有朋友問我團年飯開年飯點解唔係我落手煮，其實我屋企人除左亞媽之外都冇咩人食過我煮既野，其實連識煮野都唔係好清楚。煮飯對我而言都仲係煮飯仔既階段，要出大場面我未有咁既機會，而且屋企兩佬都唔敢食我煮既食物，好似會落毒咁。再講丫，我同我老豆關係好差，所以更加唔會落廚房為佢煮飯，佢係一個百彈齋主，不停發出負能量既人，每一餐飯就算再用心機煮都會搵野嘈，當事人聲稱為左”有彈先有進步”。
我落廚房煮飯機會唔多，通常都係星期六，因為屋企兩老好多時會去馬交玩兩手同埋食下野，所以我有一個夜晚同女皇煮飯仔，不過時間都好急，為求番香港前要清潔好廚房，而且標準係比之前更乾淨。有人問我點解冇打blog 咁耐，飯又唔見我煮，因為自老豆退休以後好多時都係老豆自己閒日一個人去馬交玩，星期六留番屋企睇DVD。咁你話我邊有時間地方煮飯丫
就團年飯而言，亞媽用左好多心機去煮，而且足足準備左三日時間，浸發海參魚翅，煲左幾日既雞湯，炆足一日既花膠海參，搵左幾個街市先買到既新鮮大蝦，臭左屋企一星期既旬蝦，金蠔，新鮮雞，魚，咕嚕肉 等等…… 準備時間真係用左好耐，而大家都食得好開心。
雖然及得好靚，不過我冇食，我只係飲湯，因為我支持環保人仕!!
炆足一日既海參
令屋企臭左一個星期既旬蝦!!!
屋企地方細，十幾人上黎食飯唔夠位，所以要企住食
係亞媽先咁犀利 煮出咁多野食都冇黑面!!
要我煮咁多野食一定會發脾氣，同埋食完一碟再煮一碟。 我係一個食完一碟再一碟既人，所以如果要我煮飯我都會食完一碟再煮另一碟，為求最大家最好既時刻食，而在我而言如果一口氣煮完所有菜式所考慮的比一碟碟上枱更講究，就不同食品要有不同上枱次序以及準備功夫，有到過我屋企吃飯的朋友每每覺得我一整晚不停對住爐頭一定好辛苦，其實我話俾你地知我一 d 都唔辛苦，我煮野食好慢手慢腳，一切事情要我控制以內既事，自自然就會覺得時間過得好快，反而要同你地講聲唔好意思就真，冷落你地自己飲酒… ^^
