

p.s.  以上如有雷同 真係 有咁啱..!! 

XO醬肉碎煮茄子

講中式小菜其實都唔到我講，話曬 打blog 都有好多師奶廚神

所以要煮都係煮d 簡單又快捷 既小菜

10蚊 肉碎 用基本調味醃一陣  同埋落少少凍滾水

煮起上黎會易散少少

而茄子 普遍黎講酒樓都會先走油 再煮

一黎又快熟, 二黎又可以 keep 住d 紫色

但係茄子就好似海綿咁不停吸油，食食下就好超標

所以屋企煮茄子就唔好理佢賣相喇，食得健康d 好

我試過做實驗 一條 普通大細既茄子 可以 吸 最少 150ml 既油

你冇睇錯 係 150ml !!!     咁你想健康 定賣相丫?

至於想少d 油 又可以 盡量 keep 住 茄子色 的話

我就會先落料頭爆香豬肉至出油 然後讚酒 拎起豬肉 用鑊底d油 再炒茄子

 炒兩炒就可以落大約半碗雞湯 1/4 碗滾水 同埋 落埋d 豬肉 蓋上蓋 煮一陣

拎一隻碗落大約一匙蠔油、一匙辣 xo醬 同埋一匙生粉

炒兩炒就可以 打茨 同埋落 少少 九黃 最後落少少蔥花  就搞掂架喇

係唔係好簡單呢~~

喂!!!!  黎 我 facebook page 傾計丫~~  個 blog 冇曬人氣咁....死氣沈沈 

蔥油椰菜湯水餃

不得不應承 人只要有籍口 懶惰一次，偷一次懶

就自然會愛上 這種 偷偷摸摸 的 光明正大

八号風球又一個好籍口 唔打 Blog，哈哈.......

平時煮西式食物就煮幾個鐘，煮番一次中式 就 感覺到偷懶既感覺

中式家庭食物好多時都可以 1小時之內 完工

而且材料費用 上都比西式黎得更 抵食

煮過幾次中式食物，女皇都終於開口

" 你都係煮西式食物得 應手d"

就係女皇 lee 句，我要反思一下我係唔係應該 煮多d 中式家庭式既食物

假設過幾年要開始獨立，搬出黎住

唔通晚晚都煮西式咁貴咁煩咩，所以中式食物真係要得閒煮下，向亞媽偷多少少師

打八号，0係 屋企 煮野食

簡簡單單 煮 即食水餃，點知 搞搞下 愈搞愈多野

又炸蒜，又整蔥油，又整得靚靚咁

而我最想同大家分享既係 蔥油

炸好一樽放雪櫃，得閒 拎少少出黎 煮下野 食下麵 都不知幾過癮

不過我就冇整咁多喇，亞媽唔係咁鍾意我整埋一樽樽既野落雪櫃

廢事亞媽嘈

蔥 一定一定一定要切得非常幼細， 用慢火 慢慢 炸

炸到金黃色就記得快d 熄火，如果唔係就會變得好燶 架喇

一路炸一路會聞到好香好香既蔥味, 宜家諗都流口水 ~~

如果想香口d 的話，炸到一半果時可以落少少蒜茸 同埋 dd 辣椒

炸完出黎 好香脆， 食公仔麵唔洗落麻油

轉用蔥油， 即時 好食左好多， 就算乾撈 都一樣咁好食!!

而我就 煮左個椰菜粉絲湯 再落 蔥油 同埋 炸蒜 一齊煮

即刻 令成件事唔同曬~~   哈哈

有時 煮野食 只要花多少少心機，都一樣煮得好食既野出黎 令人感動~

薑蔥蠔

2011年6月21日 上午11:09


妖!!!!!

0岩0岩打好曬一大段野!!!

到我save 果時要我再 login!!!!

頂!!!!!!   我去未分類網誌又冇!!!!!

公司又有野做, 所以唔好意思

打得簡單少少, 要話就話 yahoo blog 啦!!

薑蔥蠔

生粉洗蠔, 用薑蔥汆水, 落油爆香大量薑蔥, 再大火炒蠔至乾身, 落少少蠔油 搞掂!!

有咩唔明再問, 我用左急凍珍珠蠔, 如果用大蠔的話, 要汆耐d水同埋煎得乾身少少

題外話

黃光亞講一句, 你就聽到市民聲音, 咁係唔係代表你冇當我地係市民?

唔好意思今日係超簡化版

酸甜雞亦

2011年6月20日 下午01:25

唔知有幾多朋友仔估我今日都係出意粉 post 呢?

唔好講你地睇我個blog 會悶丫, 我自己煮都覺得悶

天氣咁鬼熱, 諗到入廚房對住個火都大鑊

最慘係做廚房一日10個鐘對住個大爐果d師傅

出面街都三十幾度, 何況廚房入面, 雖然我未試過入酒樓廚房

不過都估到有幾熱, 俾我都係做番客人, 俾錢食飯好過

lee 碟其實都好簡單, 一次過可以做十幾 隻都唔係咩問題

只係睇係有冇心機慢慢炸香, 炸到少少脆身

雞中亦同鉸剪打直一開二, 吸乾水份

上少少鹽, 再上薄薄既生粉同埋少少胡椒粉

中火炸到少少金黃色, 再轉大火炸多少少金黃色

拎起, 隔油, 攤到凍曬再大火番炸一次, 等佢脆身

之後可以放埋一邊唔洗理佢地, 攤到凍為止

今次 5隻雞亦, 用兩湯匙茄汁, 1/4湯匙0急汁, 少少美極, 少少七味粉

 開鑊, 落少少油, 鑊香蒜粒, 落0岩0岩溝好既汁, 爆一陣

落埋雞亦,  中火煎到收水乾身再落多少少七味粉就okay 架喇

冇咩難度, 係睇你有冇時間慢慢炸, 仲要咁熱先黎炸野.. 痴線!!

題外話

之前我都0係 blog 提過屋企有蛀衫蟲, 琴日谷鬼氣諗住拎d衫出黎搞搞佢

點知發現有兩支雞毛掃俾蛀衫蟲侵占左, 而且為數過百,

情況極之壞, 唯有硬住頭皮搬曬所有野出黎清洗

我就三個鐘不停0係個蜜室同佢地死過

而女皇就慘d, 不停用漂水洗野, 搞到隻手皮膚粗曬, 可慘喇

今次起左佢地個屋企, 希望短時間之內都唔會再出現啦  唉!!

蓄薯腩肉飯

2011年5月27日 上午10:51

今日到左簡單 星期 既最後一日, 亦都係最特別既一樣

一定一定一定要買超肥打邊爐果d 腩肉片

中火白鑊煎熟腩肉, 希望會出油, 留番一陣撈飯食

我用左紫心蓄薯, 蒸熟整爛, 撈落熱辣辣既白飯

再用少少蒜蓉辣椒醬, 生抽, 大量蔥花, 再落埋頭先d 豬油

完美既一碗飯, 咁就搞掂架喇..哈....

係唔係成個星期都好簡單呢?

唔知有幾多 blogger 跟住黎整呢?

如果有的話, 記得番黎講番有冇野需要改善喎

你知啦, 口味既野, 個個唔同, 希望0岩大家食啦

題外話

好耐之前睇飲食男女, 葉一南 講過

咩係無禮貌, 就係叫部長免茶送糖水

咩係勇氣, 就係去法國餐館叫人免茶送甜品

你地會有勇氣麻??  

而且仲要叫人打折 生日送甜品, 再 分成10張單黎簽咭, 為左要積分

我屋企就會有咁既情況發生喇

而且仲會成日同部長嘈, 又話d野食唔掂

又話要人送多碟餸, 仲不停鬧人

我同女皇見怪不怪, 所以一到星期六日最開心係留0係屋企

少不免都唔出去食飯, 廢事俾人認得出我, 下次冇得再去食

因為咁樣, 有好多間餐廳都唔會再去

主因係我老豆成日飲天d 屎水就發神經

酒, 識飲, 有節制就會令人放鬆

而冇節制就會令身邊人煩惱

聖水 同屎水都係 一線之差

所以我一宜以黎都好反對D人出去劈酒

又嘥錢, 又亂性, 又搞事.......

鍾意成班劈酒果d blogger 唔洗同我講有咩好處喇

我都係鍾意有節制既飲酒, 同埋唔想嘥酒

鮮蠔撈飯

2011年5月26日 上午11:05

雖然今個星期係講簡單野, 但係亦都會一日比一日難

而今次就用左急凍既蠔, 鮮凍後用生粉洗, 先可以洗得乾淨D

之後上少少生粉, 乾煎生蠔至全熟, 切粒

問鑊, 落少少蒜蓉, 少少薑蓉, 紅椒粒, 炒香, 落少少蠔油, 雞湯, 燴成杰身既汁

即可放入熱乎乎既白飯 撈黎食架喇

蠔就睇你大細啦, 你鍾意就多D囉, 好簡單, 好隨便就得架喇

鍾意食咩就落多D, 好似我咁, 鍾意食薑蓉就落左好多, 成碗都係薑味

題外話

無錯, 我食野係奄尖, 鍾意挑剔

最少我唔抵得好多人話一間餐廳有幾好食有幾出名

而去到都只係"楂流灘", 亦都可以話個人口味唔同既

但係有時d 野真係一食就知有冇用心去整

不過有時就算幾用心都好, 都未必係好食

就好似 港土茶記 咁...................

我同女皇兩丁友 星期日去試

叫左好多野番黎食, 食左 260蚊, 但係都唔覺滿足

又話d 叉燒有機, 又話 slow cook, 又話d 蛋係聽音樂

又話d 麵幾好食......又話個湯底幾濃, 又話個蛋撻幾咁好食

又話個茶幾好飲, 又話個 腐乳多士幾咁好食

又話個梅子骨幾好食............只係餐肉真係有少少特別

原來唔覺唔覺我俾左咁多機會 lee 間野

叉燒都係 再興 好食, 夠鬆夠化

蛋都係屋企好食, 最少燶邊, 同埋有蛋味, 蛋黃識流出黎, 睇黎隻雞唔鍾意d音樂

麵.................好似食橡筋咁.......冇麵粉味, 冇蛋味....好咩??

湯.....話煲足 8 個鐘先拎出黎. 真的話應該要煲 64 個鐘囉

梅子骨....算啦, 好唔掂

檸茶.......仲慘過檸水, 連檸檬味都冇, 似淨糖水

蛋撻係大火過頭, 酥皮未熟, 而且放得太耐, 個蛋散開, 完全冇蛋香

而個腐乳多士 就屋企整算啦, 細個都唔知食幾多啦我, 最少我整既多士係脆囉

唔好意思, 可能我未可以做到有機飲食

都係留番俾鍾意有機飲食既朋友去食啦

我都係食番唔健康既野算啦.............

鹹牛肉撈飯

2011年5月25日 上午10:26

睇睇下電視果時女皇話有一種味好耐都冇食過

係細路哥果時成日都會食既味, 仲話係吳君如0係電台教

原來只係鹹牛肉+蛋黃撈飯

不過我就事前煎香鹹牛肉 之後再落少少本菇 炒一陣

之後直接撈落0岩0岩煮好, 仲係好熱既飯

再打兩隻蛋黃落去.......基本上一碗飯要打兩隻

做到有少少汁既感覺先好食

鹹牛肉份量唔洗點講, 你可以煮好之後試味, 唔夠再落

大約 半儸細既鹹牛肉就夠 兩個人食架喇

係咪好簡單呢~~  冇呃你地架

題外話

今日既題外話其實唔係好題外話

反而想大家幫幫手做一個小統計

睇下大家既意見

我諗大家都有去開茶餐廳既習慣架啦

通常會叫d 咩丫, 來來去去都係 檸茶, 奶茶 果d

唔知你地有冇試過 凍檸廉呢??

即係 檸樂 既可樂變忌廉

一定要有冰, 同埋篤到d 檸檬爛曬, 搞到冇曬氣黎飲

lee 個係其中一杯, 而另一杯係

凍檸啡 - 一定要茶記沖好咖啡膽果d, 唔好揀即磨果隻

愈普通既咖啡就愈0岩架喇

檸啡其實係好耐之前成日都會聽到既飲品

不過唔知點解久而久之 變左好多做警察既人去蛇先飲既飲品

不過算啦, 反正都冇咩關係

事實上即係一杯凍咖啡 走奶 落檸檬  (最好少甜)

想大家俾兩日時間我, 真係試下覺得lee 兩杯野既感覺點?

但係要有心理準備, 因為宜家好多茶記既人都好唔專業

同埋比較上國內朋友多, 對本土茶記文化唔熟

會反問你係咩黎

仲有樣野好奇怪.!!!!

大家都知檸樂要加錢, 咁忌廉都要加係好正常姐

檸菜 加錢 都有少少唔正常架喇

唔講唔知, 好多間 檸啡 都會 加你兩蚊

次次叫黎飲果時我都火起!!!

奶茶, 檸茶之間既分別係 奶同 檸檬, 主要既係 茶

而

咖啡 同檸啡 之間都係 奶 同檸檬 既分別, 都係咖啡做主導

但係 就偏偏呃你錢 話要加你兩蚊!!

雖然我覺得好奇怪, 但係我都會叫黎飲

反而想知既係點解 奶茶 + 咖啡 就唔洗加錢!!

唔知大家明唔明我講咩~?

如果好彩有茶餐廳老闆有睇我個blog 的話

而且又知點解你地要加兩蚊的話, 真係講聲我知..

請起茶記既飲品, 其實我只係鍾意飲一樣

就係凍檸茶, 即係爆檸

10 間有 9 間既檸茶同檸水既味道差唔多一樣

糖水多過冰, 所以 我好多時會叫 凍檸茶"溶"既

希望佢可以半杯以上係茶, 先夠茶味

又或者 凍檸茶 走甜

之後再自己落砂糖, 較0岩自己鍾意既甜味

講番轉頭先, 頭先講過 凍檸廉 同埋 凍檸啡

希望大家食晏有機會試下

之後話番俾我知我既口味係唔係好奇怪

最多都係俾我呃你兩杯野飲姐, 試下啦, 冇死既

孜然粉焗豬寸骨

2011年5月24日 上午10:32

都講過今個星期係簡單星期, 乜都係簡單煮法

今次就講下好抵食既豬吋骨啦

0係街市買 廿幾條 都係 42蚊, 抵到震

啖啖肉, 又香口, 不過唔知拎黎炆好唔好食呢

比我揀, 都係會拎去焗, 好食好多

好簡單, 我焗 7 條, 用左 兩茶匙孜然粉, 一茶匙辣椒粉, 一茶匙黑椒, 一茶匙美極

放入保鮮袋入雪櫃醃 足一日, 大火煎香表面, 放入焗爐 180度 焗 20分鐘

轉250度焗 5分鐘, 就搞掂架喇

最少要醃足一日先好拎去焗, 先會入味架

如果唔係就要落重少少味再拎去焗, 不過少d 香料好d..

題外話

唔知大家覺唔覺, 一個有講有笑既屋企好難再0係香港搵到

就算成家人十幾個出黎都好難, 莫講表叔伯, 連表第都唔會點搵

十幾個出黎食飯都好政治飯局, 好難得會見到過時過節 廿幾三十人

仲要開懷大笑, 冇白眼, 冇事非

我屋企本身都好以搵親戚, 黎黎去去都係搵亞媽果邊

而老豆果邊就一個都冇再搵, 出親黎食飯都係最多 十幾人

同埋再講宜家香港好奇怪, 好少屋企會真係識笑

好多屋企都唔知有幾耐冇真係笑過

都唔知幾時開始出現咁既現象, 唔知係人口過多定係番工辛苦

番到屋企好多時仲慘過番工咁, 番到屋企唔早D是但食完訓

想搵個人陪自己玩下都難, 唔係對住電腦就電話

完全唔會識得同其他細路出街玩

宜家香港  lee個社會其實仲0岩唔0岩我地住落去呢??

好多唔同國籍既人都好恨黎香港定居

我地唔係唔歡迎你地

但係你黎得香港, 人地既地方

係唔係應該諗下點同大家生活, 而唔係同番自己國家既態度呢?

你地lee d同入侵冇分別,

我地香港人都冇得拎公屋啦, 日做夜做, 成隻狗咁

但係就要養一班唔做野, 只係識拎錢既人

公屋又要拎, 6000蚊又要拎, 又要講公平

你地有冇 諗過對我地幾唔公平呀

我地連公屋都拎唔到呀, 仲講買樓

成個香港俾曬你地好唔好?

我覺得係我地香港人鍾意拐冇野咋

如果唔係你地班友仔都幾大鑊!!!

換番轉丫, 我地去你地既國家住, 可能一早俾你地班友打死

等你地仲咁開人打開隻手拎錢, 又話讀書

仲要香港人好衰唔俾機會你地做野

你地咁叻仔就番自己國家啦, 洗鬼0係香港問政府拎錢咩

就連各大公屋樓下既遊樂場都俾你地用曬

搞到香港土炮都唔敢落街玩

我唔知政府係唔係真係明白香港係咩社會

但係我只係知道大粒佬只係為左唔"咩"鑊而唔做野

睇唔出有幾多個係真心熱愛香港

你地粉腸推多幾幅地就話可以令樓價低d

話收番d 舊樓番黎就可以 多d人上車

食屎啦!!  如果係賣 3000蚊呎就話姐

大佬呀, 萬幾蚊一呎, 7 成實用

700 萬買番黎供一世, 都唔夠公屋大

為左搵間屋住下姐, 估唔到要為左地產商打一世工

咩世界丫你話, 成日話小政府大市場

根本係你地俾班商家佬打劫!!

如果要香港變番做一個開心既社會

第一樣要做既係起番公屋居屋!!

咁就好多人都唔洗俾為左供樓而打工

而真正有番自己生活, 享受一下自己既時間!!

鹹牛肉即食麵

2011年5月23日 上午10:20

上個 post 咪話做去一田見 Daphne 既~

佢講到話我個blog 煮d 野太煩, 覺得我有時可以簡單d

等多d朋友可以跟住個 idea 黎煮, 重要係一定要材料簡單, 少步驟

所以 今個星期 煮既野 好簡單, 應該有一樣0岩你地食

lee 個簡單到我都冇野想講.......

只係炒香d 鹹牛肉放落個湯, 同埋落一隻蛋黃撈埋黎食, 落少少芝麻

係咪好簡單呢, 簡單到我都唔係好敢講出黎俾大家知.哈

題外話

上星期Sogo 第一日感謝日, 太多人, 超市買唔到d 咩

反而0係 孖人牌 買左 人生第一把刀

好抵, 一 套 1313.2 蚊, 有一把 7吋刀, 罐頭匙, 剪刀, 生果刀

真係好抵, 如果散買應該大約要 2300 蚊左右

而且 之前 李錦記果度有 500蚊Sogo 俾我用,

所以都係 813.2 蚊, 真係抵到爛!!!!

買左幾日, 好奇怪......

本身我自己都用開孖人牌既 8 吋刀

lee 把唔係我買, 係本身屋企用左 十幾廿年

唔知點解你叫我用新果把就好唔捨得用

都唔係咩貴野, 只係 1000蚊 左 右既一把刀

又唔係咩 6千幾 7 千蚊果d..................

我好怕自己用得唔好會用壞把刀

唔知你地會唔會好似我咁諗架呢~

涼拌小吃

2011年5月18日 上午10:08

本身lee 個就唔係咁細碟既, 不過影相靚少少, 於是拎左少少出黎影

lee 碟野熱食凍食都得, 所以整多少少都唔怕

整法又係好簡單, 準備甘荀, 西芹, 木耳切絲, 鍾意落埋豆乾又得

所有野都汆一汆水, 再白鑊先爆香木耳再落少少油爆香甘荀

甘荀同木耳可以爆香dd, 因為佢地都好受火, 讚酒

之後再落薑蓉同埋蒜蓉炒一陣, 最後落西芹

用少少雞湯同埋蠔油, 最後打少少茨同埋落少少麻油

食果時可以落少少芝麻, 會香口好多

題外話

今日再講下讀書既野先

好耐之前0係屋企無聊, 亞媽叫我搵我學

於是我上網 click click 下, 見到工聯會有催眠課程玩

當然, 就算我當時再無知都好, 都知催眠係專業既科目

而工聯會就俾唔到lee 個信心我

於是再睇下, 原來坊間有好多催眠課程, 例如中大浸大都有

仲有NLP有催眠讀, 但係我就搵左另一間專係教催眠既細細間公司學

好搞笑架, 要interview 先可以入去讀架

隔晚上一日堂, 一上就年幾時間

雖然都係一樣未畢業就冇讀, 但係我都學識左好多lee 方面既知識

期後因為對心理學上有少少認識同埋興趣, 所以去讀心理學既課程

讀多兩年, 亦都一樣半途而廢....

好搞笑, 果時上堂要實習, 同埋要番屋企搵朋友幫手做功課

但係好可惜個個都係笑我既心態, 唔覺得我係認真對lee 件事

可能本身我份人都唔係咁認真, 所以覺得我玩玩下

冇所謂啦, 反正我已經得到我想要既野, 交到功課就算

到期後, 因為lee 個課程, 令到我好多時諗野既方法都用同一個方法

令到我0係文字同語氣上既改善, 變得有信心

面對陌生人唔會咁怕羞, 雖然冇完成課程

但係我都好有得著, 最少我屋企最多既書係關於催眠

之後先到飲食既書, 可想而知我對催眠既火其實未熄滅 哈!!

腐乳蒸排骨

2011年5月17日 上午09:41

真係好耐都冇煮過中式既野, 所以好多人都以為我煮只係識煮西式野

其實只係平時 weekdays 亞媽都係煮中式家庭式野, 所以自己煮就要搵d新意

唔好星期六二人世界果時都係食平時食開既野, 亦都所以平時同女皇出去食飯大多數

都唔會係中式野, 會食西式野多, 同埋鍾意地方夠舒服, 0岩三兩個朋友吹水

愈講愈遠, 講番碟野先.....

其實好簡單, 只係拎左幾尊腐乳, 蒜蓉, 糖, 酒, 麻油, 水, 生粉, 胡椒粉 醃左d 排骨,

碟底放左d粉絲, 大火隔水蒸 8分鐘就搞掂, 都唔洗多講, 簡簡單單

醃定d野, 放工番屋企就可以落鑊, 好快手

題外話

唔知大家 update左 angry birds rio 未呢??

我玩到停唔到手, 只係差一關就全部 3粒星, 同埋差一個西瓜

就係lee 隻 game搞到我玩得太夜, 訓得好少, 所以琴日唔 update

不過我玩 angry birds 其實都幾叻架, 玩兩晚就可以玩曬

我會好專心睇下每一隻雞同每一個磚之間有冇咩關係

最重要係搵0岩個方向, 有時有d 關卡 係要用最少雞搞掂佢地

有時係用埋所有雞都冇問題, 最重要係清曬d磚, 務求最高分

最難玩係有時每一隻雞既角度都要好準確, 少少唔同, 就會令個破壞力唔同

所以好難每一隻雞都咁穩定出手, 一定會有唔同

所以呢..............我又有排等喇........玩咁叻把鬼咩..

又唔見讀書咁叻, 玩雀有鬼用咩.......

蕃茄餐肉炒飯 配溫泉蛋

2011年3月28日 上午11:45

星期六冇咩心機去買餸煮飯, 只好睇下屋企雪櫃有咩好食...........
蛋兩隻....餐肉...蕃茄仔......即煮個飯, 炒埋一齊....
不過 我都有用過下心思架.......
例如冇冷飯, 所以要用少DD 水去煮硬dd
一半餐肉切粒, 一半整碎
超多蔥白
蛋白先炒好, 蛋萎後用
蕃茄一半 打汁, 放炒飯
仲有多得廚男既介紹, 我先識整溫泉蛋
不過我都用左 12隻先成功
用屋企個 0.5L 既 保溫壺 放 82度水
再放0岩0岩雪櫃拎出黎既蛋, 焗 20分鐘


不過我覺得唔可以盡信, 因為原來好多條件要考慮
我試過 70度水, 雪蛋, 90mins 都未得
原來隻蛋令d 水降溫到 60度
我又試過 75度水 兩隻蛋 45分鐘
都係唔得, 原來都係因為隻夕令d水變凍
所以我計過, 82度, 20分鐘, 對我黎講係0岩0岩好








題外話
家中十五歲的小狗昨天離我地而去, 我們一家人會掛念著你的...
下世投胎到一注好人家吧.......請安息...

鮮‧辣‧牛小排

2011年3月01日 上午11:10

終於都到我玩喇.........

李錦記果邊話我可以獲邀優先參加「譜出健康新滋味，李錦記Blogger大激鬥」

其中我就煮左 三碟餸出黎, 再揀其中一碟

我知今次如果入到決賽同埋羸埋冠軍的話就可以獨得 10,000 蚊 超市券及獎品

你地唔好以為係得幾個人參加喎, 我地只係為左個網頁有d野睇 而比你地早玩架咋

不過有少少條件要先可以參加

1) 要用李錦記既產品

2) 主題係健康、創新同Fusion

3) 三月二十七日前上載食譜

4) 要有埋步驟 同埋 準確既份量

大家都黎玩下啦, 冇死架, 試下咋麻........

如果想多d機會 / 分數 的話, 就係叫大家身邊既朋友 去李錦記個 網頁

投票支持, 愈多人投票, 分數就愈高,

唔好以為投票只會益人, 對自己冇好處喎....

李錦記仲話 頭 500個投票既朋友

仲有機會拎到 「李錦記米芝蓮名廚自家煮秘笈別注版」一本

如果係真的話, 你都咪話唔著數..........

簡單投個票, 入個會, 填少少個人資料就有, 我都叫女皇做馬投左我一票

因為我都想要番一本, 唔好蝕丫麻...

而大家想投票的話可以到以下既網址

http://blogger.lkk.com/vote.php?recipe_id=14

老老實實, 真係幫幫手投票...

投票由即日至4月9日截止！

我就算係輸都想輸得好睇d, 唔好差人太多丫麻.....

講番我參加比賽果碟野先.....

材料：
美國牛小排 150g (切丁)
露荀 (幼) 20g (切段)
白菌 20g (切片)
甘荀 40g (20g 切條, 20g 切片)
大葉 5-6片
蒜片 1粒
欖油 1.5茶匙 (7.5ml)

醬料：
李錦記蝦醬 1/4茶匙 (1.25ml)
李錦記咖哩醬 1茶匙 (5ml)
李錦記生抽 1/4茶匙 (1.25ml)
李錦記麻油 數滴

步驟：1. 甘荀, 露荀汆水備用
2. 白鑊炒香蝦醬咖哩醬備用
3. 落欖油慢火炸蒜片至金黃香脆
4. 用先前炸蒜的油爆香白菌備用
5. 白鑊大火煎香牛小排至稍為變色 (大約30秒)
6. 落先前的蝦醬咖哩醬大火快炒 (大約30秒)
7. 鑊邊落生抽再大火快炒 (大約30秒), 落麻油及甘荀片炒一會
8. 最後落先前炸好的蒜片即可上碟
9. 於同一隻鑊大火快炒甘荀露荀條 (約10數秒)即可上碟

特別心得：1. 可用大葉包著甘荀露荀同食
2. 牛肉選擇較多油花
3. 蒜片越薄越平均越好
4. 大葉可在日式超市購買
5. 嗜辣的可加半隻指天椒

如果大家覺得簡單又易整, 仲要好好食的話
記得投我一票........多謝支持!!!
冇你地既一票, 我會輸得好慘架...
http://blogger.lkk.com/vote.php?recipe_id=14     <-------快d入去幫手投票喇



說實話......我覺得真係好鬼好食
蝦醬既鹹鮮, 咖哩既淡淡香辣...食落口個感覺好複雜....
食果時再加埋日本大葉食, 又可以減低牛既肥膩感覺





丫, 仲有呀, 差d唔記得, 李錦記都有佢自己既 facebook page 架
得閒可以去讚好喎...
http://www.lkk.com/fb

牛肉煲仔飯

2010年12月03日 上午10:34

今日開始 感覺 冬天既來臨喇 !!!!!!!!!!!
又係我最鍾意既天氣..!!!!!!
人都開心d!!!!!!
同大家跟進番 我個 iphone 大計先...
我前日諗4入去 出機果時
個哥哥同我講 " 你咁樣好唔抵喎, 要由下個月開始俾新月費喎"
我先知道原來我一直一直都冇問到既問題, 就係令到我出唔到機既問題
計計數先..... (以下既數字我唔太100% 記得)
宜家仲有 10個月先完合約
我本身 (268 +25 +12)*10 =3,050蚊 未俾既月費
但係宜家要我 轉去 最貴果個plan, 即係 (419+38)*10 =4,570
足足多出 1,520 蚊, 唔好唔記得我仲要再簽多兩年喎.....
再講丫, 都唔知出年咩世界啦, 話唔定 200蚊 無限數據用量 呢......
仲有, 個哥哥 叫我不如出一個新 number, 會抵好多...
我又唔明有幾抵喇.
又計計數先...
換句話說即係  每個月要俾 以上兩條數加埋既金額 = 7,620
都仲未計打後既日子喎.........
你就真係好抵喇.......我彩你都有味!!


又講下丫, 其實我要 3G 既台都冇咩用
我又唔見得 HSDPA 0係電話有幾快呀.
我之前用過 Peoples 都幾唔錯架
真係拍得住 HSDPA 所講既速度架
同埋 如果0係 Peoples出新 number
月費仲平好多添, 冇記錯都係 98蚊一個月咋麻
仲要係無限數據果隻喎
如果出 iphone 16G的話


Peoples :  4888+(98*24)= 7,240   i.e. HK$301 一個月
而
123 : 419+38*24= 10,968  i.e HK$457一個月


換句話說平左156蚊一個月喎!!!!
如果係出新 Number 我都0係 peoples 出啦, 平咁多...
都傻傻地既佢地~~


同埋呀, 我想0係  123 出機係因為唔想拎錢出黎咋麻
宜家咁講的話, 的洗鬼出新Number 咩,
我唔好自己上網買機, 都有病 既佢地...
自己買機又唔洗有新number , 又唔洗簽約
計番keep 住用宜家既 plan 24個月的話 , 再 加埋 iphone 錢, 都係 509蚊一個月
都平過我出新 number 丫!!!  都唔明 123 果個哥哥叫我出 新 number 有咩咁抵.....
你地話係唔係丫!!!???




材料
和牛                      200 g
飯
老抽                      一湯匙
生抽                      半湯匙
紹興酒                  一茶匙
糖                          一茶匙
薑絲                      幾塊
蔥段                       幾條




做法
1) 牛肉放入生抽老抽, 糖, 紹興酒 及 100ml 既水拌勻醃 兩小時
2) 再放大量薑絲同醃半小時
3) 煲飯, 待飯成型之後放入牛肉, 薑絲 及蔥段蓋上蓋焗 10分鐘左右 即可


食時加上生抽 / 煲仔飯豉油


如果用瓦煲的話可以睇番
http://hk.myblog.yahoo.com/speedkung/article?mid=3910


如果係用電飯煲的話, 用平時一樣就okay 架喇














東主有喜' facebook page   <-------Click here
東主有喜's 微博                 <------Click here

XO醬南瓜飯

2010年11月02日 上午10:17

唉呀~~~~~~~
個日生左粒飛茲.....個幾星期都未好番呀.....
仲要之前去左打邊爐.......仲痛多兩錢重......
搞到食咩都要慢慢食, 講野都慢好多......
有冇人有咩方法快d搞掂粒野~~








材料 (二人份)
南瓜粒               100g
洋蔥條               1/4個
肉碎                   100g
蒜蓉                   半粒
XO醬
蠔油
頭抽








做法
1) 豬肉先用少少生抽同 凍滾水 醃半小時
2) 蒜蓉起鑊, 爆香肉碎, 讚酒, 落南瓜, 洋蔥, 再炒至軟身, 備用
3) 煮飯 至 9 成熟, 放入先前炒好既南瓜, 煮一陣
4) 落蠔油, 頭抽, XO醬 撈起即可












題外話
覺唔覺人愈大愈多野唔順利?
好似做乜都唔俾咁
0岩0岩有個朋友話屋企人support 去 外國讀書.
讀得到當然讀啦
我屋企人果時係咁叫我去讀,
話俾埋錢我洗我都唔去
個個都話因為我唔捨得香港, 唔捨得d朋友
我一直咁耐都冇回應過
其實唔去係因為我知道我過左去都係讀唔成書番黎
到時咪仲嘥錢......
根本我就唔係一個會乖乖讀書考試既人
而且我係一個極之反對考試既人!!!
奈何, 世界就係 需要 考試........
世界就係需要讀書既証明
你一日唔拎証明, 一日都係咁難行
好喇, 到左今日 26歲既我
雖然會講讀書既重要
但係我都係唔會去讀書考試
我覺得讀書為左畢業好唔過癮囉..
當然, 又有D人會講, 你辛苦幾年就有排你過癮啦
但係可惜我連lee 幾年都過唔到呢..
最好既係, 我會好提議人地去讀書去學野
反之我就坐0係度 發 mo....哈哈
唔通lee d 就係 得把口?

南瓜肉碎粥

2010年11月01日 下午12:01

琴日係 萬聖節, 所以我會一連 4 日 都出 南瓜既食物
其實唔只 4樣架, 不過我同女皇都冇時間, 所以只係煮左 4樣
今日第一樣係 南瓜粥, 你地見到 lee 張相
係今朝一早起身 影架, 琴日煲落米
今朝快快日日有得食, 唔錯唔錯
我仲用左 小菲菲俠 好耐之前教既方法整
我諗都唔洗點教架喇
因為煲粥lee 樣野真係我諗大部份既人都識
如果唔識的話, 我都係咁易講下啦
1) 小小米就可以煲粥, 唔好平時煮飯咁多米, 1/5 就差唔多
2) 可以落一半雞湯去煲
3) 南瓜多d都唔係問題
4) 可以訓前煲滾放入保溫煲, 起身再加少少水煲一陣就食得
5) 肉碎可以醃耐d, 同埋可以落少少鹽去醃, 唔好用咁多豉油
6) 如果係明火煲, 記得要用一個大煲 既煲, 如果唔係會彈到周圍都係
7) 可以落兩粒乾搖柱, 好食好多
8) 個人意見, 如果有大孖盆曬鹽就用啦, 好食好多架


聽 日再黎南瓜南瓜...南瓜.......
我如女皇聽到南瓜都有d驚驚地...

梅菜煮豆角

2010年9月30日 上午11:11

話咁快又 假期喇......
我0係度諗緊星期六煮咩好....有冇意見~~?




材料 (二人份)
肉豆             半斤
甜梅菜         兩條    (切碎)
糖                 一湯匙左右
油                 少少
老抽             半湯匙
麻油              少少
蒜蓉              半粒
鹹魚蓉          半湯匙左右   (可以用樽裝)
指天椒          半隻
滾水              50ml 左右




做法
1) 先白鑊炒至梅菜乾身再讚少少酒, 拎起備用
2) 爆香 鹹魚, 辣椒, 蒜蓉,  梅菜回鑊, 再落肉豆 炒一陣
3) 落滾水, 老抽, 糖, 蓋上蓋中火煮 3分鐘左右
4) 試味, 鹹就落糖, 再落少少麻油 搞掂........






Tips
主角雖然係梅菜, 但係梅菜咁鹹點食呀
最好就係事前用水浸 幾個鐘就拎出黎用喇




lee 個餸本身係偏鹹少少架
如果係的話, 可以鹹少d 梅菜, 同埋 落多少少水丫..