酸梅麵豉蒸排骨 (散文之三)

XO醬肉碎煮茄子

講中式小菜其實都唔到我講，話曬 打blog 都有好多師奶廚神

所以要煮都係煮d 簡單又快捷 既小菜

10蚊 肉碎 用基本調味醃一陣  同埋落少少凍滾水

煮起上黎會易散少少

而茄子 普遍黎講酒樓都會先走油 再煮

一黎又快熟, 二黎又可以 keep 住d 紫色

但係茄子就好似海綿咁不停吸油，食食下就好超標

所以屋企煮茄子就唔好理佢賣相喇，食得健康d 好

我試過做實驗 一條 普通大細既茄子 可以 吸 最少 150ml 既油

你冇睇錯 係 150ml !!!     咁你想健康 定賣相丫?

至於想少d 油 又可以 盡量 keep 住 茄子色 的話

我就會先落料頭爆香豬肉至出油 然後讚酒 拎起豬肉 用鑊底d油 再炒茄子

 炒兩炒就可以落大約半碗雞湯 1/4 碗滾水 同埋 落埋d 豬肉 蓋上蓋 煮一陣

拎一隻碗落大約一匙蠔油、一匙辣 xo醬 同埋一匙生粉

炒兩炒就可以 打茨 同埋落 少少 九黃 最後落少少蔥花  就搞掂架喇

係唔係好簡單呢~~

喂!!!!  黎 我 facebook page 傾計丫~~  個 blog 冇曬人氣咁....死氣沈沈 

焗薯配煎焗豬扒

2011年7月21日 上午10:00

本身lee 碟野都冇咩特別, 只係想同大家分享一個焗薯仔焗到好脆既方法

首先開焗爐二百二十度, 落一舊牛油, 少少生油, 同埋少少 Sage

另一邊滾刀切薯仔, 切大舊d, 烚 5分鐘左右, 中間仲好硬, 外表要爛爛地

之後隔水, 蓋上蓋不停shake shake, 令到外表有d變薯蓉

另一邊 d 牛油應該都變到好滾熱, 直接用匙 放落滾油, 應該會聽到 炸炸聲

放番入焗爐, 焗 20分鐘

之後拎出黎反轉再焗 20分鐘 就會變得金黃香脆架喇

超級好食!!   做 side dish 一流呀!!

題外話

從來我都唔係一個讀書人所有測驗考試都唔會高分，而其中由小學到中學有幾科係特別高分。分別係小學既科學、數學、初中既英文、化學。因為我對果一個老師有好感，好照顧我地一班唔鍾意讀書既同學。所以我好留心上堂，會寫筆記會問問題，測驗考試都會頭一二名高分。宜到會考先發覺所有老師都好偏心令我唔鍾意讀書。雖然我唔係一個讀書人，但係就好鍾意吸收新既資訊，所有類型都會興趣，除音樂, 金融類別！ 十年光景讀過好多唔同種類既課程，當然結果都係無一樣成功。講起書, 之前上心理學講過話有好多人會買好多書番屋企但係唔睇只係儲，想話俾人知自己有幾犀利、睇過幾多書籍。當然我諗我自己都係其中一個，儲儲埋埋好多心理學/ 催眠既書都冇睇。原因除左扮野之外，有好多我本身都識所以好快就睇完/ 跳過唔睇，一本書可能都係睇10%，睇多 10本可能連10% 都唔洗睇就放埋一邊，所以宜家我都冇再買新既 理學書番黎。深既又唔識，易既唔睇都識，廢事嘥位。書都算小事，10年前我儲漫畫都好得人驚，我估計都超過 500本，單係手塚治虫都儲左 二百六十幾本。人大左覺得冇用又嘥位於是一次過送曬俾朋友。我諗過多幾年我都會該一放棄手頭上既書本，如果係放棄，倒不如問下你地有冇人要啦。我過一兩日再 post 一次丫..

日式炆豬寸骨

2011年6月29日 上午11:15

上次42蚊買左十幾廿隻 豬寸骨番黎, 放左0係冰箱太耐

係時候要清清佢, 又冇咩時間醃, 所以用炆既方式

希望快d入味, 減少醃肉時間

同埋我解凍之後用刀篤左幾個 "loan"  理論上會仲快入味

簡單用 1份味琳, 2份日本豉油, 3份水, 4粒連"衣"蒜, 5塊薑片

細火煮 6個字, 熄火焗7個字, 8下軟身未, 9等咁耐, 10分好食

題外話

之前咪講過 apple 既 apps store 有個叫 女人愛晒 既 apps download 既

其實大家仲有冇睇???   同埋覺得點???

講明, 唔係幫佢宣傳, 不過如果唔知我講咩既, 可以0係 主頁既 左手邊 搵條 link

個人而言......我仲係對lee 個 apps 有保留...........我想知多d 你地既意見. (認真)

仲有仲有.........另一樣想問下大家其實鍾意睇 blog 定係 facebook 既 fan page 多d?

雖然自己都有整 fan page, 不過就冇咩理佢..

日式檸檬豬扒

2011年6月07日 上午10:57

日式檸檬豬扒

我要承認我真係好怕熱, 一熱就成個人冇咩力

就算屋企點開冷熱都好, 一樣會出汗

而且廚房係一個冷氣去唔到既地方

仲要開爐煮野食, 你都咪話亞媽唔叻

日日都要煮飯, 幾凍幾熱都要煮, 犀利!!

E記之前話天口熱, 煮d 酸野食開胃吓

我仲話開冷氣食咪得囉

點知lee 期 真係熱到我發神經!!!

我情願出街食, 人地煮人地洗碗算喇

入一入廚房就好似玩完高溫 yoga 咁......

冇計, 真係要煮d 酸味味 / 清淡既野

就好似 lee 碟咁, 用左日式醬料 再加成個檸檬既汁

食完咩悶氣都冇曬!!

我用左普通 cheap cheap 冰鮮豬扒, 肉質麻麻地, 又冇咩肉味...

下次都係用番貴少少既 黑毛豬先~~  唔想 嘥自己 quota

不過味道非常之好!!  好啱配飯. 味道有少少似 京都骨

所以唔用豬扒都可以用 排骨 架

做法大約係咁既~~

.

.

.

.

.

三塊梅頭豬扒用半個檸檬汁, 兩匙日本豉油, 兩匙味琳同埋大量黑椒醃 幾個鐘

中火煎香兩邊至半熟, 切粒, 回鑊

用一時間落 ( 兩匙日本豉油, 兩匙味琳, 半個檸檬汁, 兩湯匙糖, 同份量既水)

落鑊中火煮到收水 就搞掂架喇

唔知我會唔會講得太簡單呢??

煮既時間記得不停搞拌 呀~

因為 有糖既關係, 煮到收 8 成好熄火喇

糖會自己再焦糖化, 會自己再收水架喇

題外話

我覺得我個blog 既分類其實有d "不合時宜"

應該理論上可以再分細少少, 清楚少少

但係我又冇咩 idea, 我想大家幫我手諗下應該點執好

蓄薯腩肉飯

2011年5月27日 上午10:51

今日到左簡單 星期 既最後一日, 亦都係最特別既一樣

一定一定一定要買超肥打邊爐果d 腩肉片

中火白鑊煎熟腩肉, 希望會出油, 留番一陣撈飯食

我用左紫心蓄薯, 蒸熟整爛, 撈落熱辣辣既白飯

再用少少蒜蓉辣椒醬, 生抽, 大量蔥花, 再落埋頭先d 豬油

完美既一碗飯, 咁就搞掂架喇..哈....

係唔係成個星期都好簡單呢?

唔知有幾多 blogger 跟住黎整呢?

如果有的話, 記得番黎講番有冇野需要改善喎

你知啦, 口味既野, 個個唔同, 希望0岩大家食啦

題外話

好耐之前睇飲食男女, 葉一南 講過

咩係無禮貌, 就係叫部長免茶送糖水

咩係勇氣, 就係去法國餐館叫人免茶送甜品

你地會有勇氣麻??  

而且仲要叫人打折 生日送甜品, 再 分成10張單黎簽咭, 為左要積分

我屋企就會有咁既情況發生喇

而且仲會成日同部長嘈, 又話d野食唔掂

又話要人送多碟餸, 仲不停鬧人

我同女皇見怪不怪, 所以一到星期六日最開心係留0係屋企

少不免都唔出去食飯, 廢事俾人認得出我, 下次冇得再去食

因為咁樣, 有好多間餐廳都唔會再去

主因係我老豆成日飲天d 屎水就發神經

酒, 識飲, 有節制就會令人放鬆

而冇節制就會令身邊人煩惱

聖水 同屎水都係 一線之差

所以我一宜以黎都好反對D人出去劈酒

又嘥錢, 又亂性, 又搞事.......

鍾意成班劈酒果d blogger 唔洗同我講有咩好處喇

我都係鍾意有節制既飲酒, 同埋唔想嘥酒

孜然粉焗豬寸骨

2011年5月24日 上午10:32

都講過今個星期係簡單星期, 乜都係簡單煮法

今次就講下好抵食既豬吋骨啦

0係街市買 廿幾條 都係 42蚊, 抵到震

啖啖肉, 又香口, 不過唔知拎黎炆好唔好食呢

比我揀, 都係會拎去焗, 好食好多

好簡單, 我焗 7 條, 用左 兩茶匙孜然粉, 一茶匙辣椒粉, 一茶匙黑椒, 一茶匙美極

放入保鮮袋入雪櫃醃 足一日, 大火煎香表面, 放入焗爐 180度 焗 20分鐘

轉250度焗 5分鐘, 就搞掂架喇

最少要醃足一日先好拎去焗, 先會入味架

如果唔係就要落重少少味再拎去焗, 不過少d 香料好d..

題外話

唔知大家覺唔覺, 一個有講有笑既屋企好難再0係香港搵到

就算成家人十幾個出黎都好難, 莫講表叔伯, 連表第都唔會點搵

十幾個出黎食飯都好政治飯局, 好難得會見到過時過節 廿幾三十人

仲要開懷大笑, 冇白眼, 冇事非

我屋企本身都好以搵親戚, 黎黎去去都係搵亞媽果邊

而老豆果邊就一個都冇再搵, 出親黎食飯都係最多 十幾人

同埋再講宜家香港好奇怪, 好少屋企會真係識笑

好多屋企都唔知有幾耐冇真係笑過

都唔知幾時開始出現咁既現象, 唔知係人口過多定係番工辛苦

番到屋企好多時仲慘過番工咁, 番到屋企唔早D是但食完訓

想搵個人陪自己玩下都難, 唔係對住電腦就電話

完全唔會識得同其他細路出街玩

宜家香港  lee個社會其實仲0岩唔0岩我地住落去呢??

好多唔同國籍既人都好恨黎香港定居

我地唔係唔歡迎你地

但係你黎得香港, 人地既地方

係唔係應該諗下點同大家生活, 而唔係同番自己國家既態度呢?

你地lee d同入侵冇分別,

我地香港人都冇得拎公屋啦, 日做夜做, 成隻狗咁

但係就要養一班唔做野, 只係識拎錢既人

公屋又要拎, 6000蚊又要拎, 又要講公平

你地有冇 諗過對我地幾唔公平呀

我地連公屋都拎唔到呀, 仲講買樓

成個香港俾曬你地好唔好?

我覺得係我地香港人鍾意拐冇野咋

如果唔係你地班友仔都幾大鑊!!!

換番轉丫, 我地去你地既國家住, 可能一早俾你地班友打死

等你地仲咁開人打開隻手拎錢, 又話讀書

仲要香港人好衰唔俾機會你地做野

你地咁叻仔就番自己國家啦, 洗鬼0係香港問政府拎錢咩

就連各大公屋樓下既遊樂場都俾你地用曬

搞到香港土炮都唔敢落街玩

我唔知政府係唔係真係明白香港係咩社會

但係我只係知道大粒佬只係為左唔"咩"鑊而唔做野

睇唔出有幾多個係真心熱愛香港

你地粉腸推多幾幅地就話可以令樓價低d

話收番d 舊樓番黎就可以 多d人上車

食屎啦!!  如果係賣 3000蚊呎就話姐

大佬呀, 萬幾蚊一呎, 7 成實用

700 萬買番黎供一世, 都唔夠公屋大

為左搵間屋住下姐, 估唔到要為左地產商打一世工

咩世界丫你話, 成日話小政府大市場

根本係你地俾班商家佬打劫!!

如果要香港變番做一個開心既社會

第一樣要做既係起番公屋居屋!!

咁就好多人都唔洗俾為左供樓而打工

而真正有番自己生活, 享受一下自己既時間!!

腐乳蒸排骨

2011年5月17日 上午09:41

真係好耐都冇煮過中式既野, 所以好多人都以為我煮只係識煮西式野

其實只係平時 weekdays 亞媽都係煮中式家庭式野, 所以自己煮就要搵d新意

唔好星期六二人世界果時都係食平時食開既野, 亦都所以平時同女皇出去食飯大多數

都唔會係中式野, 會食西式野多, 同埋鍾意地方夠舒服, 0岩三兩個朋友吹水

愈講愈遠, 講番碟野先.....

其實好簡單, 只係拎左幾尊腐乳, 蒜蓉, 糖, 酒, 麻油, 水, 生粉, 胡椒粉 醃左d 排骨,

碟底放左d粉絲, 大火隔水蒸 8分鐘就搞掂, 都唔洗多講, 簡簡單單

醃定d野, 放工番屋企就可以落鑊, 好快手

題外話

唔知大家 update左 angry birds rio 未呢??

我玩到停唔到手, 只係差一關就全部 3粒星, 同埋差一個西瓜

就係lee 隻 game搞到我玩得太夜, 訓得好少, 所以琴日唔 update

不過我玩 angry birds 其實都幾叻架, 玩兩晚就可以玩曬

我會好專心睇下每一隻雞同每一個磚之間有冇咩關係

最重要係搵0岩個方向, 有時有d 關卡 係要用最少雞搞掂佢地

有時係用埋所有雞都冇問題, 最重要係清曬d磚, 務求最高分

最難玩係有時每一隻雞既角度都要好準確, 少少唔同, 就會令個破壞力唔同

所以好難每一隻雞都咁穩定出手, 一定會有唔同

所以呢..............我又有排等喇........玩咁叻把鬼咩..

又唔見讀書咁叻, 玩雀有鬼用咩.......

脆香豚片配忌廉汁

2011年2月21日 上午10:07

lee 碟野都冇咩好教大家
做法好簡單, 都係0係超市買左d 打邊爐既黑豚肉番黎煎
d 菜就汆一汆水, 而煎完個豬肉, 個鑊d油留番, 落少少忌廉同埋威士忌煮好
作為頭盤最適合不過喇........






題外話
有時煮野都唔再係為左飽肚, 而係為左個外型上靚
就好似上星期六咁......我以為女皇好似平時一樣唔多肚餓
點知我就煮左三個頭盤....搞到女皇成晚不停話冇食過野...
我都有d過意唔去...哈...好彩女皇都識自己搵野食...食左幾條古古力條
原本我都真係諗係叫外賣叫pizza 番黎食既....
不過打完講完要咩之後, 同我講要 1.5小時......
咁我都係叫女皇打番去講唔要喇....
我地 9點半先叫....即係 11點先有......我果時都唔肚餓啦..
以前又話 30分鐘會送到.....宜家 60分鐘先叫正常時間
90分鐘係好多時發生既事..............
我又唔明喇, 你係唔夠爐唔夠手用定係真係咁多單呢
如果真係咁多單, 你唔加人??
你如果係唔夠人, 就唔該你唔好賣廣告啦
即係叫人食唔食你好呢??
我好記得以前真係過30分鐘就會送你食多一個pizza 架.....
宜家叫佢俾 tabasco 同埋 黑椒都冇...................唉.....

焗酥皮豚肉配薯蓉

2011年2月09日 上午10:35

係時候清下雪櫃d食物, 新年果時亞媽用剩左少少紅菜頭同埋薯仔
而亞媽又叫我得閒用埋d碟皮..........
無啦啦 叫我用lee 幾樣材料, 你估我係鐵人料理咩~~
0係 city super 行左一陣, 閃電咁諗到 不如整 豬扒版既威靈頓
以前細細個亞公會整威靈頓牛扒 俾我地食, 但係佢人愈大, 出現次數愈少
老老實實, 我覺得 lee 隻豬扒唔係咁好食
肉質比較實, 冇肉味, 冇油香
可能係我唔識煮啦..........




材料
豬扒                       150g 左右
酥皮                     20cm x 10cm 左右
薯仔                      一個
黑松露醬               4茶匙
紅菜頭 (小)            一個
bb 菠菜                   一小撮
芝麻                         一小撮
黑椒, 鹽
欖油                        一茶匙左右
砂糖                        一茶匙左右
蒜蓉                         半粒
忌廉                         50ml 左右
蛋黃                          一隻




做法
1) 少少蒜蓉起鑊, 超大火煎香豬扒兩邊, 拎起備用
2) 薯仔去皮切粒, 中火烚10分鐘, 熄火焗 20分鐘, 隔水落忌廉, 黑椒, 鹽, 黑松露醬
3) 預熱焗爐至 200度, 紅茶頭一開八, 拌上糖及欖油, 放入焗爐焗 20分鐘
4)  用叉不停向酥皮篤, 之後用酥皮包好豬扒, 蛋黃搽酥皮表面, 放入爐焗 10分鐘








題外話
公司又要我出trip 喇
今次去泰國, 三日兩夜
琴日同我講叫我星期四一早8 點機...
星期六夜晚機番..
好彩冇用到我個星期日姐, 你知啦, 星期一係情人節丫麻
就算星期一真係唔同女皇出街都好
星期日都要做番d野......所以如果公司講星期日先番的話
我一定唔會去, 唔好嘥我時間
又唔係有得俾番 OT 錢 / 補番一日假俾我
次次出 trip 都要0既私人時間, 又要自己洗錢~
雖然聽日出發星期六番, 不過我會 set 好時間 自己 update個blog 架喇

鹿兒島茶美豬扒配煎菠蘿

2011年1月12日 上午11:04

有時都唔係好明, 我平時食開既食中式野, 同日式野多
但係0係 blo 入面就俾大家既感覺係 西式煮法比較多
or 東主唔係好識煮中式野.....
其實 我煮西式係因為 擺設 靚d, colourful 好多, 同埋 快丫麻
你地都知我一星期係得一日煮飯咋麻, 仲下下都煮咁耐
我諗我由一朝早煮到訓都似


材料
鹿兒島茶美豬扒                一塊 (162 g 左右)
菠蘿                                    一塊
黑椒                                     半湯匙
Rosemary                             一支   (切碎)
欖油                                     一湯匙左右
糖鹽                                     適量
威士忌                                  一茶匙




做法
1) 豬扒兩邊沾上黑椒及 Rosemary, 再用欖油醃 最少 3小時
2) 菠蘿兩邊沾上砂糖, 開平底鑊大火煎香每面至燋糖化, 備用
3) 開另一隻新平底鑊, 白鑊大火煎豬扒, 每面大約煎 1分30秒左右
4) 豬扒放碟上 大約 5分鐘, 肉汁回鑊, 再落黑椒鹽調味, 熄火落威士忌 即可
5) 菠蘿及豬扒切件上碟即可


tips
lee 隻豬扒最好食就食 9 成熟, 同埋lee 隻豬扒比較多油, 愈大火愈好食
因為大火先可以迫出豬扒既油香味
如果有坑紋 既 pan 就最好啦, 因為 隻豬會出好多油, 如果唔係會變到油炸咁




題外話
話咁快情人節又就黎到喇........
睇黎我都要諗定情人節大餐喇 or 睇下有冇咩好野送俾女皇
lee 幾日我都係咁同女皇講" 不如你情人節送 iphone俾我啦"
之後女皇不停係咁轉話題............次次問佢都轉話題......
即係冇得收 iphone 添....哈哈




題題外話
琴晚同女皇出去食飯, 對面係 某明星開既鋪頭
之後女皇好興奮咁望望望.......
我0係度諗, 你望咩呢, 明明0係你後面你唔望, 你係咁望住塊鏡
於是我同女皇講 " 你洗咩咁辛苦姐, 望後面咪得囉"
女皇" 咩呀, 望緊喇"
東主" 後面啦望"
原來女皇唔知果個係塊鏡既反射..........


仲有.....


女皇" aiya, lee 間野代理左好多品牌番黎架, 羅祖旋 500蚊 都好多人買架"
東主" 螺旋藻 下麻?!"


女皇個口即噴飲緊既凍檸水................

豉椒排骨炒河

2010年9月29日 上午11:12

今日係一連三日茶餐廳口味既最後一碟喇
一係唔扮, 一扮就扮得似樣d
所以用左我最鍾意用又方便既急凍排骨
好就好在 放0係冰箱幾時食都得
就算好似只係今次咁, 食8~10舊左右都得
而且急凍排骨比新鮮排骨軟身
唔會咬唔開
我唔識茶餐廳點炒
我用左我自己既方法煮出黎
同樣咁好食
女皇食過我煮既豉椒骨河都話" 河河姐, 界界姐"



材料 (二人份)
急凍排骨              15舊  (我諗半磅左右)
河粉                      兩手份量
紅辣椒                   半隻   (切平衡四邊型)
青椒                      1/4 隻  (切三角型)
洋蔥條                  1/4個
豆豉茸                   一湯匙
雞湯                       150ml
蠔油
老抽
生抽
糖
薑蔥


做法
1) 排骨先解凍上醃料 醃最少一個鐘  (生粉, 油, 糖, 胡椒粉, 生抽, 麻油)
1) 先落少少油炒好河粉至微燶, 拎起備用  (我用易潔鑊)
2) 落薑蔥, 紅辣椒, 豆豉茸爆香, 落排骨同炒, 落雞湯細火蓋上蓋炆煮10分鐘
3) 試味, 落蠔油, 糖, 再用老抽 調色, 落洋蔥青椒 煮一陣再打濃濃既生粉水
4) 將河粉回鑊拌勻, 大火炒一陣就搞掂


Tips
都係果句啦
河粉先一條條搣好, 落少少油撈好 先好去炒










我同女皇星期六地獄式咁食河粉
食到個人好呆滯...........

豆腐肉碎蒸蛋

lee 個蒸蛋唔好睇佢唔得滑溜 就唔好食
就係因為要佢唔滑先夠好食
要中大火蒸得老身d先好食
食得出豆腐 既滑, 蛋既香
不過都要買d 有蛋香既蛋同埋有豆香又滑既豆腐先得
我今日用左 鴨蛋 代替雞蛋
0係 city super 果間 豆腐鋪買 左 盒細既 豆腐


材料 (二人份)
鴨蛋              三隻
豆腐              一盒細
肉碎             二兩 左右
蔥花              少量
雞湯              50ml


做法
1) 肉碎先炒香備用, 豆腐切丁
2) 拌勻所有材料,  放入比較高身既碟, 中大火蒸  7分鐘
3) 最好讚上熟油少少豉油 即可




tips
鴨蛋都唔平架, 應該要 兩蚊一隻
唔怕膽固醇, 可以減少一隻鴨蛋, 落 四隻鵪春蛋, 蛋香味仲勁..

子薑炆排骨

2010年9月08日 上午10:47

講明先...
lee 碟餸我其實覺得麻麻地好食
因為d 子薑真係唔係好靚
話曬個期都已經過曬
想食想煮的話, 我覺得都係等出年啦
我都好後悔 宜家先屎忽痕買黎煮..
我d朋友仔同女皇都冇咩點食lee 碟野....哈哈


材料  (二人份)
急凍排骨            半斤
子薑                    4兩
蠔油                     兩湯匙
雞湯                      200ml
水                           300ml
老抽
薑蔥




做法
1) 排骨先用少少老抽, 紹興酒, 少少糖, 胡椒粉醃一個鐘
2) 薑蔥起鑊爆香排骨, 讚酒, 落子薑同炒
3) 落雞湯, 蠔油, 老抽, 水, 大火滾起轉細火蓋上蓋煮 5分鐘
4) 熄火焗30分鐘, 再妯火煮5分鐘, 焗30分鐘, 打茨, 落蔥段即可

虎掌菌豬肉卷

2010年9月06日 上午10:34

唉..........10幾分鐘之前我係咁講粗口
事源係 yahoo 既問題!!!!
我打好左 好多字既 blog, 頂佢.!!  我 post 果時, 佢叫我 login..
之後就冇曬d 野....
我明明就login 左, 但係就明玩我咁..
咩意思呀你!!




大約之前打既野係咁既~~~~~~




星期六第一次叫兩個朋友上我屋企試下我d 手勢
我煮左 5碟餸, 由 3點半 煮到 8點
唔知佢地覺得好唔好食呢..??  哈哈
最少都食得 77 88, 冇咩食唔曬...哈


deleted 1,000 words............






材料
鹿兒島豚肉扒薄塊              8塊
露荀                                      16條   (一卷兩條)
西芹                                      16 條  (1cm x 10cm ) (一卷兩條)
虎掌菌                                   80g
蒜蓉                                       1/4粒


汁料
蠔油
水
辣椒油
生粉水
老抽


做法
1) 虎掌菌先用蒜蓉爆香落少少鹽花黑椒調味, 攤凍備用
2) 豚肉卷入虎掌菌, 露荀, 西芹, 生粉封口
3) 放入平底鑊中火煎香四面金黃色( 先煎封口位)
4) 煮成茨汁, 再放入豬肉卷煮一陣即可




tips
1) 西芹 最好刨走面頭d 根 先好切, 好食好多架
2) 豚肉我揀左 sogo 38蚊 100g 既 豬扒薄片, 好好食
3) 虎掌菌要食就快喇, 聽講 sogo, city super, jusco 係做埋lee 個星期 唔做架喇
     唔食就要等一年先有架喇
4) 露荀最好揀 細細條果d最少入口.

酸香排骨

2010年8月24日 上午10:09

琴日單野真係睇到個人心都寒......
一路食飯一路睇......
平時 30分鐘食完既飯
變左 兩個鐘都未食完
呯呯呯.....咁就死左幾個......嚇都嚇死啦
班""""""特警""""""", 我話應該叫做 特驚 就真
特別驚死 咁解.......
咁多機會 殺死佢都唔行動
俾著係美國日本中國 1個鐘都搞掂啦
個總統仲白痴, 拎番 歌劇院單野出黎講
仲話比起果次死少好多人........
真係笑話.....一個天大笑話.....
人地一個歌劇院.....
你只係一架車.......仲要好多玻璃
可以俾你清楚見到入面咩事
你又唔用高燈射入去
你睇班警察個驚樣, 你就驚.....
我唔係話班警察條命唔係命
不過係真係有問題囉..
個個個樣唔係肥就係好似吸毒咁....
唉...唔講喇, 大家都有眼睇咩事......






材料  (二人份)
急凍排骨        半磅
薑                     兩小塊
水                     300ml
雞湯                 50ml
0急汁              一湯匙
白米醋            五湯匙
老抽               適量




做法
1) 排骨用老抽醃三兩個鐘
2) 薑片起鑊炒香排骨, 炒一陣
3) 轉細火落滾水, 雞湯, 0急汁, 醋 炆煮5分鐘
4) 熄火焗30分鐘, 再細火煮一陣熄火再焗30分鐘
5) 炒至少少收汁, 打少少生粉茨即可




事後話
係呀!! 我明抽你地班百佳水!!!!!
低能無能..!!!
認字特警就有你份!!!!!!
我只可以為死難者 祈福.............

南乳芋頭腩肉

2010年8月18日 上午10:56

影完之後睇番, 原來似薯角多過腩肉
哈, 我同女皇睇完都爆笑............


其實我炆野都幾搞笑架
鍾意炆到佢冇咩汁為止
因為我唔係太鍾意用汁撈飯食果d人
鍾意一啖一舊 + 白飯 咁食


材料 (二人份)
大芋頭            1/4個   (切丁)
腩肉                半斤
南乳                兩粒
雞湯                100ml
水                    500ml
糖                    適量
薑                    一塊
指天椒             一隻  (唔洗切)


做法
1)  落薑起鑊爆香腩肉再讚酒, 落南乳落少少糖炒一陣
2)  落水 同埋 雞湯, 細火蓋上蓋炆煮 10分鐘, 熄火焗 30分鐘
3)  落芋頭指天辣椒細火炆 10分鐘, 熄火蓋上蓋焗 30分鐘
4)  煮滾, 炒至收汁即可

麻婆豆腐

2010年8月16日 上午09:39

無啦啦個Photoshop 死左??
搞到我整唔到水印添.....




麻婆豆腐老老實實我就唔知咁整0岩唔0岩喇
不過個味都好好食, 同埋用料簡單極
個個屋企都好易整, 仲有夠平!!!




材料 (二人份)
軟豆腐 (切丁)       一尊 (3蚊)
肉碎                       10蚊
韮黃  (切段)          3條  ( 1/10  of  3蚊)
雞湯                       300ml
滾水                       200ml
蒜蓉辣椒醬          一湯匙   (李錦記)
潮州辣椒醬          一茶匙   (李錦記)
花椒 (搗碎)           數粒
薑                            一片
生抽                       適量
老抽                       適量
糖                           適量
生粉                       適量




做法
1) 落水, 生抽, 老抽, 糖, 生粉醃肉碎 一小時
2) 薑起鑊炒肉碎, 再落蒜蓉辣椒醬, 潮州辣椒醬 再爆香
3) 落雞湯, 水, 中火煮一陣落, 落花椒, 落少少老抽上色
4) 試味, 落糖, 生抽, (辣少少, 甜少少係okay 架)
5) 落豆腐 (豆腐只可以推, 唔可以炒)
6) 打生粉茨 (大約 兩茶匙既粉), 落韮黃煮多十多秒, 即可






題外話
大家鍾意咩名牌呢?
同埋大家點睇一個牌子係名牌呢
我都鍾意名牌, 但係我就唔係咁鍾意成身名牌
好似幫人賣廣告咁, 為咩丫.....
做人低調d好....

豬扒 + 生肉腸 拌 皇帝菜忌廉汁

2010年8月11日 上午10:27


又黎又中又西既 菜式喇..
同女皇行 jusco, 女皇問我煮咩好..
我話" 唔知呀, 去到有咩叫我就煮咩啦"
亦都無啦啦去到肉檔見到d 加拿大法式有骨豬扒好靚....一塊都只不過係 49.5蚊
諗住離開之際, 隔離有個男人買左一條腸....
我望望下......下?  乜lee 個牌子有出生肉腸架?
個名好似係 jonsville  (唔識串, 大約咁串)
再望望下, e? okay 喎, 都只係 大約 11蚊一條, 食得過
所以一齊帶左佢地番屋企喇...哈哈
行行下, 玩下車仔.....行下零食, 行下 飲品..
去到菜檔...見到d 皇帝菜條條都好精靈
我問" 丫, 你估皇帝菜可唔可以食豬扒丫麻...."
女皇都呆一呆 " um....得既...冇話唔得既"

材料
超厚有骨豬扒    一塊
生肉腸                一條
皇帝菜                半斤
牛油                     一茶匙
忌廉                    細半盒
介辣子                兩茶匙
威士忌               大約 50ml
糖                         適量
鹽                         適量
黑椒                     適量
蒜蓉                      適量
雞湯                      同忌廉一樣份量        


做法
1) 豬扒先用 威士忌  少少蓉 醃最少兩個鐘
2) 先洗好皇帝菜, 只要其葉, 煲一煲水, 蝦眼水, 落少少糖鹽 烚菜, 20秒左右
    用熟又冰凍既水過冷河, 楂乾水份
3) 開鑊落少少油, 落蒜蓉爆香, 再落皇帝菜, 再落忌廉, 同埋雞湯黑椒, 煮一陣落牛油
     開攪拌機, 直接放入去打, 打至滑身
4) 開鑊落dd 油, 拎塊豬扒出黎 擦至100%乾身先好落鑊, 如果唔係有可能會搶火
     落鑊前放少少黑椒同埋鹽
    中大火煎兩面至金黃色, 轉細火落生肉腸慢慢煎香表面, 放入預熱 160度焗爐
    上下火焗10分鐘 (用鍚紙求其放上面, 目的唔想d 肉 燶) 即可..






後記
丫, 又估唔到個味可以咁夾喎.......
如果食皇帝菜既朋友真係可以試下...真係okay 架

鹵豬肉

2010年7月26日 下午12:25

唔好意思呀, Lee 張相真係影得冇咩美感, 不過我同女皇就極之鍾意食喇..
上次咪整左d鴨舌既~~~~ 仲記唔記得~?
http://hk.myblog.yahoo.com/speedkung/article?mid=4709


我將個鹵水放左入冰格, 拎番出黎鹵排骨
材料 同做汰都唔洗點講架喇, 都係大同小異
不過, 最特別既係我 鹵左 足足三日 先拎出黎食....哈哈
原本一早已經食得架喇, 星期五夜晚鹵好架喇
星期六又煮又焗, 足足10 次都有
每一舊都係一放入口即時化開左, 連d骨都可以 啜好耐




題外話
琴日睇電視講廚餘.....話香港一日要處理 3,000 公噸
政府日日都要用最少 200 萬 去處理
不好大家真係認真諗下自己既生活
為我地下一代著想丫
以前因為交通唔方便就話去 香港仔公園都叫去旅行姐
我驚遲D 搵個效野公園 都難..
出去食飯咪食多d 菜, 少d油, 叫少d 
當場最好就唔好出街食咁多啦
特別係 buffet 添呀
仲有呀, lunch 可以帶飯就帶啦
琴日見d 小朋友 既飯盒食一 1/4 就話唔要
世界上真係有好多人冇飯食好慘架
係!!! 你係俾左錢, 你話點就點
但係個地球係大家架, 如果個個都好似你咁
過多20年 真係行路都可以過海架喇
當每一樣野都要自吸先足果時
你地就會知原來簡簡單單一樣食物都得來不易
你就會好好珍惜食物, 珍惜地球...
其實環境, 只要用心諗就可以架喇,
而唔係 100% 真係 環保 = 錢
從生活上少少既習慣轉一轉, 就可以大大改善架喇..