雖然係素意粉 但係我用左雞湯,
如果真係唔食肉既朋友, 可以用菜湯, 咁就可以全素喇
今次我用左翠肉瓜同埋甘荀做 素意粉
不過再簡單都好, 都要有少少 tips 先好味
例如 需要一粒金蒜, 例如甘荀絲要先用油爆香至軟身
唔講可能你地唔知甘荀要用油炒到出紅油先好食
再落少少金蒜一齊煮, 先再落翠肉瓜絲 煮一陣
令甘荀翠肉瓜吸收金蒜既香味
再落少少雞湯煮多一陣, 落少少鹽, 黑椒 調味
因為翠肉瓜會愈煮愈出水, 所以大火煮一陣好喇
要保持翠肉瓜既爽脆質感
煮到收水就可以上碟, 再放少少金蒜
最緊要飲埋d湯, 真係好甜, 好清
如果你地冇心機慢慢切的話, 就要睇下靚太送左d咩俾我喇
就係lee 個刨喇, 係靚太送俾我架, 好好用
而我就係用lee 個刨 5分鐘唔洗搞掂切好曬架喇
靚太 , 個刨真係好得呀!!! 我會再諗下有咩好玩架喇...
希望唔會令你失望啦...哈哈 多謝曬呀!!
題外話
前兩日同 Catherine 出黎 即興快閃 happy hour
去左灣仔一間酒吧, 原來果一間酒吧以前大家都留過唔少腳毛
但係食物用服務都唔似以前咁好, 再講
一間酒吧冇食物冇服務都算喇
好似我地叫杯白酒番黎, 味道好似變變地, 而且又唔凍
我地就講, 熱既唔熬, 凍既唔凍......痴線
再講服務, 我地唔知咩事, 感覺好似俾人睇我地唔起咁
catherine 就話見人英文唔係好叻就睇人唔起
我都認同catherine 講既野
香港係一個好奇怪既地方
同班講英文既人講野就要我地就佢講英文
又唔見佢地黎香港要就我地
講得唔好又俾人笑, 如果講廣東話唔好我地又笑人
而事實上去到外國我真係好笑會見到咁既情況囉
而且人地仲會好開心大家識尊重大家, 唔會拎黎笑囉
我英文唔好, 冇去過外國讀書, 會考都唔合格
但係我黎得一間焗我講英文既餐廳, 我都會聽我都會講
又唔見你地班講英文既人學中文!!
大佬呀 你地黎香港搵食 反而要我地就你地, 仲要俾你睇唔起
其實我一直都唔係好覺香港係一個國際大都會
反而係一個國際大笑話, 乜都唔夠人好, 仲以為自己好好
btw, 英文唔好果個係我 唔關 catherine事, 佢都不知幾好....
睇黎我要睇多d 鬼佬教煮餸既節目喇...學多兩句英文
