星期六落左去吉之島見到 1855 牛扒番黎，二話不說買一塊番屋企 4個人分黎食
揀牛扒除左揀地區位置外，仲要睇多d 肉既色水，多唔多肥油
而 1855 既 牛扒 做好多時都做到以上最好既條件
價錢又合理，一大塊都係 100蚊左右，抵食到爛 !!
意大利飯前幾日都講過點整
我都唔再講多一次，有興趣既朋友可以去 lee 度睇番
而今日反而想講我自己煎牛扒既心得
希望幫到大家
因為 好多時 屋企請人食西餐都會買牛扒
而煎得靚都有d 門路 先容易
不過今日就口術，講住少少先
原本我真係諗住打曬出黎，但係諗諗下冇圖睇真係好難明
在我而言，牛扒未必愈貴愈好食
而有得揀的話我都會揀 美國牛扒，覺得肉味重好多
記得煎牛扒唔好醃，一塊靚既牛扒醃左的話，食唔出個真味
鑊一定要 燒到好紅好熱，熱到出煙
牛扒落鑊前最好就入雪櫃 一陣，拎出黎落少少黑椒 同埋 鹽
再上少少生油，直接放落鑊
煎咩肉類都好，都唔會反黎反去，只會流失肉汁
睇牛扒既厚薄，簡單d 講 冇骨既牛扒 大約都係 1吋 左右 厚
大火煎 1:30 秒 反另一邊 煎 多 1:30秒 左右 就可以做到 5成熟
而所有肉類 煎好都會流失肉汁
所以最可以保留肉汁既方法 俾我 發現 有個 tips
好多廚師都會教你煎好以後放埋一邊 唔好理佢, 大約 10分鐘左右 先上碟
而我就發現 如果 將隻碟 事先 整到暖暖的話 先再放牛扒
令牛扒同碟之間既溫差冇咁大, 流出黎既肉汁都會少好多
而流出黎既肉汁 記得 上碟後"筆" 落牛扒面，好食好多架!!
