原汁原味
最近灣仔開多左一間新既餐廳, 外表睇落去好同銅鑼灣既"香港大排檔"有得fight,感覺上兩間餐廳走既路線差唔多, 我上個月去過大排檔, 不過感覺唔係太好,食物唔係太好, 之後行過灣仔道, 見到有一間類似感覺既餐廳上場,都唔抱咩期望架喇, 我驚佢係賣樣多過賣食物, 所以選擇同同事去食下lunch 算喇,因為如果唔好食的話, 都唔會太貴丫
入到門口睇下個裝修, 感覺比香港大排檔舒服, 冇咁做作, 有d 原始既味道俾到我, 之後諗住沖入去坐底睇下有咩食啦, 點知收銀個姐姐同我講" 我地lee 度係買左"飛" 先入去拎野食架" 哦....恍然大悟...原來個形式好似快餐店咁, 買完再拎入去俾水吧, 再自己搵位坐, um..諗諗下都算啦, 都係食佢d野姐, 最少入面d員工既態度都唔錯丫, 幾有禮貌, 咁我就睇下有咩野食啦, 見到牆上面有一個個木牌掛0係上面, 種類唔多, 都係得 5~6 樣野揀, 有d咩野食我唔 100% sure 記得喇, 因為要快快手手揀食咩, 快d坐底, lee 間野d 價錢其實都算幾貴, 閒閒地都食 四十幾蚊, 仲要唔包飲品, 一個飯35~38蚊, 另加野飲+ 6蚊, 另加是日老火湯 +8蚊, 仲可以+8蚊要個菜, 咁計下計下 都要 四十幾蚊, 如果相比番附近d 餐廳都貴左 十幾蚊一個餐, 好在, 份量都唔算少, 一個男仔都應該夠食有凸
最後我地兩個人叫左兩個餐, 分別有古法鹽焗雞同埋茄子炆豬頸肉, 再加多一杯凍檸茶 同埋一碗湯, 我地揀左坐樓上一樓, 如果坐樓上就會有人幫你拎野食上黎, 唔洗自己等自己拎, 我地上去坐底唔洗一分鐘就有人拎d食物上黎喇, 速度真係好快, 好似快餐店咁快. 當時都兩點幾喇, 但係就唔會好似其他餐廳咁一到兩點所有人唔見曬, 我諗仲有 二十個人左右啦, 所以我諗lunch hour 果時會好爆埸, 最少宜家可以坐得好安心好舒服, 又冇咁嘈.
個外表真係好靚...好有味道..
一盤食物一次過上黎, 最搶眼既一定係佢地d碗碟, 係一d 好舊式既雞碗雞碟, 比起香港大排檔真係羸曬, 再黎睇下d餸, 感覺好溫暖, 好似屋企亞媽煮出黎既煮咁, 好有親切感, 之後再望下d飯, 竟然用紅米煮既飯, 真係落本喇, 食紅米飯令lee 一餐飯冇咁大罪惡感,哈哈
咁多樣野, 竟然最吸引既係碗西洋菜豬展湯, 一睇個樣就知煲左好耐, 好"溶" 好夠味, 又夠香, 面頭仲一d油都冇, 睇殷都真係落過心機去煲
再睇下碟雞, 個賣相就麻麻喇, d 肉質好似好鞋咁, 而且斬雞既方法好似怪怪地咁, 一大一細, 又唔係順住隻雞個形咁斬, 雞皮又唔似脆卜卜咁
算啦, 可能大家對古法鹽焗雞既定義唔一樣姐, 唔理咁多, 試左先, 我揀左舊雞胸近 patpat 果舊, 果度係我最鍾意食既一舊, 因為貪佢又肥又香, 雞味又重, 食lee 舊冇走雞. 食落去, 咬兩下, 又估唔到似眼見好食多汁, 雞味又重, 又冇雪味, 唔錯喎. 不過有樣野都幾奇怪, 古法鹽焗雞點解有沙薑架呢? 奇怪喇....算啦....好食就得啦...
最後要講下佢d 雞汁/雞水, 個感覺就真係完全番左屋企食飯, 等亞媽蒸完雞飲埋d雞湯咁, 正!! 估唔到黎到lee 間野都有咁既感覺
到試下個茄子炆豬頸肉喇, 一睇個樣就知好食啦, 但係等等先, 有d綠色野既, 咩黎架呢, 哦.....原來係翠肉瓜...咁得意既, 有翠肉瓜, 不過似係後期先放入去既野, 試左個 茄子先, 睇下個茄樣, 冇咩色, 即係應該冇炸過, 再睇下個質地, 軟軟的, 所以肯定冇炸, 如果炸左先煮的話d茄子係會硬身好多同埋會紫色, 太好喇, 冇咁油膩, 試一舊茄子, 有好香既豆醬味, 再試埋個豬頸肉, 亦都冇出面食一般既肥膩感覺, d 汁好好食, 可以"送" 幾碗飯...好食...
總結 : 如果收你 四十幾蚊, 我覺得係去得, 而且仲會去多幾次添.........!! 0係灣仔又發現左一間好食既餐廳喇...good!!
