新城市一田超級市場
身為香港區既人, 自然對新界地區會比較上少興趣
何況香港區基本上應有盡有, 無需特別到新界行街買野
早前 受到 blog 友 Daphne 邀請到 一田 做一個超市 訪問
所以我都事前到一田行幾次, 做一個少少準備
開頭未去之前, 覺得一田只不過是普通超市而已
而且同場有 City Super 做對手, 應該係一個難題
但係基於要有基本準備, 我同女皇好細心行左好耐
留意到好多貨品都好齊, 齊既意思係 好多貨品都好實用
好0岩 香港屋企正常需要既食品, 而且地方雖少, 但係貨品放得好有條理
唔似得香港區的超市, 如果想買齊所有比較高級的食材 要到幾間超市先買齊
估唔到一田都幾細心, 有機菜蔬都係本地種植, 而且價錢好抵買
生果部好似北美洲既感覺, 只係好左好多咁
壽司雖然唔係好認同超市買, 但係我睇落好高質數
可以比得上 Sogo 既質素, 而且價錢好抵食, 真係唔錯
最中有幾樣貨品令我好多問號, 唔知點解會咁平
dry aged 牛扒 68蚊 100g --- city super 都要 120幾蚊 100g
不過未食過, 唔敢講質素得唔得, 但係普遍黎講
一田 既牛肉好平, 和牛比起好多精肉店都要平, 而且油花超多 都係 120蚊 100g
仲有無花果都好抵, 一大盒都係 140蚊, 都好似有廿幾粒架!!
city super / sogo 果度買都 60~ 70蚊 6 粒 啦
基本上一田真係可以有齊你想要既食品
就好似香港幾間超市 group 埋一齊咁, 好得意
我諗係lee 個原因, 而令到沙田間 city super 宜家少左人行
反而一田就好爆場, 希望唔會係新屎坑啦...
最衰我係香港人, 如果唔係我會去一田買野多過去 city super
貨品種類多, 價錢大眾化, 店員專業又親民
就好似賣酒果區咁, 唔似得其他超市咁, 賴係高級咁
令到好多普通市民唔敢入去買, 0係一田 雖然酒唔係多
但係勝在好多酒都有解釋, 唔會只係得一個英文名
令好多小市民都容易接觸, 容易知道自己想要咩酒
有唔明會有幾位姐姐解答你想知既野, 唔似有d 超市會受人白眼
我真係對一田改觀!! 如果唔係要做訪問而要做功課的話
都唔知原來一田 對實用, 貴既貨又有, 普通貨又有
中西日式食品都有, 真係0岩曬我 lee 亂煮一餐既人
講到 lee 度, 我諗一定一定有人覺得我係收錢做打手幫一田賣廣告
但係好老實講, 我一蚊都冇收過!! 而且我同女皇仲請半日假去做訪問
車錢都自己俾, 仲要行左幾次, 都覺得一田真係比之前好好多
好值得去一田都唔去 city super (新城市的話)
當然啦, 一田都有好多唔好既地方, 例如地方太細, 人又多
魚檔果邊又唔係一條條買, 切好曬俾你, 感覺好差
生蠔果邊又有少少魚鯹味, 唔知係唔係有d唔新鮮定係地方唔清潔
因為地方太細, 而且好多試食區, 又湯味, 又肉味
明明想買糖買零食, 但係就聞住d 藥材味, 搞到我都唔想買
明明睇緊魚, 睇緊 壽司 又聞到好勁既 煎牛扒味, 老實講有少少想嘔
不過, 其實只係我乞人憎, 搵野黎講姐
好聽d講, 就覺得好有人情味, 好親切既感覺, 而且因為咁樣既環境
令人減少好多壓力, 俾人感覺容易接觸, 唔似其他高級超市好似吊高黎賣咁
到訪問既過程, 我同女皇由頭到尾都唔似做訪問
反而好似係我地兩個0係超市不停玩咁, 就好似平時行超市咁
真係講下笑, 行下, 揀下野, 吹下水咁, 不過亦都因為咁
我怕我講既對話內容唔0岩 Daphne 用, 又怕覺得我地唔認真
希望幫到你手啦 Daphne~~
