酥脆帶子

味增燒汁煎三文魚

~上海夜~

星期六有朋友搵我食蟹，我提議我放工去 銅鑼灣 老三陽 新鋪 睇下d 蟹貴唔貴

本身諗住去 city super 買 西式料 飲香檳 既，但係0係老三陽行行下等等下

又覺得 可以0係 老三陽一次過買曬番屋企， 同埋最驚喜係有得賣小籠包

而且仲要係蟹粉小籠包，一盒 8隻賣 98蚊，番屋企 隔水蒸 8分鐘就食得

皮就唔算薄架喇, 不過真係有蟹油同埋蟹肉， 98蚊 真係好正!!

最好切紅蘿蔔浸熱水再放底拎去蒸，唔會"痴" 底呀因為~

溫馨提示: 真係太好食，我提議 1 人 4隻 好d~~

當晚既主角全大閘蟹，而且要熱辣辣咁食先過癮

所以一諗就煮幾碟 可以凍食既 小食，咁食完蟹仲可以慢慢食慢慢飲酒丫麻..哈

其中我就買左 茭白荀 炒鹹肉

我地 3個人買左 14條 荀 切頭切尾 要中間 開邊

鹹肉切絲 浸 小小熱水 

落薑絲大熱爆香 落 茭白荀 炒一陣 讚酒

之後 落 少少糖 調味，再落鹹肉 同埋 浸過鹹肉既水 大火快炒

之後 落 少少 生粉水，搞掂先落麻油 同埋 少少生抽 

lee個熱食又得凍食又得

蒿荀  我拎黎涼伴，一早整好就可以放雪櫃 等食先上枱

首先 蒿荀去皮，切段再切條， 落多多鹹汆水  之後過冰水

用廚房紙吸水， 用少少 鹽同 麻油 調味 就okay 架喇

同埋買左 半斤 馬蘭頭 炒冬菇粒

我唔係好識揀馬蘭頭，番黎好多都好老，食落口 好似牙籤咁

所以 可以 skip 丫~~

而蟹就 買 360 蚊斤 買左 5隻，totally 420 蚊

都 okay 丫, 普通啦.....

不過星期六 有可能再買多次食!!  哈哈

溫馨提示: 記得放紫蘇葉 一齊蒸 同埋 唔食食粒星星，仲有記得煲薑茶 飲呀!!

煎三文魚配煙肉青檸蝦仔炒菜

事前準備 煙肉兩塊切碎，青豆解凍，椰菜 1/8個切絲, 仲有青檸半個

海蝦去殼大火烚熟, 備用

落少少油，煙肉 大火 爆 香到燶燶地 再落青豆 椰菜

炒到 椰菜軟身 可以落埋 d蝦 炒兩炒

落青檸汁半個 , 同埋黑椒 調味

之後就可以 上碟, 準備煎三文魚

通常三文魚我會去 city super 買, 鍾意佢新鮮同埋可以揀自己鍾意既部份

係就係貴少少，不過真係靚好多，有時0係出面買番黎既三文魚有d唔新鮮

買番黎 中間切一半 上一層薄薄既 生粉

中火半煎炸，先煎香魚皮部份，時間我冇咩留意

最好用自己對眼 望一望好d~~  見佢金黃 色就可以反轉另一面再煎

另一面都煎到金黃色可以再反多一次 煎 30秒左右 就食得架喇

如果驚佢燶的話, 可以 熄火 ，用鑊本身既熱力令魚變熟

之後放上碟就食得架喇，因為三文魚靚 既關係，唔洗落黑椒鹽調味

題外話

大約兩年前留意身邊一個朋友有打 blog 既習慣，覺得佢好叻，日日煮飯日日post 上網同人分享

於是我又唔抵得佢咁叻，開始我既blog。目標係兩年內數據上高過 佢 用 四年先做出既數據

兩年時間差不多過去，目標仍差少許，但係發現自己開始慢慢失去 打 blog 既 樂趣

我仲好鍾意煮野食，好想同大家分享每一日星期六我同女皇煮過咩食，但係我用左個幾月時間

都未習慣 yahoo 上既變化，諗住轉去facebook 啦，但係facebook 好難打一大段野出黎

而且相片分類方面都唔係好知應該點搞好，同埋宜家公司轉左新位，唔可以好似以前咁自由

每一分每一秒都有人望實我部電腦，打得好有壓力。 我未想放棄 打 blog 架!!

有冇人教我點做..?  我仲好想日日都打 blog......

平時有咩題外話都係轉左去 Facebook 講，可以 join 埋一齊講丫~

蝦油意大利飯

先睇制成品~~

買左半斤 海中蝦，搣個頭出黎 吸乾水

落幾茶匙既油 中細火 慢慢迫出蝦頭入面既鮮味

如果想快的話，可以 搣開個頭煎，不過就危險D

大約 10分鐘左右 應該都好夠架喇

如果 打開個頭炸的話, 有心機的話可以炸到好脆身

仲可以食埋添~

炸好既蝦油 持起備用

留左 少少 油 用黎 煎 蝦  (去殼)

大火煎 十多廿秒，然後 熄火 用餘溫 令蝦 煮熟

以免留失過多水份

請參考 之前 做意大利飯既方法

然後 將意大利飯 放碟

再放一兩茶匙 蝦油 及蝦肉  即可

除左做意大利飯之外，蝦油仲可以放沙律、意大利粉、忌廉湯 等

可以 整好一細樽 放雪櫃慢慢用

而 多出黎既蝦肉可以 烚 好攤凍 放左冰格 要食先拎出黎~~

平時有咩題外話都係轉左去 Facebook 講，可以 join 埋一齊講丫~

忌廉蟹肉南瓜螺絲粉

2011年7月22日 上午10:36

其實我都唔知 lee 隻粉係唔係一樣叫螺絲粉, 反正都冇咩大問題

同邊隻 pasta 都一樣煮到

之前睇飲食男女見介紹 lee 盒蟹肉, 一直都想買, 但係怕佢鯹鯹地

見 Jusco 做特價 55蚊一盒, 所以決定帶番屋企

打開好香既蟹味, 一d都唔鯹, 仲可以見到一條條完整蟹肉

唔錯, 仲可以即食架添, 55蚊都算幾抵食!!

煲水落油鹽煮粉 同埋 切粒既南瓜一齊煮

煮到咁上下開另一隻鑊煮忌廉蟹肉個汁

蒜蓉起鑊落忌廉同埋蟹肉, 忌廉如果兩個人的話可以落一盒都okay

蟹肉都係一盒兩個人份量

意粉 同 南瓜都應該煮得 7788

可以放埋落忌廉汁一齊煮, 再落少少意粉水溝稀個汁

最後可以落少少菜絲 熄火, 用餘溫煮個粉就食得架喇

題外話

早前屋企電熱水爐有問題導致要用凍水沖涼，諗番都有十幾年未試過。

對上一次應該要數去沙灘玩水之後沖涼，之後都病左好幾日

好彩今次都係沖左一次就有番熱水，如果唔係都唔知捱幾耐

話雖如此，原來夏天沖凍水涼出黎咁係爽。平時沖熱水涼有幾熱沖幾熱

沖完出黎都要開大冷氣抖大半個鐘先唔出汗，但係沖凍水涼就一出黎好清爽既感覺

不過都係唔好搞我，我都係鍾意熱水沖涼多。

大蝦蟹柳菠菜黑松露扁意粉

2011年7月11日 上午10:13

一碟意粉 用 4 - 5 隻 大蝦 , 一手菠菜,  5-6條靚蟹柳 應該夠架喇

用意粉定扁意粉隨你, 但係菠菜只係要葉
新鮮蝦定雪蝦都冇咩所謂, 反正我都唔係好識揀..

開個煲烚意粉, 煮到 半熟就開始用另一隻鑊
一匙牛油, 加少少生油, 因為牛油會燶得好快, 落少少油會減慢速度
落蒜蓉爆香後落蝦 同埋蟹柳, 記得用大火煮蝦, 肉會彈牙好多架
接住落1/4 盒忌廉, 一匙黑松露醬, lee 個時候 意粉應該 煮到 7成熟
可以放入鑊煮一陣 奈到收水, 再落少少意粉水 同埋菠菜同埋少少鹽
煮一陣 就可以上碟架喇, 上碟再落少少黑椒......














題外話
人愈大唔知點解覺得冇咁執著, 雖然........我都唔係真係好大, 都係 26 歲左右
諗番以前既日子, 好主觀, 咩都係自己0岩曬, 一定要人聽我講野
做 group project 就我話事,  雖然到宜家都有出現, 但係冇以前咁惡
0係屋企我係獨生子, 咩都俾最好既你, 但係屋企冇比較就唔會珍惜你有既一切
明明好錫你買部 幾千蚊既 MD 機比你, 聽幾個月就話唔要, 要電話, 又幾千蚊
話就話果時好境, 個個都好捨得洗錢, 但係到出黎做野搵錢自己洗先知
搵錢真係好難, 做咁多野先得雞碎咁多, 又要受氣, 又要聽人講是講非
0係公司既時間仲多過0係屋企, 番左工之後就冇心機搵朋友出街
食咩都要計過, 叫可樂都要望下幾錢, 唔再好似以前問亞媽拎錢洗
好在亞媽由細到大都教我買野唔好做分期, 覺得有錢先好買
如果一樣幾千蚊既野要你供 12個月, 都係幾百蚊一個月
聽落好似好少咁, 但係當你做得一次分期, 你自然會有第二次第三次
計計下就 幾千蚊一個月, 到時一個唔覺意失業冇野做你就大鑊
當然買車買樓除外啦, 如果你可以一炮過俾現金買樓的話, 講聲我知
我想幫你數錢, 我未試過摸過咁多錢, 同埋應該都幾震撼!!
講番 番工 lee 樣野先.........
有時都唔知自己想點, 明明好唔鍾意lee 個工種
但係人工好, 又可以成日吞 pop, 愈做愈 hea
你問我想做咩我又答你唔出 問我有咩專長我更加答你唔到
問我對咩有興趣, 我又唔識答, 我樣樣都識少少 樣樣都有少少興趣
到宜家咁大個人都唔知 一把鋒利既刀, 定係十把唔利既刀 好呢?

青口黑松露扁意粉

2011年7月07日 上午10:05

到左最後一日, 當然出一個比較上煩既野啦
之前都係蒸同炒, 快靚正, 雖然話今日lee 個比較煩
不過我諗你地咁叻, 明我講咩既

唔洗講青口都係洗好搣走d毛啦

切洋蔥絲, 紅椒絲, 蕃茜, 蒜蓉

拎兩隻鑊一個煲出黎

一個煲落油鹽煮意粉

一隻鑊蒜蓉起鑊, 落洋蔥紅椒, 煮起落cream 同埋一大匙 黑松露醬

再落少少煮意粉既水溝稀少少, 一陣再用

另一隻鑊蒜蓉起鑊煮青口, 落少少白酒煮, 大約一分鐘就可以架喇

之後將煮好 8成熟既意粉放落有酒煮青口果隻鑊, 希望意粉吸收酒香

當收水果時就可以落另一隻鑊既黑松露忌廉汁, 最後落蕃茜就可以上碟食得

其實我都覺得幾煩, 如果簡單d....可以......
蒜蓉起鑊落青口, 白酒, 再落忌廉, 再落黑松露醬撈意粉






題外話
有時都唔係好明自己d 脾氣點解可以咁臭
有時可以好失控不理後果咁講野
EQ 都未可以去到一個可以接受既情況
所以 catherine 話得我0岩, 我真係要收收把口
有時唔經大腦講既野最傷害到人

青口蒸蛋

2011年7月06日 下午02:34

今日真係熱到痴肺, 你地知我人肥怕熱, 行兩步就出曬汗

仲話要出街做野, 行黎行去, 人都乾..番到公司冷氣又唔夠, 攞命!!!!

幾隻青口搣毛洗乾淨汆水

用 一份凍滾水一份蛋 再落少少魚露同埋蟹柳 包保鮮紙隔水細火蒸 7分鐘

熄火焗 5分鐘就可以食得架喇, 如果想香口d, 可以好似我咁落少少 蕃鬼佬芫茜架

題外話

琴晚同女皇去 director's club 睇 變型金剛

係就係幾好睇既, 大部份時間都係打多, 而個女主角冇上兩集咁好

都係行行企企, 唔似之前咁有活力, 而文仔佢地都冇咁有型

再講, 登登 同埋 敵敵 都死左, 咁仲會唔會有第四集呢??

同埋以前元老級既 機械人都冇出現, 變成 大部份機械人都係車既變車

我覺得開始冇咩新意, 如果鍾意睇佢地打的話, 真係好吸引, 冇悶場

每一分鐘都好有攝力, 但係故事性不足, 同埋過份人類認知化

唔知你地睇左未呢??  未睇快d去睇啦, 其實幾好睇架!!

咖哩炒青口

2011年7月05日 上午10:10

琴日試左清蒸, 今日黎一個炒!! 扮泰國感覺

先洗好青口, 搣走d毛, 切少少唐芹粒, 洋蔥粒, 紅椒粒

之後就蒜蓉薑片起鑊, 再爆香唐芹粒, 洋蔥粒, 紅椒粒

落一湯匙咖哩醬, 落少少糖, 落青口, 落半碗水, 蓋上蓋

大火焗 30秒左右, 落唐芹同埋蔥 埋少少茨就得架喇

快靚正呀!!  青口唔好煮咁耐, 會好老架

題外話

其實我個網名都唔係改得咁好, 我話就話東主有喜 姐

事實上個個都叫我做東主, 問題出現喇

我又唔係真係東主, 而且東主lee 個名最常出現最常見到既就係新聞

而且講親東主都唔係咩好野, 都係俾人追數, 俾人斬, 俾人偷野

都好彩打 blog 打左年幾都未試過有咩事發生

俾人叫左東主年幾, 老實我都仲係未習慣

當然啦, 唔慣唔慣, 都接受左

果時都冇諗過自己咁有心機打咁耐 blog

清蒸青口

2011年7月04日 上午11:19

上幾個星期行過 city super, 有得試食青口, 聞一聞就暈.

食埋落口覺得仲好食過生蠔, 再望下個價, 138蚊一包 覺得好鬼抵食

可惜遲遲都未有時間買番黎食, 等到上星期六終於可以買一包番屋企試整

d 青口係未死架, 番到黎洗下搣走d毛就可以煮架喇

講明!!!   我唔係賣廣告!!!!  不過lee 隻青口 除左 city super 之外未見過

當然有其他牌子啦, 但係我冇試過, 唔敢講好唔好食

百幾蚊一包幾十隻青口, 貴就貴d, 但係物有所值!!!

簡簡單單試下跟俾我試食果個亞姐 清蒸試下點先~~

不過我落左少少薑一齊蒸, 大火隔水蒸 5分鐘即食!!

就係lee 包喇, 認住佢, 真係好好食!!

點少少靚豉油再落少少滾油, 人生一樂也!!!!

聽日 後日, 大後日都出青口post ~~

題外話

我個腸胃好差架, 出街食飯成日都番屋企肚屙

好多時唔係食物本身問題, 係我心理上既問題

唔知你地有冇聽話心理會影響身理?

我好明顯係其中一人, 覺得d食物會肚屙, 隔一日真係屙到腳震

而每當我煮飯果時都會煮d自己未煮過既野

每一次都同女皇講 " 希望你唔好肚屙啦"

有陣時都唔知自己咁溝法會唔會有事

自己有事就算喇, 唔好搞到女皇丫麻

好好彩, 屋企煮野食一次都未試過有問題

我要多謝女皇俾我信心, 成日煮完出黎都搶住食, 仲話好食

海鱸冬瓜湯

2011年6月22日 上午10:17

一到夏天就會諗起冬瓜, 聽講又靚又消暑, 事實上係唔係我就唔知喇

而我亦都諗到一個唔中唔西既菜式, 希望大家有興趣啦

city super 買既新鮮羊肚菌, 不過都係乾既香好多

如果買都係買乾架啦, 貴d, 不過又香又有排用

我用左半斤冬瓜, 其中留番少少切粒一陣用

落幾大碗水, 一湯匙黑椒, 一湯匙芫茜籽, 幾隻羊肚菌

細火煲 最少一個鐘之後隔渣

變成冬瓜清湯

回鑊中火煮海鱸魚大約一分鐘, 落先前切好既冬瓜粒

反魚, 煮多分半鐘左右就可以上碟架喇

碟底我仲放左少少 BB 菠菜, 滾熱既湯上碟, 最後落少少紅辣椒粉 同埋少少欖油

題外話

我成日都好想試下玩以物易物 lee 個 game,

唔知大家有冇試過呢???

如果真係有興趣, 我地可以0係 lee 個blog 玩喎

真係 work 的話, 都唔錯丫

你地覺得點?