味噌湯

栗米湯

前兩日聽亞媽講先知原來屋企一直都有  Now 既 101 台

哈哈, 搞到我鬼咁開心, 即刻打開睇番 煮角 最近五集

有一集見 Ricky 整 栗米湯, 咁簡單, 二話不說  98% 照抄

點解係 98% 唔係 100% ?

因為 1 % 係 我用烤紅椒

另 1% 我用 3.6 北海道牛奶

紅椒真燒過去皮先香滑架

直接 原個 放爐燒

燒到成個 9成 變黑 就最好

唔好怕燶唔食得

因為唔燶去唔到皮

期間會有 拍拍 聲, 正常架, 放心, 唔洗驚

時間關係, 我燒到一半就算

放入大碗, 包保鮮紙

焗 最少 10 分鐘

之後就可以好易搣 皮架喇

特別係愈燶愈易搣, 記住喇!!

就係唔夠時間慢慢燒, 搞到有d地方搣唔到~~~

隨你點切啦, 可以做沙律又得, 煮又得

你又試下丫~

講番個湯先

一碗湯用一條粟米切粒, 牛油起鑊爆香炒粟米至軟身

落1/4碗雞湯 1/4 碗熱水煮一陣

落 3/4 碗 牛奶 煮, 落少少黑椒, 鹽

煮攪拌機 打到爛, 隔渣

番煮 滾起

另一方面 用少少牛油 炒香 法國豆, 紅椒

拎隻湯碟出黎, 先放法國豆, 紅椒

再慢慢四邊放湯, 搞掂!!!

其實  lee個湯　份量好隨心

多粟米又得, 多奶又得, 多雞湯又得

個湯真係好好飲, 飲完好幸福既感覺~~~

海鱸冬瓜湯

2011年6月22日 上午10:17

一到夏天就會諗起冬瓜, 聽講又靚又消暑, 事實上係唔係我就唔知喇

而我亦都諗到一個唔中唔西既菜式, 希望大家有興趣啦

city super 買既新鮮羊肚菌, 不過都係乾既香好多

如果買都係買乾架啦, 貴d, 不過又香又有排用

我用左半斤冬瓜, 其中留番少少切粒一陣用

落幾大碗水, 一湯匙黑椒, 一湯匙芫茜籽, 幾隻羊肚菌

細火煲 最少一個鐘之後隔渣

變成冬瓜清湯

回鑊中火煮海鱸魚大約一分鐘, 落先前切好既冬瓜粒

反魚, 煮多分半鐘左右就可以上碟架喇

碟底我仲放左少少 BB 菠菜, 滾熱既湯上碟, 最後落少少紅辣椒粉 同埋少少欖油

題外話

我成日都好想試下玩以物易物 lee 個 game,

唔知大家有冇試過呢???

如果真係有興趣, 我地可以0係 lee 個blog 玩喎

真係 work 的話, 都唔錯丫

你地覺得點?

青豆牛奶湯

2011年3月14日 上午10:05

一向湯水都唔算係我既心頭好.....
覺得一飲完就食唔落野
咁樣好唔抵, 最衰自己個胃唔似得以前咁可以食咁多野
不過如果有心理準備飲湯的話
就會計劃一下果餐應該食d咩, 唔好令自己個胃太大負擔


普遍黎講西式湯都比中式湯黎得簡單
簡單在於時間上既控制, 份量既控制
唔似得中式湯一煲就十幾碗
見到想覺得悶...


做法大致如下..........
爆香少少煙肉, 炒香大蔥及洋蔥, 及青豆, 落清水雞湯
煮一陣打至希巴爛, 隔渣, 回鑊, 落牛奶及忌廉, 鹽黑椒調味
煮至少少掛汁, 落少少牛油就搞掂.......飲得.....

題外話....

日本單野點慘點慘都唔洗我再講架喇..

我諗世界上所有既人, 著左 7成既人都知咩事....

個個都話" 人類真係好渺小, 永遠敵不過大自然"

反而......我有d好奇怪既諗法...........

地球上既人類每日都諗點樣多d權力......

但係一到咩大災難果時就變得好無助

需要第二三個國力幫忙

其實真係好似小學生咁

成日講 "嘿, 我話俾先生知, 我告你"

再唔係就講" 嘿我同你絕交唔做朋友呀"

一d就好似反叛既學生咁" 你俾唔俾我呀, 信唔信我打你丫拿"

但係到先生校長記佢地缺點, 見家長果時就扮可憐......

我個人黎講, 我信有外星生物...

而我亦信好多星球比我地更文明, 更高科技

佢地可以用自己既頭腦對抗好多自然環境

點解地球人唔可以呢??

我覺得地球如果發展平衡的話

下一次既百年一次既地震 就少好多人死亡

同埋到時可能有科技感應所有既天災

正等如一百年前既人都冇過一百年後既社會會有咁多大型飛機一樣

其實只係地球既人團結, 唔好再各自發展社會的話

一百年後, 應該可以有另一番景象.....

但係今日黎講...都要祝福日本東北面既人

希望世界上好似龍珠漫畫既元氣彈一樣

發送正能量到你心入面, 感受人間有情

sorry, 我發緊 up 風.........

洋蔥湯

2010年9月22日 上午11:12

真既洋蔥湯我就唔識整喇
扮下就okay...哈哈
今日中秋節喇.
真係話咁快又一年
唔講咁多, 公司多野做...
講明先, lee 個係 我東主簡易版既洋蔥湯
有錯唔好話我
最多大家分享下, 交流下好喇, 哈哈


材料  (二人份)
洋蔥                   三個
雞湯                   200ml 
滾水                   300ml
麵包                  一片
芝士                  少少
白蘭地              20ml 左右


做法
1) 洋蔥切幼條, 開平底鑊落少少油, 最細火 炒到深啡色  ( 大約 要 1個鐘左右)
2) 落雞湯, 落水 落酒 慢慢煮 10分鐘左右 就搞掂架喇
3) 預熱焗爐至220 度, 落麵包, 再落少少芝士 焗 10分鐘即可


雖然唔係咩正宗洋蔥湯
但係 都要記得用細火煮洋蔥
同埋一定一定一定要 煮到 深啡色 先會出味架
如果唔係, 你同飲熱水冇分別架喇

芽菜蕃茄排骨湯

2010年7月16日 上午11:38

材料 (二人份)
芽菜           3蚊    (唔知即係幾多斤兩)
排骨           20蚊  (唔知即係幾多斤兩)
蕃茄           3個
薑                一大塊
水               1.5公升

調味
鹽               適量

做法
1) 芽菜摘去根部, 浸洗; 蕃茄一開四, 排骨汆水
3) 所以材料一同放入滾水, 蓋上蓋, 中火煲45分鐘 即可, 食用時因個人口味放鹽

tips
1)排骨煲出黎既味會甜d, 如果大家鍾意食肉可以用瘦肉代替
2) 蕃茄要揀硬身, 同埋揀中國既大蕃茄好d



題外話
琴日同女皇講 " 如果可以做到人地問我咩都識答你話幾好呢"
我諗諗下, 俾你知道全世界所有知識又點呢, 你只會愈諗愈多, 只係愈多麻煩事
做人應該簡單, 直接d 好......就算得到世界, 冇左女皇, 又有咩意思丫....

粟米魚肚羹

2010年6月05日 上午11:59

行街市見到有d 沙爆魚肚賣.......12蚊一包..
我又唔識整, 所以膽粗粗買左一包番黎...諗住整好耐冇食過既魚肚羹
我聽街市個婆婆講番屋企要浸水發一個鐘
我就一次過放曬落去發.... 先諗.......死喇.....唔記得左咁大包食唔曬添
真係太多.我諗發左 4次既份量........
因為我唔識整魚肚, 都係第一次.....所以冇咩點諗過lee 個問題
算啦, 都浸左啦........咪切好曬一粒粒先囉, 唔係點姐......
最多留番俾亞媽用黎炒啦......
發好, 切好就可以落自己既份量落煲, 爆 爆佢再落少少雞湯煨一煨佢
大約煮幾分鐘, 就可以落一罐巨人粟米湯再落同等份量既水同埋同等份量既雞湯
慢火蓋上蓋煮 15分鐘左右, 等去左d 水, 就可以打茨, 再打一隻蛋花....
lee 個湯真係冇咩難度.......又好飲.......




btw, 我煲左出黎先知個份量咁多.....
我同女皇兩個人一半都飲唔曬.......
我諗如果跟我份量的話,  5個人應該都唔係咩問題.....






唔知大家鍾唔鍾意飲架呢...?

蘑菇湯 + 心型多士

2010年4月21日 下午03:30
蘑菇湯

琴日有個朋友問我講下我點整蘑菇湯
我二話不說話今日即出post 俾佢..哈哈 都算俾面你喇掛...


做法都好簡單
準備不同蘑菇切片, 開鑊落油爆香, 之後落一早切好既洋蔥粒一齊爆
之後落少少牛油再爆多一陣, 應該會好香架喇宜家...
之後落水, 唔好太多, 煮多一陣 就可以放入攪拌機將所以野打爛
再放番落鑊, 煮滖左之後慢慢落少少少既牛奶, 同埋 cream
lee個時間可以　落少少黑椒 同埋 鹽 調味
最後落少少牛油落去搞掂......


當然啦, 我仲有好多個方法去整蘑菇湯
我同大家分享既係一個最簡單既版本...
有機會遲d再同大家分享中階同高階班既 蘑菇湯啦..哈哈

大家睇下......係我0係 facebook link up過黎架
係唔係好唔同呀～～
死人yahoo..!!!!!!

辣椒葉瘦肉豬肝湯

2010年4月19日 下午12:00

辣椒葉瘦肉豬肝湯

做法簡單, 需時少, 營養高

準備10蚊豬肉切片, 一斤 辣椒葉, 10蚊 豬肝切片
辣椒葉浸洗乾淨切段, 豬肉豬肝同少少生粉生抽胡椒粉同埋水醃大約 15分鐘
開大約兩公升水, 拍兩大塊薑落去, 落豬肉同埋豬肝
由於我唔食d 肉, 只求味道, 所以我選擇一早落, 等佢出味
滾大約 15分鐘, 可以落辣椒葉, 大火滾 15分鐘, 落少少大孖盆鹽, 試味, 搞掂....

如果想食埋d 豬肉的話, 我提議用排骨, 唔好用瘦肉
如果想食豬肝的話, 可以遲少少, 就黎滾好果時先落, 滾一滾, 熄火, 焗5分鐘搞掂
如果想d湯好飲d, 落埋d 徑, 最多唔食...因為果度先甜, 不過就食唔落肚果隻..

紅衫魚蕃茄湯

2010年4月02日 上午11:00

紅衫魚蕃茄湯

紅衫魚, 見幾靚,, 隻隻魚d眼都咁可愛...哈哈...所以唔好意思喇....

28蚊斤, 買左 42蚊..........

都係打格仔好d,, 廢事有人話好核突啦..

買番黎沖沖水, 洗走入面d 核突野.

開鑊落油, 拍一舊薑落去, 準備煎魚....

即係蒸之前用廚房紙印乾左先好落鑊呀

唔係好危險, d 油彈到你死..

煎好一面, 煎另一面, 煎到金黃色就掂架喇

中火煎好喇. 唔係好易燶架.

因為我多過頭, 一隻鑊唔夠煎, 所以拎左佢地....煎埋先.

其實宜家都食得........哈哈

可以回鑊, 加滾水落去.........蓋上蓋, 大火煲 30分鐘左右

其實lee 個時間都可以飲架喇.......又可以做好多菜式既base

同一時間可以準備蕃茄

我買左買左 5大個蕃茄

將佢地一開 8..

拎個煲出黎水滾先好落蕃茄

一樣大火煲30分鐘...

可以留意到我唔會放太多水......

因為一陣仲有d魚湯...

兩邊一陣煲緊既情況........

次後可以搵個隔出黎隔走d 魚, 只係要湯, 唔要魚

一次過倒曬d 魚湯落蕃茄湯入面

記住要慢慢隔d 魚骨, 因為太細條........驚彈左出黎唔知

廢事大家大啖大啖飲果時 整親就唔好....,

之後就一齊煲多 20分鐘左右, 就搞掂架喇........

飲果時先跟自己口味落少少鹽同埋胡椒粉丫.....

當然啦, 我一定用番我既大孖盆鹽.......即時唔同曬....

係唔係好簡單呢.........0岩曬我lee d好驚食魚既人......

同埋加影

早幾日發現 citysuper 有得賣牛茄.

嘩....牛茄喎, 出曬名勁甜....好爽口

我諗緊......咁細隻.....甜唔甜呀....

但係又諗, citysuper d 蕃茄不嬲都好正, 應該冇問題既...

於是 27蚊 買左兩隻番屋企....超貴...

唉..........點知一d 蕃茄味都冇.....唔好講甜味......

俾人呃左 27蚊...好唔開心....

都係等 我美國既叔叔 果d 好d....

蕃茄薯仔排骨湯

2010年3月11日 上午11:25


蕃茄薯仔排骨湯

lee 個湯做法簡單易明, 上班人仕都0岩煮
只需要準備半斤排骨, 兩斤蕃茄, 兩個大薯仔, 半個洋蔥同埋 兩片薑 就搞掂.
排骨可醃可唔醃.........如果醃的話, 可以用少少鹽花醃1個鐘
之後再洗乾淨........
蕃茄一開四, 薯仔 用滾刀, 洋蔥一開四,
拎一大個煲出黎放水, 之後可以一次過放曬d野入去煲, 大火煲 45分鐘就搞掂
係咪好簡單呢~~~~~


實驗
話說 琴日咪出左個blog 係講大孖醬料既~~~
琴日有機會試下d 鹽喇終於
上面果個湯我一d 鹽都冇落....
所以理論上只有 原材料既味
咁我既實驗就係咁既......
分別有 四 碗湯 放0係枱面
(1) 咩都冇
(2) 落左少少普通鹽花
(3) 落左少少盆曬生抽
(4) 落左少少盆鹽


先先飲一啖 咩都冇.....飲落去都好清甜, 好滿意....
再黎飲一啖普通鹽花, um.....只係鹽左少少既湯囉, 冇咩特別....可以落可以唔落
飲多一啖 咩都冇 清清個口
之後到盆曬生抽, um.....我覺得麻麻地喇, 少少又唔夠, 多d又太勁豉油味
又飲一啖咩都冇清清個口
再最後..既盆鹽, 真係驚為天人!! 我同女皇 都不停問有咩唔同
點解會咁大分別.....好似落左味精咁....我地所指既味精係 因為只係落得好好好少鹽
就可以令到成碗湯唔同曬.....活潑左好多........
當然啦, 據我所知, 薯仔黃豆蕃茄同埋昆布都有好多"鮮"味
而味精聽講都係用lee d 材料提煉出黎.......
所以話似落左少少鹽就好似落左味精咁都冇錯架.....
原來盆鹽 撞 蕃茄湯係咁 好飲....真係驚為天人......

大白菜滾鹹蛋瘦肉湯

2010年3月07日 下午06:05






大白菜滾鹹蛋瘦肉湯

你應該會問我有咩咁特別........

就係睇唔出有咩特別, 但係就得到好飲........
話你知個原因啦.......就係用左 新界有機大白菜...
嘩

, 飲落去驚 為天人 !!!!
鹹蛋只係0係街市買 , 6 蚊 4 隻, 但係我要一隻就 2.5 蚊  (會唔會俾人呃左)

不過好在個蛋黃咬開果時D 油出曬黎

, 而且仲咬落去放入口就溶左......
超好食.........
大白菜清涼, 鹹蛋下火...........0岩曬我同女皇, 因為我同佢都生左幾粒大孖瘡

其實我唔係好覺得係滾湯, 因為我都用中火滾左 足足 1 個鐘






講下我點整先啦........
材料極之簡單, 去買一斤大白菜, 10蚊瘦肉, 一隻鹹蛋, 少少薑, 搞掂..........
瘦肉切片, 醃一醃
洗乾淨D 菜, 摵好一塊塊, 浸一陣
開個大煲放兩塊薑片去滾, 滾 5~7 分鐘左右
落肉片, 大火煲 15分鐘, D 肉會有D 血水, 搞到煲野個面頭會有好多泡泡
"筆" 起d  泡泡唔要, 之後可以放曬d 白菜落去, 中火煲30分鐘左右
lee 個時候都已經好好飲好清甜, 我再落少少雞湯,等個湯再完美d......
再煲10分鐘, 可以拎起d 菜同豬肉先
之後扢隻鹹蛋落去, 熄火, 唔好理佢, 5 分鐘左右
可以開番大火滾番起個湯, 咁就搞掂喇
我同女皇 好快手咁樣飲曬......因為實在太好飲.....
想飲多碗都冇曬.......


又一次大成功!!!!

我諗咁好飲, 好大原因係關於d 菜......真係有機既菜好食d??