親子丼 (滑蛋雞肉飯)

青口蒸蛋

2011年7月06日 下午02:34

今日真係熱到痴肺, 你地知我人肥怕熱, 行兩步就出曬汗

仲話要出街做野, 行黎行去, 人都乾..番到公司冷氣又唔夠, 攞命!!!!

幾隻青口搣毛洗乾淨汆水

用 一份凍滾水一份蛋 再落少少魚露同埋蟹柳 包保鮮紙隔水細火蒸 7分鐘

熄火焗 5分鐘就可以食得架喇, 如果想香口d, 可以好似我咁落少少 蕃鬼佬芫茜架

題外話

琴晚同女皇去 director's club 睇 變型金剛

係就係幾好睇既, 大部份時間都係打多, 而個女主角冇上兩集咁好

都係行行企企, 唔似之前咁有活力, 而文仔佢地都冇咁有型

再講, 登登 同埋 敵敵 都死左, 咁仲會唔會有第四集呢??

同埋以前元老級既 機械人都冇出現, 變成 大部份機械人都係車既變車

我覺得開始冇咩新意, 如果鍾意睇佢地打的話, 真係好吸引, 冇悶場

每一分鐘都好有攝力, 但係故事性不足, 同埋過份人類認知化

唔知你地睇左未呢??  未睇快d去睇啦, 其實幾好睇架!!

蕃茄餐肉炒飯 配溫泉蛋

2011年3月28日 上午11:45

星期六冇咩心機去買餸煮飯, 只好睇下屋企雪櫃有咩好食...........
蛋兩隻....餐肉...蕃茄仔......即煮個飯, 炒埋一齊....
不過 我都有用過下心思架.......
例如冇冷飯, 所以要用少DD 水去煮硬dd
一半餐肉切粒, 一半整碎
超多蔥白
蛋白先炒好, 蛋萎後用
蕃茄一半 打汁, 放炒飯
仲有多得廚男既介紹, 我先識整溫泉蛋
不過我都用左 12隻先成功
用屋企個 0.5L 既 保溫壺 放 82度水
再放0岩0岩雪櫃拎出黎既蛋, 焗 20分鐘


不過我覺得唔可以盡信, 因為原來好多條件要考慮
我試過 70度水, 雪蛋, 90mins 都未得
原來隻蛋令d 水降溫到 60度
我又試過 75度水 兩隻蛋 45分鐘
都係唔得, 原來都係因為隻夕令d水變凍
所以我計過, 82度, 20分鐘, 對我黎講係0岩0岩好








題外話
家中十五歲的小狗昨天離我地而去, 我們一家人會掛念著你的...
下世投胎到一注好人家吧.......請安息...

焗火腿雞蛋吐司

2011年3月21日 下午12:22

嘩, 今日出門口之前睇下電視話 20 至 26度
我都覺得有咩野.....點知出門口見到個地下濕到水塘咁
都覺得冇咩野.......咁好啦, 要出街做野影相
0係地鐵度都覺得冇咩野....一出去就覺得個人好似去左泰國咁
熱到呢......!!!!!  之後仲要不停咁行........行兩步就出曬汗
本身我既性格, 外表, 說話 都一樣咁 cool....
我最怕就係俾熱情溶化我
就好似一條雪條拎左去泰國街頭咁, 好快就謝皮......
冬天請不要離開我.......我會行傷感的哦...!!


之前睇一個blog 介紹一個多士
我覺得真係好正, 特別要同大家分享
人地係心型, 我就圓型....
人地用沙律醬, 我就用芝士...
焗既時間一樣...有興趣既朋友可以試下喎
蛋又滑, 又有糖心感覺, 又有流黃既感覺.....蛋白又似溫泉蛋咁..好正!!



當然我冇人地影得咁靚啦....
我邊有咁多心機慢慢 set 好個情景 再影丫
都唔知幾想快d食左佢落肚.....
http://www.wretch.cc/blog/mitong/22958458     <-----我就係copy lee 個 post 架喇

蛋撈意粉

2011年3月09日 上午10:54

其實lee 碟係半失敗作品...............
因為我對溫泉蛋既做法唔清楚
只係大約知點整......
但係就諗得唔全面
冇諗過隻蛋既大細, 溫度, 開火煲水, 定係再放水恆溫
仲有應該用咩煲去整..............
所有問題我都唔識答
所以令到隻蛋失敗左.....
不過雖然係 失敗, 但係都只係失敗左少少
佢都仲有80% 既蛋白係流質, 仲有 50% 既蛋黃係流出黎
同埋好胗我用既係走地雞 既蛋
蛋黃好大隻好香, 所以未冇話 完全失敗...哈哈
糖心蛋就易整........溫泉蛋真係考起我....
不過我星期六會買一打蛋番屋企慢慢試
有結果話俾大家知....


我都講下我個意粉既做法先啦......
其實都幾好食架...
用左鼠尾草起鑊, 爆香煙肉, 同埋炒茄子粒
再落洋蔥爆香一陣..落煮好 8成熟既意粉炒
炒好一半之後再落多少少鑊尾油...再落鹽同黑椒
最後落 parsley 碎就搞掂喇....




其實我好失望.......以為自己可以整左溫泉蛋....
點知一打出黎個黃實左少少......
而我既溫泉蛋做法係 恆溫 65-68 度水浸 25分鐘

煎蛋餅

2011年3月04日 上午10:40

我都開始覺得我煮出黎既野個名真係好行貨
唔係我冇用心諗過, 而係我覺得我諗完出黎個名都唔好聽
所以放棄左, 如果要作的話, 的覺得直接d算喇
反正我都係想同大家分享個做法


其實lee 碟野我覺得可以叫做意式煎蛋餅
好似好聽dd, 不過我覺得我都唔知意式蛋餅係唔係真係咁整
如果唔係的話, 俾人笑都似~~~


開平底鑊, 中火, 落少少油, 炒香煙肉,
之後落茄子粒一齊炒, 炒夕一陣之後落洋蔥粒(超細粒)
炒到變左少少透明, 再落洋蔥條, 炒一陣
因為洋蔥好奇怪, 要炒得耐先會香甜
但係又會冇左爽脆既感覺
所以我一半係粒粒一半係條
想有洋蔥既甜又有洋蔥既脆......
之後打兩隻蛋, 平均細火慢慢煎, 再落少少parsley 碎
不停將蛋汁向外流
煮到9成熟就可以上碟
記住唔會反呀, 因為唔靚仔架喇
同埋如果好似我咁冇咩技術的話, 就唔好反喇, 好易衰架
再講, lee個蛋餅最好就係個底甘香, 上面就香滑...
係唔係好簡單呢~~~~~
如果煎得靚的話, 可以有少少食 pizza 既感覺架~~~

日式滑蛋牛肉

2010年11月24日 上午10:13

lee 個飯有少少失敗左...
原因係 我太多牛肉......而屋企又得兩隻蛋......真係 R 曬頭...
不過放心, 我打 blog 果時會 改番少少份量
唔會搞到出黎成碗都係牛肉, d 蛋又失蹤


材料 (二人份)
肥牛              半磅
蛋                  四隻
洋蔥絲          半個
日本豉油      三湯匙
味琳              兩湯匙
糖                  兩湯匙
水                   300ml
蒜片                一粒


做法
1) 爆香洋蔥同埋蒜片, 落豉油, 味琳, 糖, 水, 煮一陣
2) 落 牛肉 煮至半熟, 拎起蒜片唔要, 之後直接放發打好既蛋入鑊, 細火唔好理佢
3) 放上飯面, 搞掂, 食果時落七味粉同埋芝麻




東主有喜' facebook page   <-------Click here
東主有喜's 微博                 <------Click here

蕃茄雞肉菠菜蛋卷

2010年11月22日 上午09:59

煮lee 個真係用左我好多心機時間先整到出黎
又要準備好多野, 又要分開唔同既方法煮, 又要放慢手腳
仲有個蕃茄醬都係自己煮出黎, 真係煮到人都癲


材料  (兩條)
蛋                兩隻
雞柳            兩條
菠菜            二兩 左右
蕃茄           一個
紅酒            兩湯匙
水                 300ml 左右
蒜蓉              一粒
生抽              一茶匙


做法
1) 雞柳一開二用生抽 和 油醃最少 3個鐘
2) 發打蛋隻, 細火煎成蛋皮 備用
3) 蕃茄切丁, 落水落紅酒, 細火煮成蓉, 落糖調味 備用
4) 雞柳中火煎至半熟, 拎起切成絲
5) 回鑊, 與蕃茄 同炒至 掛汁, 落黑椒
6) 蒜蓉炒菠菜至半熟 備用
7) 將雞肉 及菠菜用蛋皮卷成, 生粉水封口
8) 回鑊, 落少少酒, 中細火煎蛋卷, 封口向底, 切件即成




題外話
自從互聯網開始人與人之間就有更多的接觸
世界也拉得更近, 相處樂觀還好
反之會出現更多的問題,
又例如一個面書可以令你找回多年前失去聯絡的好友
但而書亦都可以令你跟朋友反目
亦會吸引更多的私癮 問題, 是非亦然
一個互聯網可以令好多唔識既人走埋一齊
可以識到好多0岩傾既朋友,
可以識到好多 本身好難去認識既事物
但係到宜家只係 click 兩click 就可以 即時搵到
而且更比教科書更詳盡, 犀利之極
又講下 食物丫
自從有左 有互聯網之後既電腦
再加上輕便既數碼相機, 個個都即時成為食評家
食個 薯條又可以講 100字, 食個不知所謂既茶餐廳又可以講一大餐
就係咁, 先會令到咁多人0係 開飯 入面有份幫手推出咁多垃圾冠軍餐廳
如果唔係一個開飯, 點會有咁多人識搵食丫
自問我唔係一個食家, 亦都唔係咩識食既人
但係我一定係一個有要求既食客
我會用好多唔同既方向睇一間餐廳
宜家好流行 "性價比"
我就係會用lee 一個方法去做比較
唔會同 唔同級數既 作比較
但係可惜社會上出現好多比較街坊既朋友
冇去深入了解 就好快讚好
冇去比試其他餐廳就讚好
只會出現兩個情況
1) 只會有更多冇要求既人去食完讚好
2) 有要求既人食完會話覺得比人呃, 冇開飯d 人講得咁好


你地又俾 開飯既 食評 呃過幾多次~?!












0岩0岩0係 facebook 開左個 page, 希望大家入黎 "like" 啦
東主有喜' facebook page   <-------Click here
同埋我亦都諗住開始玩 微博, 大家可以關注我, 睇我平時做緊乜丫
東主有喜's 微博                 <------Click here


宜家冇咩人 關注 同埋 like 架咋
有你地支持, 我會有更多既動力

豆腐肉碎蒸蛋

lee 個蒸蛋唔好睇佢唔得滑溜 就唔好食
就係因為要佢唔滑先夠好食
要中大火蒸得老身d先好食
食得出豆腐 既滑, 蛋既香
不過都要買d 有蛋香既蛋同埋有豆香又滑既豆腐先得
我今日用左 鴨蛋 代替雞蛋
0係 city super 果間 豆腐鋪買 左 盒細既 豆腐


材料 (二人份)
鴨蛋              三隻
豆腐              一盒細
肉碎             二兩 左右
蔥花              少量
雞湯              50ml


做法
1) 肉碎先炒香備用, 豆腐切丁
2) 拌勻所有材料,  放入比較高身既碟, 中大火蒸  7分鐘
3) 最好讚上熟油少少豉油 即可




tips
鴨蛋都唔平架, 應該要 兩蚊一隻
唔怕膽固醇, 可以減少一隻鴨蛋, 落 四隻鵪春蛋, 蛋香味仲勁..

洋蔥炒滑蛋

2010年6月21日 上午11:59

同一味餸, 唔同人煮出黎一定會唔一樣
就算同埋一樣既方法都好, 都會食得出有唔同
而且每一個人既先後次序都有唔同
時間火路上亦都有唔同.
但係點樣先可以成功煮好一碟煮
點樣先可以 見雪櫃有乜煮乜呢
咁就要用個腦記住好多野喇
見到有0岩既食譜你可以留起佢
但係唔好跟住煮
睇見電視講咩都好, 唔好理咁多, 記住先...
將來一定有用.....而且最重要係記得D Tips同埋 個原理
到有需要既時候就可以拎番d 理論出黎實踐
久而久之就可以一拎上手就知用咩
冇錯, 要你一次過 記底咁多野係有難度
但係只要你好多野都試過煮/ 食 就會知道應該點記架喇
其實煮野食煮得好, 就好似變到 係你既本能一樣就okay 架喇
唔好下下 跟足人地個食譜去煮, 咁樣係唔會有進步架
再講丫, 點都唔可以 copy 到人地人樣樣架啦
你大約睇完人地點煮就算啦
我一向都唔鍾意整甜野, 係因為我唔鍾意跟人地份量
次次都失敗, 次次都用自己方法做出黎
不過, 亦都因為咁, 我失敗過幾次,
我先可以知道個焗爐既特性, d 粉既特性
知道 糖同蛋, 多少會有咩影響
知道個次序應該係點, 錯左會有咩結果...
盲目跟從唔係唔好, 一定可以放入口添
不過就學唔到野囉
我鍾意儲好多食譜, 但係最搞笑係我一次都冇跟過
煮野食"萬變不離其中" 架啦....."一里通不理明" 架麻


唔好意思呀, 要大家聽我d 廢話...




講咁多野都未講到個蛋點煮...
係因為香港實在有太多人唔識點整滑蛋出黎
搞到我有感而發咋麻..


記住下面既野先.....
1) 炒蛋記住唔好落鹽, 你可以落魚露 / 生抽
    同埋可以落少少胡椒粉, 少少中國油同埋 油
2) d 料要先爆香攤凍先好撈埋
3) 炒蛋要落多多蔥花
4) 需要保留少少蛋汁唔好落鑊, 等炒完一次之後再落
5) 份量方面好似我咁, 我買左個細既洋蔥, 兩條蔥, 同埋三隻蛋
   你自己可以就下d 份量....
6) 最好用中式鑊炒滑蛋




有左基本概念就可以 落手炒喇
其實都唔可以叫做炒, 在我黎講
應該叫做洋蔥推滑蛋
炒蛋會令到d 蛋好老身.....
但係如果同個鑊鏟慢慢推出黎d 蛋會滑身好多
而且先可以做到一條條既感覺, 而唔係一舊舊實的的咁
中火燒好隻鑊就可以落完油. 以我既份量, 我落左 一湯匙既油
不過都要睇下你果隻咩鑊, 同埋要睇下d 蛋受唔受油...
之後就落一早搞拌好既 洋蔥蛋汁 一次過落鑊
記住之前話留番少少蛋汁一陣用, 大約 半隻蛋既份量啦
可以預先用另一隻碗裝起先......
d 蛋落左鑊就用細火, 個鑊鏟就由中間推出去
將左右兩邊推入黎, 再中間推出去, 重複 5 次左右
應該就差唔多成型架喇 lee 個時候, 應該仲覺得好滑既感覺
仲未夠架..!! 開中大火, 落埋頭先另外裝起果d 蛋汁
再推多幾下, 之後幫佢做型, 做型既意思係幫佢固定
如果唔係會令到d 未100% 熟曬既蛋分開


大約就係咁喇...




講左咁耐, 我都有d唔係好明自己講咩.......希望你地明啦.....

蕃茄蛋豬扒

2010年4月12日 下午12:30
蕃茄蛋豬扒


一個簡單開胃既餸

買左 20蚊有骨豬扒, 15蚊蕃茄 同埋兩隻蛋


1) 用生抽老抽糖生粉油胡椒粉醃豬扒 30分鐘
2) 炒兩隻蛋, 整碎, 備用
3) 開鑊煎豬扒至兩面金黃色, 大約 8 成熟, 拎起攤凍切件備用
4) 蕃茄 一開 八, 用1/4 杯水去煮, 同埋 落 1/4杯雞湯
     煮大約 10分鐘左右落幾湯匙既茄汁, 再落一湯匙唸汁
     試一試味, 可以落少少生抽 吊一吊味
5)  可以一次過落雞蛋同埋豬扒, 煮大約 5分鐘, 豬扒熟左可以打少少茨, 上碟




p.s. 我 買豬扒番黎唔會拍佢, 因為我覺得如果一塊豬扒靚, 唔洗拍都好食
同埋可以試多幾次味, 試下d蕃茄香唔香甜唔甜, 可以自己落多少少茄汁 / 糖




題外話
都唔知點解次次upload 上yahoo  d 相就變得灰灰地黑黑地咁.....好似唔夠光咁
又好似有層 野隔住左咁...
搞到張相好樣衰...!!!!!!!!!!!!!!!!     次次都好嬲!!




題題外話

女皇 上網見到有個web site 整 lee 個咁得意既 東主
我都都冇諗過0係女皇眼中係咁可愛...哈哈.........
多謝女皇..

古法梳乎里

2010年3月24日 上午11:30

梳乎里
有一個法國朋友, 幾年前去左佢屋企開 party
一人  整一樣食物出黎

當時我就整左好多紅酒炆牛腩.
有人整 烏冬, 有人整蝦餃, 有人整雪糕......etc  (真係多到有d唔記得) 

而法國朋友 叫我地入曬去廚房, 佢話既果d 係一出爐要即刻食
如果唔係就唔食得, 我地個個聽完 都覺得好怪..

有咩係唔即刻食就要"dum" 架呢......

見佢拎左 一 pack 蛋出黎, 拎起曬d 蛋白.....
哦.......原來梳乎里 

.........有咩咁特別姐... .
法國朋友話 : 出面果d唔好食, 落左好多麵粉同埋唔同既味
今日同大家分享下佢個梳乎里丫

蛋白 + 糖

打..!!

打到佢企身..

就落少少咁少少麵粉.....慢慢攪拌至勻

入模...

入爐, 預熱 上下火 150度 焗 10分鐘
再開上火焗 7分鐘.......

出黎既效果好似棉花糖, 出面食到果d 就有少少似蛋糕既感覺
但係宜家教大家lee 個 係食落口真係一啖空氣咁.......
又唔甜........唔錯..

真係要焗完出黎即即即食, 唔可以等.....
我聽朋友話佢地會用一隻鴨既蛋白, 一隻雞既蛋白.....
雖然真係好簡單, 但係 我諗真係食過既人唔會太多...
有機會既, 玩下丫, 唔錯架.

TIPS :

lee 個梳乎里 最重要既係 入爐既時間, 要定要慢慢火焗
唔係普通既梳乎里, 希望令到佢入面乾身少少, 同埋想佢慢慢升上黎...


同埋一出爐, 快d食左個面先, 個面係最好食....

溏心蛋

2010年3月22日 下午12:30


溏心蛋
參考過 兩個做法
而我兩個做法都試過

1) 烚完再焗
2) 只係烚
我屋企既爐火, 用 方法二係比較好
因為我屋企 隔離有兩大隻玻璃窗
會令到個溫度低得比較快






方法一

個做法好簡單, 只係記得睇火睇時間就Okay 架喇

不過 一定一定記住一早拎隻蛋出黎攤一攤佢去到室溫先
如果唔係會爆蛋殼

煲水, 大滾, 轉中大火落蛋, 計時 5分鐘
即刻拎起

過冷河, 我諗 如果好似我咁 "pear" 水的話, 3分鐘左右 就得架喇
"pear"水既原因係想隻蛋既白有少少收縮, 同埋凍少少, 比較易"mock" 殼
唔會辣親隻手...

係咪好簡單先~~~真係好好食架
只需要落少少鹽就搞掂
不過我鍾意整色整水, 靚靚咁俾大家睇.....

方法二
一樣室溫蛋, 煲水, 大滾, 落蛋
今次煮 大火煮4分鐘, ,熄火焗 兩分鐘
"pear" 水, 食得
一樣簡單............








題外話 :
上星期冇煮飯, 都冇咩時間0係屋企

番到屋企就 沖涼訓覺....

所以冇睇個 blog 兩日, 冇update 兩日
多謝仲有支持我既blogger........

肉碎蒸水蛋

2010年3月07日 上午12:17

今晚屋企冇人, 又係時候俾個廚房我玩

...哈哈
唔好睇蒸水蛋好似好簡單呀
其實一d 都唔簡單,

仲好難添.....
我自己都失敗過好多次

我見今次好成功

, 所以同大家分享下我既製成品

肉碎蒸水蛋


見雪櫃仲有兩隻蛋好耐未食, 順便幫亞媽清埋佢先.....

拎左幾粒乾瑤桂出黎浸 (唔可以俾亞媽知, 哈哈)

由於時間關係, 我用左熱水浸,
我既方法係用熱水浸一次, 等佢凍曬先後拎起d水
再落熱水再浸, 凍左先後又拎起d水.........再浸多一次.........

(好長氣)
應該搞掂架喇, 留番d瑤柱水可以用黎蒸蛋
咁我就用左 少少豬肉 自己 斬肉碎, 醃一醃佢...........記住要加水去醃
即係 落完 生抽老抽少少糖之後就可以加少少水....
之後可以燒紅隻鑊, 落好少油爆一爆d 豬肉.....我個人意見就係 100% 熟
同埋有少少咁少少燶燶地會香口好多
之後就放埋一邊等d 豬肉 攤凍..........
宜家可以準備d 蛋喇
今次比較特別, 我比平時用多左少少雞湯...
um......我真係講唔到比大家知我用左幾多水...
因為都係 用自己經驗.........

一睇就知夠唔夠.....


好啦, 攪勻d 蛋, 落 瑤柱水, 同埋雞湯.........再好落d 肉碎同埋瑤柱
lee 個時候可以"筆" 番起面頭d 泡泡
再用錫紙包住個面  <---好重要. 唔洗有太多倒汗水, 搞到個面唔靚...
之後開定火先, umm..個個屋企既爐頭唔一樣
我用既係中火.....等水滾, 隔水蒸
首先蒸 5分鐘.....之後可以熄火.......唔好理佢, 唔好打開個蓋
焗佢5分鐘, 咁樣應該可以成功架喇
不過個個屋企既火路唔一樣, 真係好難講
我0岩0岩教大家既方法可以參考下, d 蛋會滑好多....
我夠膽講我今晚lee 個水蛋,

比好多日本餐廳仲好食....仲滑!!

之後就可以落少少靚既大孖生抽, 同埋 少少蔥花.....搞掂..!!  食飯

睇下丫, 仲可以咁震震震.......哈哈, 大成功...!!