東主有喜.....: 美心皇宮(大會堂)

琴日同女皇兩個去飲茶，等左成個鐘位

好彩冇白費時間，真係好抵食

期待下一次搵多幾個朋友食多幾樣野 ^^

等位都等左成個鐘 !! 算快架喇.....

鳳爪排骨飯

最難既地方係飯有飯香而不膩

而且要軟熟分明既飯粒真係唔多

雖然不油膩，但係都要有鳳爪排骨既香味

令每一啖飯就算唔洗食餸都有餸香

如果真係撞啱好靚既飯就唔會落豉油喇...!!

兩條友飲茶又冇買報紙睇，唔玩影相自拍有咩好做~

估你唔到推點心推到有 LCD MON 囉~~

椰汁糕

望上去異常光滑，拎上手測試堅挺度

聞一聞有啖啖椰香

食一啖，三兩秒即刻溶化

軟糯足料感覺......人間美食!!

炸蝦餅

冇咩特別.....最特別係背後唔起眼既醬汁

以我估計用上山渣做成幫炸蝦餅帶上更高層次

飲茶必飲普洱

而且一定要黑過墨汁先鍾意

魚翅灌湯餃

真係有魚翅，而且份量都唔少

真係好足料...!!

湯清香，皮滑.........滿足滿足

麻茸包

嘩!! 近 5年都好難搵到再有酒樓賣麻茸包

唔知好難整定係冇人食

除左麻茸包外，仲有好多點心都失蹤

有冇好心人一一搵番佢地番黎??

講番個包

以前食麻茸包唔會考慮好唔好食既問題

因為只係 " 為左食而食"

更加唔洗講個包既質地、籵既質量

而今次唔單止為回憶而食

仲話俾我知原來麻茸包可以咁好食

望一望個包就知皮薄，因為可以望到入面既麻茸

聞一聞隔住個包都有少少麻茸香味

打開一睇成個包都係麻茸

聞一聞唔係太多豬油味

開初以為唔方好食得去邊

望多兩望見中間包有一粒溜油既蛋黃

食一啖...............咬兩咬

竟然!!!!

竟然會即刻溶化入你個口

驚為天人既感覺!!

令我諗番味吉陽一講 " 太美味喇"

頭上一片光一環.................

而且只係小點價錢 !!

天呀!! 點解咁好食架!!

馬拉糕

好食既馬拉糕我唔理係咩位置

著重佢俾我既過程

平時食到既馬拉糕放上枱就見佢死死氣咁

同埋放一陣就會實的的好散既感覺

最鍾意食既馬拉糕就算凍左都一樣好食

食落口會散開一粒粒好細既粒子

唔會一放入口就一 pat 野咁

愈咬愈多不同既層次

麵粉香、蛋香、椰香，仲有糖既清香味

食馬拉糕有上下兩層之分

上層鬆軟我鍾意留番後尾食

而下層比較似清蛋糕，放得蒸籠耐易吸水氣

所以應該第一時間食為之最好效果