0係灣仔做野做左幾年, 來來去去都係食果幾間野
原因係太貴唔會去食, 多人唔會去食, 用好多時間既都唔食
飲茶都冇咩機會, 食快餐又覺得貴
所以好多時都係要食茶餐廳
貪佢有位, 茶靚, 炒野好食
但係耐唔耐都要食番一兩餐對自己好d既
比較上好既都係 百幾蚊
但係 原來灣仔都可以搵到d好野食
lee 間野想同大家分享好耐架喇
只係可惜 我次次都冇影相
廢事只係用 文字去表達啦
set lunch 可以揀 沙律
沙律冇咩野好講, 普普通通, 次次食都覺得幾新鮮既味道
要讚既食個份量都唔算細, 好清新既感覺
唔食沙律可以飲湯
我次次去食都係俾磨菇湯我, 幾香幾滑, 唔錯
如果有俾我, 我會揀湯飲
賣相唔錯, lunch 食餐咁既野真係好滿足
我次次去食都叫 牛扒食, 仲要 medium rare, 個底仲有好多配菜食
牛扒質地香軟, 唔痴牙, 仲有炭香, 宜家一早打lee 個blog, 搞到我都好想一陣去食
同事 叫既 魚, 我唔食魚都食左幾啖
有睇開我個blog 既都知我唔係好鍾意食魚, 驚佢鯹同埋有骨
但係lee 碟魚 雖然應該係 急凍魚柳
但係出奇地多汁, 連一個好似我唔食魚既人都食多兩啖
搞到同事係咁嘈.....仲話我食咁多要我請佢.....(佢就想喇)
總結
一個人都係大約俾 110蚊左右, 有咁既環境, 食物, 食物擺設
你話抵唔抵先~~ 仲有喎, 佢夜晚都唔係貴架, 都係 二百幾蚊有一個set
其實拍拖夜晚去食都唔錯架, 你唔好睇少少份量呀
佢之前仲有好幾個包俾你食架, d包都好好味架
不過lunch 去之前最好book 位, 因為 都幾多人
灣仔有兩間, 一間比較少人, 一間比較多
地址: 灣仔謝斐道153號地下 <------比較細間同埋比較少人, 不過比較上好食
電話: 2122 9795
地址: 灣仔港灣道23號鷹君中心1樓102-105號舖 <---比較大間同埋比較開陽
電話: 2877 2680
題外話
前果排同女皇搭 van 仔, 前面坐左一對男女
應該係結婚冇耐, 車程大約 40分鐘左右
由上車嘈到落車, 不停係咁鬧交
基本上我覺得大多數時間都係個女人鬧鬧鬧
男人先開始嘈
有幾句野係個女人不停重複
1) 你信唔信我先? 你信我唔會係咁囉
2) 結婚唔係咁架囉, 你知唔知咁樣好傷害大家
3) 你咁樣做就唔0岩, 你都唔尊重我
4) 果d係我屋企人, 係唔係我都可以咁對你屋企人
男既都有幾句不停重複
1) 你成日都係咁架啦
2) 你次次都係咁嘈
3) 你每一次有咩事都咁既反應
我同女皇以為佢地會不停咁嘈, 應該有事發生架啦
點知佢地落左車, 又好 sweet 咁 拖住手行
我地覺得好奇怪, 你地明明嘈緊, 但係落左又咁
唔係應該是但一個早d落車, 大家冷靜下架咩~
當然啦, 我同女皇都未結婚, 真係唔會明白 果個係一個咩世界
只不過我覺得就算大家有咩問題都好, 番屋企先嘈啦
俾咁多人知你地既衰野, 有咩為呢...
