脆皮雞脾

早前有BLOG友Whatsapp 問我如何焗雞，而事後她亦告知我做得相當成功，令所有朋友讚不絕口，在這我分享少少焗雞的小小心得。

焗一隻全雞有很多方法，但要做到皮脆肉滑、胸滑脾熟翼尖不燶就要講少少技巧，而這個技巧是要你有一個大焗爐。(說笑..哈哈)

有人說先用鹽水浸過晚、用不同香料醃過晚、先浸水後焗、又大火又細火、又說雞腔放檸檬等等等方法，而我本人一向即興派，所以我不會醃過夜而且直接入焗爐，醃料方面以個人喜好而放，辣椒粉、芫茜籽、鹽、老抽、黑椒、芥末、檸檬皮、不同香草 以至不同茶葉，然後替全雞做美容段的按摩一會即可放入焗爐用140 – 150 度的低溫焗，當然時間上好在乎雞隻的大小和焗爐的情況，平均來說一隻兩斤重的冰鮮雞最少焗 四十五分鐘而春雞要三十分鐘，如果放安全計的話可以有三個方法，而且不會影響風味和口感。

(1) 用小刀在雞胸和雞脾位置開兩刀，以便熱力易於進入 

(2) 先放鑊煎香表面才放入焗爐，以便減少焗爐加熱時間 

(3) 轉120度低溫再慢焗三十分鐘，而當中不影響肉質。

根據我手上數本焗爐的說明書稱焗雞要用 220度溫度焗，如果用這高溫的話會令雞隻表皮變焦而肉質粗糙而且未熟。如果轉用低溫焗的話則可令肉汁不會被高溫抽走，雞的表皮內的油脂由於時間拖長了，好處(1)減少雞的油脂 (2) 變得酥脆 (3) 保持雞肉的濕潤度。

另外一個小貼士，全隻雞最容易變燶的地方是雞翼尖，就好像我們的鼻子是第一時間曬紅的地方一樣道理，所以最好為雞亦尖做一點防曬，用錫箔紙包著焗就是了。

材料:

        新鮮雞全脾    兩隻

        辣椒粉            兩茶匙

        鹽                    一撮

        黑椒                一撮

        乾露絲瑪莉   兩湯匙左右

        乾羅勒           兩湯匙左右

做法:

(1)    辣椒粉、鹽和黑椒平均地放雞脾上 (雞脾要乾身無水)

(2)    放平底鑊中火上下各煎至微微金黃

(3)    焗爐預熱至140度，底盤放錫箔紙，錫箔紙上放乾露絲瑪莉和乾羅勒

(4)    雞脾放上錫箔紙上，而香草在下，焗30分鐘後轉100度焗10分鐘

好處:

(1)    先煎後焗可令雞肉溫度加快提高 和 作減油的第一步

(2)    低溫慢焗可令雞皮變脆和肉質多汁

(3)    香草放底的原因是它容易變燶

(4)    香草放低的另一個原因是用雞脾走出黎的油令香草味增加迫入雞肉中間
(5)     雞上皮用爐火焗至皮脆，而雞下脾則用雞油炸得香脆

你看! 這就是我的脆皮雞脾!!

脆香雞扒配庫司庫司, 紅酒牛乾菌汁

日式咖哩雞肉飯 (鶏カレー)

親子丼 (滑蛋雞肉飯)

蒜香雞翼

你我天各一方，你有你的生活，我有我的態度。

每天下班帶著疲憊的身軀走上街，漫無目的地跟不

同人仕紙上談兵空口說白話，這樣就過了分手後的

第二百一十七天。

每天過著一式一樣公式般的生活，彷彿停留在二百

一十七天前的空間

沒有了你以後我學會而對孤獨，沒有你以後的生活

變得乾燥

看肥皂劇再笑不出聲，雙眼的眼皮每天都變得沈重

無力

煮一鑊飯和二十只雞翅膀放冰箱，夠我吃一星期

放四匙史雲生調味雞汁到二十隻已完全解凍抹乾

的雞翅膀，靜候十五分鐘

開慢火煎煮至金黃香脆，十五分鐘又過去了

拿起中式菜刀用力拍下蒜頭做出蒜泥和洋蔥絲一

起放入鑊中快炒

用菜刀把蒜頭當成自己一樣恨之入骨地拍碎，大快

人心

切洋蔥切得我眼淚汪汪，空間變得安靜

一天一天的過去，我依舊吃著你最愛的蒜香雞翼等

你回來。

史雲生 May 姐原食譜 按此

p.s.  以上如有雷同 真係 有咁啱..!! 

安東雞 ( 膽粗粗學人煮)

安東雞 - 我剛認識的新朋友，它令我一試鍾情，在我的心裡翻過不停

它的氣味我柔情都令我的心痴痴醉，所以我決定用自己方法上網參考一下後加以改良

做出90% 味道相近之安東雞，都不得不讚一個自己的舌頭呢!!

基本材料:

雞扒 去皮切大舊  兩塊

半條紅蘿蔔  + 半個薯仔 滾刀切

半個洋蔥

芋絲  一包

大蔥一條

乾冬菇  三隻   (浸發)

紅棗     四粒

薑片 二片

蒜茸  三粒

調味:

指天椒 兩隻  切碎

冰糖 一細粒 + 片糖半塊

蠔油  兩湯匙

磨豉醬 半湯匙

味琳  三湯匙

紹興酒 一湯匙

生抽  1/4湯匙

草菇老抽  1/4 湯匙

辣椒粉   大約  半湯匙

水過面，同放雞件、紅蘿蔔、薯仔 和紅棗 和薑 中火煮5分鐘

煮安東雞期間不停 "筆"  走 雜質 同埋雞油, 仲有只可以用中火煮

除芋絲外 可以將所有材料 及調味 放落煲 一齊煮

炆所有食物都一定煮一陣焗一陣

比方說我會煮15分鐘 然後焗 30分鐘 再開火煮15分鐘

重複兩次 再試試味 應該 收水，材料味道都會出黎

注意安東雞係偏甜 同埋食落辣辣地

食前 5分鐘開火再滾一次，順手落埋芋絲  ^^

如果 唔想咁煩，去買盒韓國辣椒醬 + 辣椒粉 + 生老抽 + 味琳 就Okay 架喇

不過我用雞脾肉都不及人地正式新鮮雞，如果想好食D, 去街市買一隻新鮮雞番黎煮啦都係

為配為韓國風味餐，特登買左泡菜同埋紫菜食

大家都試下丫!!   只要材料同時間, 冇咩技術可言就做出咁好食既安東雞

雞翅膀

如果六合彩頭獎是我一個獨得，那我的生活態度以至飲食口味一樣會轉變嗎? 小時候的我並不喜歡雞翅膀，外婆跟母親煮的雞翅膀定必斬開一半煮之，吃得滿口骨碎，這是我小時候對雞翅膀的印象。直到中學食物部有不同款式小吃，例如咖哩牛丸、腐皮卷、咖哩角、鹵水雞翅膀。價錢相當便宜，打比如三隻雞翅膀賣五元正，一天最利害可以吃三十隻，食物部為求方便而使用電飯煲細火無間斷炆煮。極致入味、鬆化而且離骨的境界。打從中學以後就愛上雞翅膀，到中五更愛上雞亦、一種下欄食物。沒有記錯商場小食店十二隻鹵水雞亦尖賣十元正，當然隨後一年店子做不住關了門。

媽媽味道的雞翅膀，一定要數薯仔炆雞亦，簡單好吃。薑蔥下鑊煎香雞翅膀，放蠔油 / 南乳 煮之，薯仔切丁隨之而放，右水至面，細火炆煮三十分鐘，試味，大火收水即可上碟，不會失敗的一道菜，初入廚房之人必學的一道。

朋友間的團體飯局離不開Pizza、打邊爐  以及  "燒野食"。 "燒野食" 當中最受歡迎的是烤雞翅膀。不是我自誇，我敢說我炸雞翅膀是有一手的，吃過的朋友都會說皮脆多汁，主要的要離火慢慢不停轉，心急起來就會烤得焦黑，沒癮。

家中一樣可以做出烤雞亦的感覺，需要一個焗爐，打醃好數小時的雞翅膀放入預熱一百五十度火的烤箱上下火焗10分鐘，再調整至一百一十度焗十五分鐘，包保吃過不停口。而春雞則按比例加倍時間，一樣可以做到皮脆肉嫩的。

Bon Appétit

炸雞肉 配 自家蜜糖芥末醬

睇番張相都想食

Sogo 買左塊 日本黎既 超大塊 雞胸   大約 250g  68 蚊

好貴, 不過比起巴西黎果d就好食d

買番黎切條 切做一口大小

少少糖, 豉油, 胡椒粉, 少少水 醃最少 30分鐘

醃好打一隻 蛋黃  同埋上大量生粉

中火半煎炸 至 少少變色

回鑊 大火炸深色少少 就okay 架喇

炸兩分鐘都應該 熟曬

 炸完出黎應該會咁既色

蜜糖芥末醬

沙律醬, 芥辣, 芥辣籽, 蜜糖

份量自己試0岩 就Okay 架喇, 冇話一定既味道同份量

不過芥辣 就要好多先好食 大約個比例 1份沙律醬, 半份芥辣, 1/4 份芥辣籽, 少少蜜糖

覺得點呀? 係咪睇見麵想食番舊呢~~

lee個就係我自家出品既　麥樂雞 喇

酸甜雞亦

2011年6月20日 下午01:25

唔知有幾多朋友仔估我今日都係出意粉 post 呢?

唔好講你地睇我個blog 會悶丫, 我自己煮都覺得悶

天氣咁鬼熱, 諗到入廚房對住個火都大鑊

最慘係做廚房一日10個鐘對住個大爐果d師傅

出面街都三十幾度, 何況廚房入面, 雖然我未試過入酒樓廚房

不過都估到有幾熱, 俾我都係做番客人, 俾錢食飯好過

lee 碟其實都好簡單, 一次過可以做十幾 隻都唔係咩問題

只係睇係有冇心機慢慢炸香, 炸到少少脆身

雞中亦同鉸剪打直一開二, 吸乾水份

上少少鹽, 再上薄薄既生粉同埋少少胡椒粉

中火炸到少少金黃色, 再轉大火炸多少少金黃色

拎起, 隔油, 攤到凍曬再大火番炸一次, 等佢脆身

之後可以放埋一邊唔洗理佢地, 攤到凍為止

今次 5隻雞亦, 用兩湯匙茄汁, 1/4湯匙0急汁, 少少美極, 少少七味粉

 開鑊, 落少少油, 鑊香蒜粒, 落0岩0岩溝好既汁, 爆一陣

落埋雞亦,  中火煎到收水乾身再落多少少七味粉就okay 架喇

冇咩難度, 係睇你有冇時間慢慢炸, 仲要咁熱先黎炸野.. 痴線!!

題外話

之前我都0係 blog 提過屋企有蛀衫蟲, 琴日谷鬼氣諗住拎d衫出黎搞搞佢

點知發現有兩支雞毛掃俾蛀衫蟲侵占左, 而且為數過百,

情況極之壞, 唯有硬住頭皮搬曬所有野出黎清洗

我就三個鐘不停0係個蜜室同佢地死過

而女皇就慘d, 不停用漂水洗野, 搞到隻手皮膚粗曬, 可慘喇

今次起左佢地個屋企, 希望短時間之內都唔會再出現啦  唉!!

黑椒雞肉白酒意粉

2011年5月11日 上午10:47

有睇開我個blog 既朋友都知我基本上係星期六先煮野

所以一次過會幾碟都都用同一樣材料整出黎

好似今次lee 一碟就同上次果碟一樣

同左苦白菜同埋中國菠菜黎煮 lee 碟意粉

如果你地唔鍾意的話, 可以用其他架, 冇咩所謂, 煮野既野真係好是但..

是是但但有咩煮咩, 唔洗下下跟足, 咁樣會煮得開心d.

今次就0係citysuper 買左四份一隻燒雞番黎一半煮意粉, 另一半整另一碟

最緊要係買果時叫佢俾d汁你, 我要左 普通燒汁, 留番黎煮意粉

番到屋企先拆肉, 搣大舊d都冇咩所謂, 都okay 架

之後就可以開煲水煮落少少油鹽煮意粉, 煮到5 成熟就得架喇

同一時間開鑊落少少油爆香少少蒜蓉, 煮到金黃色

落意粉, 同埋落少少意粉水, 雞湯, 白酒 (可以 dry 少少), 燒汁, 雞肉, 煮到意粉 8成熟

之後再落菜, 再煮一陣, 最後落有鹽既牛油 (半湯匙左右好喇)

最後落大量黑椒, 就可以上碟喇

最好睇下煮果時d 水吸收到咩程度, 因為 意粉落鑊之後會吸好多水份

如果唔夠就再落多d意粉水 / 雞湯.....其實白酒都可以落半杯左右既份量

題外話

夏天就黎到, 又係我最憎既時候, 我好怕熱...唔知係唔係肥既關係

一熱就成日痴立立咁, 脾氣都大好多, 而且我又唔識游水, 所以都唔期待夏天既出現

好搞笑, 其實我以前係識游水架, 做童軍果時的仲拎過 400米自游式既銀牌

細個果時我真係好期待夏天, 可以日日去游水, 曬到好黑蚊蚊咁

因為有一次0係深水灣游水浸親, 之後就冇再落水玩......所以就唔再識游水

但係我都冇後悔我唔識, 因為我到宜家都仲好驚水

好多時浸親既晝面仲會0係個腦出現, 不過又唔係好影響我平時既生活

咁就唔理佢啦, 最多唔玩水上活動咋麻

唔知你地有冇D唔開心既經歷而令到你日後既生活有影響架呢?

黑啤蔬菜炆雞柳

2011年4月07日 上午09:36

炆野, 我諗係人都識架喇, 不過我點都唔信會有人好似我咁
拎黑啤同埋雞柳去炆咁搞笑, 黑啤又苦, 雞柳又鞋烚烚咁
不過我用左一個洋蔥, 幾十粒珍珠洋蔥仔, 百里香, 香葉, 茴香, 青椒, 4個中國蕃茄
仲有同等份量既雞湯, 仲有少少冰糖
煎封雞柳再細火慢慢慢慢咁炆, 我足足炆左 4個鐘
肉質變得好軟身, 唔似食開吞唔落既雞胸肉咁
我有個提議, 炆好之後, 先好調味, 同埋可以用叉整爛d雞肉
變成一絲絲咁, 咁樣仲好食, 不過我諗都唔會有人跟我整lee 碟野架喇
比我都唔會再煮, 其實個味未必個個都接受, 叫你飲黑啤都難啦
仲講拎去炆野, 其實都苦苦地架, 不過果隻甘香味又幾過癮既
最重要係連埋d菜一齊食先好食...
都唔知lee 碟野當佢係中式定西式好
如果一定要我揀, 我會覺得lee 碟係英式感覺多d
不過果晚有個朋友上黎我屋企食飯
佢拎左湯飯上黎, 湯一盒飯一盒
所以我就飲湯一碗, 飯一碗.....哈哈, 明明係湯飯, 變左質...
搞到個朋友好唔開心.....明明食湯飯........








題外話
點解今年遲左一個月都未有青梅既???
我睇番上年浸d酒都一年喇...
等我今晚睇下浸成點先, 如果係就要再買再浸丫麻
奇怪喇~~~ 你地見到街市有貨未呀?

芥末忌廉雞肉扁意粉

2011年4月04日 下午04:13

芥末忌廉雞肉扁意粉

有留意我個blog 都知前幾日打既文字好奇怪, 完全唔似東主本身既打法

又有人問係唔係我打, 又有話我唔0岩咁打, 但係都有朋友話咁好睇

所以我決定間唔中都會打下咁樣既 post, 唔好下下用 把口 打字咁

老實講, 都真係好難睇, 果d " 呢" "架" " 咋" 喎"  真係可以好順咁睇

其實我都唔係咁好意思咁打法, 我指 之前咁打,

因為見過我既人都知, 我個樣唔似咁小品, 都係0岩宜家既打法

哈哈, 0岩既, 無謂扮斯文丫, 可~~

入番正題先, 對於意粉, 我真係有一種心癮, 唔知點解成日都好想食

好多野去到我手上都可以煮意粉, 雖然意粉係意大利野

但係老實講, 我既煮法我覺得似日式多d, 而且 梁文道都講 話可能過多幾十年

日本既意粉文化會比意大利做得更出色, 冇咁死板

之前咪講過屋企隻狗狗升左天既~

佢既遺產入面有一包雞柳, 係一包好難吞難肚既雞柳

但係我用左兩個方法令佢變得軟身, 易吞d....

今日講第一個方法, 其實最主要黎講係將雞肉 拉一拉油 先煮

同埋唔好用大火煮, 如果唔係就好易走左d水, 變得好乾

而扁意粉方面 本身比較吸水, 所以一係煮軟身少少, 一係 煮多少少汁,

如果唔係好易乾曬架喇

而至於個汁方意都好簡單, 主要用牛油, 少少白酒, 蒜蓉, 忌廉, 雞湯

基本上 15分鐘應該可以搞掂食得

一邊煲意粉, 煮 10分鐘左右

另一邊開鑊細火煎一早切好一條條既雞柳, 煎 十幾廿秒, 少少白危就okay 架喇, 之後放埋一邊

落 5g 左右既牛油, 再落少少生油, 驚d 牛油好易燶

再落一粒蒜蓉, 記得用中細火煮喎..!!

之後落埋d 雞柳, 再煮一陣, 大約煮 1分鐘左右啦

再直接落忌廉, 一個人大約 半盒細既忌廉先夠, 之後再落 兩湯匙既 芥辣

再落少少白酒, 同埋 想比起忌廉一半既雞湯

lee 個時間應該可以睇下d意粉 煮成點

如果已經軟身, 就可以放落個汁一齊煮, 煮到少少收汁

就可以 落一湯匙左右份量既中式芫茜碎

快手上碟, 之後 放一隻蛋黃落去, 咁樣個意粉會香好多架!!!!

 有咩唔明再問丫, 我好樂意答架..!! 

咖哩雞

2011年3月02日 上午11:18


雖然琴日已經出左 post, 但係琴日都提及過我煮左三碟出黎揀
見橫掂都煮左出黎, 影埋相, 冇理由唔同大家 share 下丫
順便又可以幫我參賽果碟賣廣告丫麻....哈哈
你知啦, 講人氣我真係輸足 9 條街架..........
所以要賣多d廣告, 大家幫幫手, 哈

0係吉之島見到春雞好平......而且d肉都幾實的的...唔錯..

買番黎洗乾淨, 用廚房紙搽乾.....吹乾一陣

3:1:1 既份量 落 咖哩醬, 潮州辣椒油, 同埋辣豆板醬

裡裡內內 都醃, 醃最少 1個鐘, 最好 三個鐘左右啦...........

車厘茄個底 切開少少, 等焗果時可以出水
1) 可以令隻雞冇咁乾身
2) 可以令成碟野清新好多...

200度 焗 10分鐘, 150度 焗10分鐘, 250度 焗 10分鐘
上下火喎~~~

焗完d雞油會同蓄茄汁變成一個汁.......一陣放埋上碟

露荀, 青瓜, 甘旬切粒,
落油先爆廿旬, 再落露旬 最好落青瓜
爆炒一陣 落咖哩醬, 炒勻, 搞掂!!

又賣廣告先......

你地投左票未呀~~

我個人氣仲輸緊呀~

我既參賽作品 - 鮮 辣 牛小排

http://hk.myblog.yahoo.com/speedkung/article?mid=9990

我知今次如果入到決賽同埋羸埋冠軍的話就可以獨得 10,000 蚊 超市券及獎品

你地唔好以為係得幾個人參加喎, 我地只係為左個網頁有d野睇 而比你地早玩架咋

不過有少少條件要先可以參加

1) 要用李錦記既產品

2) 主題係健康、創新同Fusion

3) 三月二十七日前上載食譜

4) 要有埋步驟 同埋 準確既份量

大家都黎玩下啦, 冇死架, 試下咋麻........

如果想多d機會 / 分數 的話, 就係叫大家身邊既朋友 去李錦記個 網頁

投票支持, 愈多人投票, 分數就愈高,

唔好以為投票只會益人, 對自己冇好處喎....

李錦記仲話 頭 500個投票既朋友

仲有機會拎到 「李錦記米芝蓮名廚自家煮秘笈別注版」一本

如果係真的話, 你都咪話唔著數..........

簡單投個票, 入個會, 填少少個人資料就有, 我都叫女皇做馬投左我一票

因為我都想要番一本, 唔好蝕丫麻...

而大家想投票的話可以到以下既網址

http://blogger.lkk.com/vote.php?recipe_id=14

老老實實, 真係幫幫手投票...

投票由即日至4月9日截止！

燒茄子紅辣椒雞胸肉

2011年1月24日 上午11:13


lee 幾日心情都麻麻地, 原因係有兩個朋友不某而合咁因同一病而入院
雖然老實說東主幫不出什麼忙.....請見諒小弟內心是 10萬個擔心的
病真是令人可怕.......無聲無色的來, 亦可能令人無聲無色的走
多可怕.!!   小弟身體亦不見得的好, 好飲好食, 兩年沒運動...肥也.胖也.
靚太!! 小弟特意為你送上一碟健康肉食, 清清的...亦可口的
請笑納 東主心意....

                                             大家覺得lee 張靚d

                                           定係lee 張有feel d 呢???

靚太老遠從新加坡帶來給東主的小禮物
味道固然重要, 但心意更甚, 多謝靚太...

材料
雞胸肉                                      3條
紅辣椒                                      一個
花茄                                             一條
麻油                                             一茶匙
欖油                                             一茶匙
黑醬油                                         適量
黑椒 鹽                                        適量
sweet and smoky pork seasoning    一茶匙


做法
1) 雞胸肉一開三, 令雞肉變薄, 易熟易入味
2) 麻油 及sweet and smoky pork seasoning 醃雞肉最少 一小時
3) 茄子斜切, 紅辣椒一開 八
4) 開焗爐上下火 220度, 放 雞肉入爐焗 5分鐘, 再放入紅辣椒及花茄, 250度焗 5分鐘
5) 拎出放上黑辣椒及小小鹽, 最後放上黑醬油 即可










靚太, 希望你鍾意食啦, 小心身體呀...
以後我地以水代酒..!!!!!

日式咖哩洋蔥炒雞肉彼得包

2011年1月21日 下午01:50

今朝一早去左大埔做野......可能凍一凍親, 宜家個頭好痛..............
冇咩心機打 blog......好想訓覺.....
不過我都好想同大家分享 lee 個小食..


材料
雞扒                     半塊 ( 切條)
洋蔥                     1/4個 (切條)
日式咖哩磚          一粒
辣椒粉                  半湯匙
味琳                       一湯匙
日式豉油               一湯匙
彼得包                  一件


做法
1) 雞肉用 味琳, 豉油醃30分鐘
2) 咖哩磚用大約 50ml 熱水開好
3) 爆香雞肉至半熟, 再落洋蔥爆香
4) 慢慢落咖哩, 期間不停攪拌, 大約 5分鐘左右
5) 最後落辣椒粉, 炒勻 即可
6) 彼得包用鑊慢火煎香, 切開中間, 放入雞肉 即可

蕃茄炸雞意粉

2011年1月17日 下午12:00


今日公司有d野做, 打野唔多, 唔好意思

我自爆我係一個 高登既 CD-ROM
都睇左高登forum 都有 10年
好多時都會睇到好多新既資訊, 跟得好貼
今期 hit 爆既係 高登炸雞
原本我同女皇星期日諗住去試下睇下性感村姑咩樣
點知原來佢地 4點先開門, 真係吹bb
冇計啦, 我唯有番屋企自己開爐炸雞
超級大工程...!!!!! 同埋好嘥油....




材料
炸雞材料
雞脾肉                         一塊 切粒 (一吋x一吋左右)
蛋黃                              一隻
鹽                                   一小撮
栗粉                               4 湯匙左右


蕃茄醬材料
罐頭切粒蕃茄                            1罐
水                                                 2罐
洋蔥                                             1/4個 (切粒)
茄汁                                             一湯匙
0急汁                                            一茶匙
糖                                                  一糖匙


意粉材料
意粉                                        一人份
黑椒, 鹽                                   少少
刁草                                         少少
辣椒粉                                     一茶匙










做法
炸雞做法
1) 雞脾粒用廚房紙吸乾水, 打入蛋黃 及鹽, 醃 15分鐘
2) 每一粒雞脾肉平均上栗粉
3) 放入細火滾油炸至淺金黃色, 拎起, 攤凍
4) 再回鑊, 大火滾油炸至深色少少, 再拎起攤凍
5) 再回一次鑊, 再大火炸至性感金黃色 即可


蕃茄醬做法
1) 所有材料白鑊細火煮 1小時, 期間不停攬拌
2) 煮至 45分鐘左右, 用筲箕隔去一半蕃茄肉, 取其汁液回鑊再煮 15分鐘
3) 收水至掛汁, 備用


意粉做法
1) 滾水落鹽油煮意粉至 5成熟
2) 開鑊, 落蕃茄醬, 意粉, 及 100ml 意粉水再煮至 8成熟
3) 落炸雞, 煮至收汁, 落黑辣椒, 辣椒粉及 少少刁草 即可上碟






tips
炸好既雞可以即刻當小食咁食, 只要落少少黑椒同埋 辣椒粉...脆卜卜咁, 好鬼正!!
仲有, 如果唔食意粉, 可以用黎食飯都一樣好食架,
而且個汁都好好味, 用黎配飯食一樣超掂

雞雞卷

2010年12月31日 上午10:51
哈哈, lee 個名又係女皇改架?
我見女皇 facebook 個名改得咁得意
我又一於跟佢

材料
超大雞扒         一塊
白磨菇             一隻  (切薄片)
黃椒粒             1/4隻
薯粒                 1/4隻
百里香              5支
辣椒粉
鹽
黑椒








做法
1) 先切去雞扒多餘脂肪
2) 中間放入 白磨菇片, 百里香葉, 辣椒粉, 黑椒, 鹽, 捲成圓筒型, 生粉埋口
3) 錫紙包好定型, 放碟中中大火隔水蒸 15分鐘
4) 預熱焗爐至 220度上下火, 從錫紙拎出雞卷 放入焗爐焗 15分鐘
5) 焗雞中途, 開鑊炒黃椒及薯粒
6) 落少少油, 炒薯粒, 再落少少蒜蓉, 炒至薯粒透明
7) 開大火 煎香薯粒一面金黃色, 落百里香及黃椒 炒香, 讚少少白酒, 落鹽黑椒調味
8) 取出雞卷切片 (留雞汁), 放上碟中, 放好以後再放回先前的雞汁, 及辣椒粉即可






tips
最好揀薄身既雞扒, 同埋比較少油既雞扒
如果好厚的話, 可以用煮食用既繩扎實 同埋 落多少少生粉
最好就可以切薄塊雞扒, 令雞扒平均地薄.










題外話
大家屋企有冇 old school 既 紅藍 3D 眼鏡??
我0係女皇部 iphone 買左個 app
係可以 用紅藍鏡睇 3D 架
雖然d 色怪怪地, 不過都好過癮








題題外話
覺得點呀~
一連 3日既 post 係唔係都可以 聽日煮呢~~
我聽日會出多一個post, 希望可以 幫到大家諗少野 元旦大餐啦..

蕃茄雞肉菠菜蛋卷

2010年11月22日 上午09:59

煮lee 個真係用左我好多心機時間先整到出黎
又要準備好多野, 又要分開唔同既方法煮, 又要放慢手腳
仲有個蕃茄醬都係自己煮出黎, 真係煮到人都癲


材料  (兩條)
蛋                兩隻
雞柳            兩條
菠菜            二兩 左右
蕃茄           一個
紅酒            兩湯匙
水                 300ml 左右
蒜蓉              一粒
生抽              一茶匙


做法
1) 雞柳一開二用生抽 和 油醃最少 3個鐘
2) 發打蛋隻, 細火煎成蛋皮 備用
3) 蕃茄切丁, 落水落紅酒, 細火煮成蓉, 落糖調味 備用
4) 雞柳中火煎至半熟, 拎起切成絲
5) 回鑊, 與蕃茄 同炒至 掛汁, 落黑椒
6) 蒜蓉炒菠菜至半熟 備用
7) 將雞肉 及菠菜用蛋皮卷成, 生粉水封口
8) 回鑊, 落少少酒, 中細火煎蛋卷, 封口向底, 切件即成




題外話
自從互聯網開始人與人之間就有更多的接觸
世界也拉得更近, 相處樂觀還好
反之會出現更多的問題,
又例如一個面書可以令你找回多年前失去聯絡的好友
但而書亦都可以令你跟朋友反目
亦會吸引更多的私癮 問題, 是非亦然
一個互聯網可以令好多唔識既人走埋一齊
可以識到好多0岩傾既朋友,
可以識到好多 本身好難去認識既事物
但係到宜家只係 click 兩click 就可以 即時搵到
而且更比教科書更詳盡, 犀利之極
又講下 食物丫
自從有左 有互聯網之後既電腦
再加上輕便既數碼相機, 個個都即時成為食評家
食個 薯條又可以講 100字, 食個不知所謂既茶餐廳又可以講一大餐
就係咁, 先會令到咁多人0係 開飯 入面有份幫手推出咁多垃圾冠軍餐廳
如果唔係一個開飯, 點會有咁多人識搵食丫
自問我唔係一個食家, 亦都唔係咩識食既人
但係我一定係一個有要求既食客
我會用好多唔同既方向睇一間餐廳
宜家好流行 "性價比"
我就係會用lee 一個方法去做比較
唔會同 唔同級數既 作比較
但係可惜社會上出現好多比較街坊既朋友
冇去深入了解 就好快讚好
冇去比試其他餐廳就讚好
只會出現兩個情況
1) 只會有更多冇要求既人去食完讚好
2) 有要求既人食完會話覺得比人呃, 冇開飯d 人講得咁好


你地又俾 開飯既 食評 呃過幾多次~?!












0岩0岩0係 facebook 開左個 page, 希望大家入黎 "like" 啦
東主有喜' facebook page   <-------Click here
同埋我亦都諗住開始玩 微博, 大家可以關注我, 睇我平時做緊乜丫
東主有喜's 微博                 <------Click here


宜家冇咩人 關注 同埋 like 架咋
有你地支持, 我會有更多既動力

變型雞剛棒

2010年10月28日 上午10:50

哈哈,  女皇話lee 個好搞笑...
因為我只係用左雞柳去整
一條雞柳變左一支棒咁..哈哈
嘩, 今日真係好 凍喎原來
出到街 凍一凍就流鼻水喇.


喂, 大家仲有冇開 icq 呀??
可以 add 我喎~~哈哈
因為我 msn 好有問題..
成日都唔可以同人講野
好廢
特別係同女皇
所以我叫女皇 download 番個icq 黎用..哈哈
你地仲記唔記得個 number 呀?
我係 46740294  有興趣可以 add 黎玩架


材料 (一人份)
急凍雞柳                4條
新鮮冬菇                一隻
味琳                      
日本豉油              
糖                         
粟粉                       兩茶匙
胡椒粉                   少少
七味粉                   你話事丫




做法
1) 雞柳剁茸, 撻至起膠, 落味琳日本豉油 各兩茶匙, 落粟粉, 胡椒粉
2) 冬菇切成超細粒, 撈入雞肉
3) 放上竹籤, 做成棒型, 隔水大火蒸 10分鐘
4) 之後放入易潔中細火煎香四面至金黃
5) 落味琳豉油各兩湯匙, 落滾水 100ml, 糖 半湯匙
6) 細火煮至 掛汁 即可, 食時放七味粉....和味!!


Tips
d 雞柳可以 切到好細粒先剁, 會易好多
同埋可以 未解凍之前就切粒, 咁會易切好多