

仲記唔記得上次煮過鵝肝醬意粉既~~~
果次食唔曬D菜, 留番另一日煮
呆企左0係廚房 1分鐘, 不停諗點煮好
突然間記起 我契妹 佢上星期去左泰國玩幾日
買左一盒野俾我
我唔係好知係乜
不過我估應該係 辣魚鬆
用黎撈麵先正!!!!!!! 加少少麻油......WOW...........
我唔係好捨得食架咋
因為如果食曬都唔知香港邊度有得再買番
唔通要番去泰國先有?
我行過 香港最多泰國鋪頭既九龍城都唔覺眼
大家如果見到的話, 同我講聲丫...
講起辣 lee 樣野..
之前我咪話我唔食得辣既~~~
一食完個咀就會好腫 好紅
話說我公司下面有間茶餐廳 叫 廣東燒味
我個同事有一次拎左碟辣椒油黎食
我又口多多咁試左一啖
丫, 又好好食喎, 好香
於是我就日日都去同一間食唔同既野都落辣椒油
食食下又冇咩事喎
好多時食辣野都冇腫
所以.....哈... 下次煮多d辣野先...
材料 (二人份)
荷蘭豆 一包 (去根)
西生菜 半個 (用手摵細塊)
蒜蓉 半粒
魚露 半湯匙
辣魚鬆 半湯匙 (如果冇可以用 xo醬)
做法
1) 蒜蓉起鑊爆香, 落 荷蘭豆 大火炒一陣, 落西生菜 再炒一陣
2) 落魚露同埋 辣魚鬆 同埋少少糖炒多兩炒就搞掂
Tips
1) 炒菜唔好炒到100%煮先上碟, 因為 d 菜本身仲有熱力會keep 住煮
如果唔係就會老曬架喇
2) 可以的話, 其實炒菜落魚露係好食過落鹽/豉油