琴日都唔知做咩事 咁燥底....
今日都雖然有少少燥, 不過就一定好過琴日, EQ 高番少少..哈哈
唔好意思呀, 嚇驚大家....
上星期六女皇要番工, 我唔洗
但係我就訓到 一點有多..
只好叫女皇番黎屋企食野, 我煮啦
屋企又冇咩好食...搵下搵下..
有一包雞柳, 係我隻狗(亞妹) 食既野.
不過其實係人食果d雞柳,
只係我屋企唔會食亞妹雞柳
同埋我屋企成日都有新鮮雞食., 所以冇咩機會會食
lee d 雞柳犀利呀, 10年前賣 14蚊兩包, 今時今日要賣 21蚊一包.....
又話10年既紙水同宜家一樣.....但係點解d野貴左咁多....
又話下d 蔥丫...10年前 1 蚊一斤, 到上個月最貴 16蚊一斤
又講下五香肉丁啦, 以前 3.5蚊, 宜家 要 7 蚊
d 豆"杯" 10年前買 22蚊一斤, 到過年最貴 120蚊一斤, 仲要有好多豆苗, 呃你
再講下d 豬肉喇..... 10年前都係 12蚊一斤....宜家有d 要 賣 22蚊斤
最慘果樣係幾年前新聞問 一個豬肉檔檔主點解加 4 蚊價
個檔主話" 因為五豐行加左我 2 蚊, 所以我要加 4 蚊平衡番"
過左幾年時間, 我仲好記得佢講既野......
再講下d 雞丫.......短短 10年......經歷過最平同最貴既價錢....
過年最貴果時 350蚊一隻 清遠雞, 到沙士期間既 10蚊一隻都冇人買
又講埋個批發價俾你知丫, 最貴過年 35蚊一斤, 沙士 1 蚊一斤
唔好意思, 唔好意思, 扯得太遠.......番黎先....哈哈
d 雞柳先剁碎變蓉, 期間可以落少少水一路剁一路落少少水
最好剁到有少少起膠既感覺先好停..
我一人份量, 大約落左 3條超大巴西雞雞柳
剁好就可以醃喇, 落多多凍滾水, 落少少酒, 落少少生抽, 大孖頭抽一湯匙, 老抽少少, 麻油, 糖, 胡椒粉同埋少少豪油
基本上所有醃肉都要落好好水先會滑身架. 記住喇
同埋醃肉有個幾好既 tips, 當你落好曬所有調味之後, 你可以用個鼻聞下
應該係覺得幾香先收貨.....醃出黎唔香, 食都唔會好食啦~
我諗大約醃 半個鐘左右啦....
期間可以準備 意粉, 我今次用左個比較奇怪既方式去炒...
先先落鹽滖水落意粉, 煮到 9成熟, 隔水放入大碗
落三湯匙左右既獨子蒜頭抽撈勻, 再落少少老抽, 同埋一湯匙左右既油撈勻
開鑊先煮好d 雞
爆香一塊薑, 落雞, 推散至一舊舊細細粒咁...
7成熟就好拎起備用, 洗鑊..
開鑊, 落三大塊薑爆香, 要爆到d 薑有少少燶為止
次後就落大量既蔥段, 大約落左兩條蔥左右啦我
爆到有少少燶, 就落dd 既蒜蓉 再落埋d 雞一齊炒
然後落埋d 意粉, 筷子 + 鑊鏟一齊快炒, 期間可以試下味
唔夠就落老抽, 同埋少少蠔油, 炒好之後就可以落鑊尾油就搞掂喇........
女皇睇住我整果時佢又係覺得好奇怪.....唔知我做緊咩......
不過反而係佢食得多過我囉....哈哈
仲話d 雞好滑.....完全估唔到係雞柳...哈哈.....大成功哦~~
唔好意思呀, 我lee 期係咁出大孖頭抽獨子蒜既 post
唔講一定有人以為我收左佢錢賣佢廣告..哈哈
只係我屋企有個亞媽, 佢話我買得太多一樽樽既野番黎, 要我快d 快左佢
唔好咩都買番黎, 買番黎又唔食.....
所以快快手手清左一樽先..哈哈
