上星期六放工準備同女皇去食野突然記起最近有一間新既拉麵鋪頭
同東京池袋某拉麵店同一個名，一樣叫無敵家
原來兩間鋪頭無關係，只係名字上一樣
竟然有一間拉麵店夠膽抄人個名，就等我試下係唔係真係咁把炮 先
話曬 池袋果間 正貨 係 東京 五大拉麵店之一，日本十大拉麵 (可能有錯)
真係要出多兩錢精神，認真睇下有冇本錢學人叫 無敵家!!
個門面幾靚, 有著日本味道，拉開門入去小貓三兩隻
可能性只有兩個
1) 唔好食 2) 未有人知道咁好食
咁熟口面既??? 好似大坑 既達磨 見過~~
但係好奇怪，明明係賣拉麵，但係張紙只係得 清酒同埋燒秋刀魚
唔通晚市 會賣其他野食?? 有d 格格不入咁...
唔理咁多, 叫野食先~
個價錢 同東京食拉麵差唔多, 都 大約 90蚊一個
以香港黎睇, 除左 和歌山 / MIST 過 100蚊一碗，我諗無敵家都算其中一間貴既拉麵
選擇唔多，唔吸引，得幾款拉麵揀 ，另加配料12蚊一碟仔
點解圖中既我會咁既樣呢?
因為由落 Order 到上枱 跟跟等左 15分鐘
連仕應叫我飲既可樂都未到
我冇催佢地...我就係想知我要等幾耐......
客都係得幾個，要我等咁耐 99% 係冇左張單
不過 15分鐘又有得食........是係咩意思呢?? 真係咁慢???
有得上二樓，以我估計比人包場
同埋 我見紅酒杯比 清酒杯仲多，所以應該夜晚會比老細玩既私家地方
感覺麻麻地...好似係你班老細要搵地方玩先開鋪頭
等人幫你頂左個租咁~ 食拉麵洗鬼包場，洗鬼飲紅酒 !!
全麥粒粉掛麵
我都唔知應該點樣由頭講起，講飲講食都係望聞問切
上枱第一眼既感覺係覺得 " 好行貨" ，乾巴巴的外表，毫無光澤
木耳又粗切又硬身，菠菜唔襯拉麵，而且仲有水喉水味
叉燒又硬又唔香，肉味又冇，仲要搵火搶燒過
Sorry, 咁既特色 我唔識欣賞囉.................
而個麵真係睇得出有麥既存在，可惜離真係入口既拉麵仲差 10萬8千里遠
過彈，麵粉味太重，過粗身，似烏冬多過拉麵
不過由於過彈 令我覺得做左咩手腳
同埋 食兩啖應該就食唔落其他野
而個掛汁雖然幾香濃，但係只係食到麵豉既味道
就好似直接用少少水開出既味
再講..........
我地叫左個貴 8 蚊 既 辣味掛麵
黎到唔辣......於是叫店員換
店員" 冇落辣俾你咩? 得得得，加番俾你"
二話不說拎入廚房 5秒 拎番出黎
店員再講" 如果唔辣，落七味粉丫"
唔該曬....!!!! 原來落枱頭就已經出現既 七味粉
咁我做咩 加8蚊 轉辣呢???? 你無野呀~???
特製北海道冷麵
上枱第一個感覺係 有 5碟 餐前小食 放埋一齊
蟹柳，番茄，青瓜，菠菜，木耳，泡菜，蔥，牛利
咁我就遂一鬧
蟹柳 冇味又濕又凍 ，蕃茄切到咁大舊把鬼咩!!!!
青瓜好明顯係用機整出黎，仲要唔係咩貴, 如果唔係冇理由咁粗
青瓜籽又冇去，咁硬既皮又冇去.............廢解
菠菜一樣都係有水喉水味，木耳一樣咁大咁硬
泡菜仲大鑊.........冇色冇味......
蔥就仲搞笑.....放得太耐而好硬身........
最諗唔明既係牛利....做咩用牛利呢???
我已經盡最大努力 撈埋佢地
但係結果都係分開曬, 食落口又怪怪咁
咩都好硬身，而且碗底 成碗都係冇味既水
我覺得食d 料冇隔好水就放上碗
lee 個麵質仲搞笑..... 一樣好彈牙
但係唔明點解會透明架囉..............如果有高手的話
唔該講聲我知, 教下我地點整先會做到透明~
食兩啖連女皇都頂唔順............放棄左......
totally 食左 220蚊，真係好貴!!!
而且的只係想同佢老細講一句 " 唔該唔好影衰無敵家 個名" !!
故事 未講完 ~~
0係無敵家食得兩啖 又點會飽丫
於是即刻跳出門口走去對面既 加東叻沙蝦麵
食番d 冇死又冇保證既 食物
海南雞 叻沙
雞肉滑皮爽.....
叻沙 都算係香港其中一間數一數二接近 新加坡味道 既餐廳
平時我仲會食巴東牛肉 同埋 肉骨茶
一樣咁好食!!
米暹 真係唔係平時我杯茶.......但係我知 女仕幾鍾意食 lee 隻味道
所以我叫左一個比女皇食
酸酸甜甜, 椰香, 味濃
冇估錯用左 馬拉人最常出現既味
羅望果子，南薑等既味都好出~~
而當中既紅油應該係椰汁煮幾個鐘先變出黎既油
巴東牛肉上既紅油都係椰汁受熱出油而成
而唔係辣椒做出黎既油
我鍾意隻蝦大大隻又爽口鮮甜
大碟夾抵食!!
到女皇食到好飽好飽 我就提議女皇 " 不如叫咖央多士 丫"
女皇" 真係好飽喇"
" 放心喎, 信我, 你一定食得曬, 我驚你唔夠食添呀"
一塊麵包烘多士, 然後中間一開二 放咖央醬 同埋 鮮牛油
多士超脆, 應該係烘燶再清除表面既燶
平時0係屋企我都會咁做, 特登整到塊麵包好燶 再用刀整走d 燶
而個醬好淡口, 好清香, 班蘭味, 椰味好 平衡
後記
天堂 與地獄 既分味 在乎 廚房 對食既認真
如果 無敵家 光靠 名字就打出名堂的話..........
如果覺得香港人 唔知 池袋 正牌 無敵家咩質素 的話
咁我都改名做 劉德華 啦..!!! 仲洗叫東主咩
除非我自問可以超越 劉德華 成就 or 有信心比劉德華 更受歡迎
如果唔係我驚我日日都聽到人地鬧我 " 唔知醜"
平時我會0係 facebook page 講多d 其實唔關事既野 有興趣既朋友 可以 join 埋一齊傾丫, 方便好多架~
